டெல்லி கணேஷ் உடல் தகனம்!

மறைந்த நடிகர் டெல்லி கணேஷின் உடல் திங்கள்கிழமை தகனம் செய்யப்பட்டது.

பழம்பெரும் நடிகர் டெல்லி கணேஷ் உடல்நலக் குறைவால் ஞாயிற்றுக்கிழமை அதிகாலை உயிரிழந்தார். சென்னை ராமபுரத்தில் வைக்கப்பட்டிருந்த அவரது உடலுக்கு திரையுலக பிரபலங்கள், அரசியல் தலைவர்கள், பொதுமக்கள் உள்ளிட்டோர் அஞ்சலி செலுத்தினர்.

இந்த நிலையில், சென்னை ராமபுரத்தில் உள்ள டெல்லி கணேஷின் இல்லத்தில் இருந்து அவரது உடல் இன்று காலை 10 மணியளவில் நெசப்பாக்கம் மின் மயானத்துக்கு ஊர்வலமாக எடுத்துச் செல்லப்பட்டது.

இதையடுத்து, உறவினர்கள் மற்றும் நண்பர்கள் மத்தியில் டெல்லி கணேஷின் உடல் தகனம் செய்யப்பட்டது.

விமானப் படை மரியாதை

திரைத்துறையில் நடிப்பதற்கு முன்னதாக 1964 முதல் 1974 வரையிலான காலகட்டத்தில் இந்திய விமானப் படை வீரராக டெல்லி கணேஷ் பணியாற்றியுள்ளார்.

இந்த நிலையில், ராமபுரம் இல்லத்தில் இருந்து டெல்லி கணேஷின் உடல் ஊர்வலமாக எடுத்துச் செல்வதற்கு முன்னதாக, அவரின் உடலுக்கு விமானப் படை கொடி போர்த்தி வீரர்கள் இறுதி அஞ்சலி செலுத்தினர்.