பிரபல நடிகருக்கு இன்ப அதிர்ச்சி அளித்த அனில் கும்ப்ளே

கன்னட நடிகர் கிச்சா சுதீப்பின் பிறந்த நாளுக்காக ட்வீட் ஒன்றை வெளியிட்டுள்ளார் பிரபல கிரிக்கெட் வீரர் அனில் கும்ப்ளே.

1997 முதல் நடித்து வரும் கன்னட நடிகரான சுதீப் - நான் ஈ, புலி போன்ற தமிழ்ப் படங்களிலும் நடித்துள்ளார். சில படங்களையும் இயக்கியுள்ளார். 

இந்நிலையில் செப்டம்பர் 2 அன்று தனது 50-வது பிறந்த நாளைக் கொண்டாடுகிறார் சுதீப். இதையடுத்து ட்விட்டரில் சுதீப் பிறந்த நாளுக்கான போஸ்டரை (சிடிபி, காமன் டிஸ்பிளே போஸ்டர்) ட்விட்டரில் வெளியிட்டுள்ளார் முன்னாள் வீரரான அனில் கும்ப்ளே. என்னுடைய நண்பரும் மூத்த நடிகருமான கிச்சா சுதீப்பின் பிறந்த நாளுக்கான சிடிபி-யை வெளியிடுவதில் மகிழ்கிறேன் என்று கூறியுள்ளார்.

அனில் கும்ப்ளே போன்ற பிரபல கிரிக்கெட் வீரர், தன் பிறந்த நாளுக்கான போஸ்டரை வெளியிட்டதில் மிகுந்த மகிழ்ச்சியடைந்துள்ளார் சுதீப். ட்விட்டரில் அவர் கூறியதாவது: இதை விட வேறு சிறந்த பரிசு என்ன இருக்க முடியும்? ஆச்சர்யப்படுத்தி விட்டீர்கள். மிக்க நன்றி எனக் கூறியுள்ளார்.