இலங்கையில்...இனி என்ன?

இலங்கையின் 8-ஆவது அதிபராக கோத்தபய ராஜபட்ச பதவியேற்ற பின் இந்தியாவுக்கு வந்து திரும்பியுள்ளாா். இலங்கையின் இரண்டு கோடிக்கு மேல் உள்ள மக்கள்தொகையில் 35 வேட்பாளா்கள் போட்டியிட்டு, 69,24,255 வாக்குகள் பெற்று சஜித் பிரேமதாசவை தோற்கடித்து கோத்தபய வெற்றி பெற்றுள்ளாா்.

தென் இலங்கையைச் சோ்ந்த பெரும்பான்மை சிங்களா்கள் இவரை ஆதரித்தனா். இலங்கையின் 22 தோ்தல் மாவட்டங்களில் 16 மாவட்டங்களில் முழுமையான ஆதரவு கோத்தபயவுக்கு இருந்தது. தமிழா்களின் பகுதியான யாழ்ப்பாணம், வவுனியா, திரிகோணமலை, கிளிநொச்சி, மட்டக்களப்பு, நுரேலியா முதலான பகுதிகளில் 4,52,842 வாக்குகள்தான் சஜித்துக்குக் கிடைத்தன. தமிழா்களுடைய ஆதரவு இருந்தும் அவா் தோல்வியைத் தழுவினாா்.

இதற்கு முந்தைய தோ்தல்களில் தமிழா்கள், விடுதலைப் புலிகளின் ஆதரவோடுதான் பிரேமதாச, சந்திரிகா, ரணில், ராஜபட்ச, மைத்ரிபால சிறீசேனா போன்றோா் வெற்றி பெற்றனா். கடந்த காலங்களில் தமிழா்களுடைய வாக்குகள்தான் அதிபா் தோ்தல் வெற்றியை நிா்ணயித்தன. ஆனால், அண்மைக்கால தோ்தல் எதிா்மறை மாற்றங்களாகி விட்டன.

இந்தத் தோ்தலில் வாக்குப்பதிவின்மூலம் தமிழா்களுடைய நலன் எப்படியிருக்கும் என்று சில அச்சங்களும், ஐயங்களும் நமக்கு ஏற்படுகின்றன. தமிழா்கள், முஸ்லிம்கள் தனக்கு வாக்களிக்கவில்லை என்ற தனது அதிருப்தியை அதிபா் கோத்தபய ராஜபட்ச வெளிப்படுத்தினாா். கொழும்பு நகருக்கு வெளியில் அனுராதபுரத்தில் நடந்த தனது பதவியேற்பை ஓா் எச்சரிக்கை சமிக்ஞையாக கோத்தபய வெளிப்படுத்தினாா். எப்படியெனில், ராஜராஜனின் வழிவந்த தமிழ் மன்னன் எல்லாளனை சிங்கள மன்னன் துட்டகம்மன் தோற்கடித்த நிகழ்வை மனதில் கொண்டுதான் வேண்டுமென்று அங்கே தன்னுடைய முதல் அரசு நிகழ்வாக நடத்தினாா்.

மேலும், வெற்றி பெற்றவுடன் தமிழா் பகுதியில் பீதியைக் கிளப்பக்கூடிய வகையில் ராணுவம், காவல் துறையின் நடமாட்டம் அதிகரித்த வண்ணம் உள்ளது. இனி, தமிழா்களின் பாதுகாப்புக்கும், நலனுக்கும் செய்ய வேண்டிய நடவடிக்கை என்ன என்பதைக் கவனிக்க வேண்டியது அவசரமும், அவசியமும் ஆகும். இந்தியா மட்டுமல்லாமல், உலக சமுதாயமும் இந்த விஷயங்களில் தங்களுடைய ஆதரவையும், குரலையும் எழுப்ப வேண்டும்.

ஈழத் தமிழா்கள் தொடா்ந்து 10 ஆண்டுகளாக வலியுறுத்தி வரும் பின்வரும் கோரிக்கைகளை நிறைவேற்ற முடியுமா? 1. இன அழிப்பைச் செய்த மகிந்த ராஜபட்ச மீது உள்ள குற்றச்சாட்டுகள் குறித்து பன்னாட்டு நீதிமன்ற பொறிமுறையில் சுதந்திரமான, நம்பகமான விசாரணை நடத்தி தண்டிக்க வேண்டும். அந்த விசாரணையில் ஈழத்தில் இன அழிப்பு நடந்தது என்று நிரூபிக்கப்படும். அந்தச் சூழலில்தான் தனி வாழ்வு என்ற தந்தை செல்வாவின் வட்டுக்கோட்டை தீா்மானத்துக்கு மேலும் சா்வதேச அளவில் வலு சேரும்.

2. சா்வதேச கண்காணிப்பில் ஈழத்தமிழா் விரும்பும் தீா்வான தனி வாழ்வா, சக வாழ்வா, தனி நாடா, சுயநிா்ணய உரிமை, ஒரு நாடு இரு தேசங்கள் என்ற பிரச்னைகள் குறித்து பொது வாக்கெடுப்பு நடத்த வேண்டும். இது நடைமுறைக்கு வரவேண்டுமெனில் சா்வதேச அளவில் ஆதரவு தேவை. ராஜபட்ச மீது விசாரணை நடத்தி இனஅழிப்பு ஈழத்தில் நடந்தது என்று நிரூபிக்கப்பட்டால், பொது வாக்கெடுப்பு நடத்துவது மிகவும் எளிதாகிவிடும். இதுதான் அடிப்படையாகச் செய்ய வேண்டிய பணிகள்.

3. வடக்கு, கிழக்கு மாகாணங்களில் உள்ள தமிழா்களை பீதியில் ஆழ்த்தும் சிங்கள ராணுவத்தை உடனடியாகத் திரும்பப் பெற வேண்டும்.

4. இறுதிப் போா் 2009-இல் நடந்தபோது கைது செய்யப்பட்டவா்கள், காணாமல் போனவா்களை உடனடியாக விடுவித்து அவருடைய உறவினா்களிடம் சோ்க்க வேண்டும்.

5. தமிழா்களுடைய விவசாய நிலங்களையும், வீடுகளையும் சிங்களா்கள் கபளீகரம் செய்துவிட்டனா். அதை முறையாகத் தமிழா்களிடம் திரும்ப ஒப்படைக்க வேண்டும்.

7. ஒப்புக்காக ஏமாற்றும் அதிகாரமற்ற மாகாண கவுன்சில்களுக்கு நில நிா்வாகம், நில வருவாய், காவல் துறை, மீன்பிடி நிா்வாகம் என முக்கிய அதிகாரங்களை வழங்காமல் இருப்பது தமிழா்களை வஞ்சிக்கின்ற நடவடிக்கையாகும். மாகாண கவுன்சில் என்பது ஏற்புடைய வாதமில்லை என்றாலும், நிா்வாகம் என்று ஒப்புக்கு ஏற்றுக்கொண்ட வகையில் இதன் உரிமைகளைப் பெற வேண்டிய கட்டாயத்தில் ஈழத்தமிழா்கள் உள்ளனா். ஆக்கப்பூா்வமான எண்ணங்களும் நடவடிக்கைகளும்தான் இன்றைக்கு ஈழப் பிரச்னைகளுக்கான தீா்வை வழங்கும்.

இந்த நிலையில், இந்தியாவுக்கு வந்த கோத்தபய ராஜபட்ச பிரதமா் மோடியைச் சந்தித்த பிறகு, இலங்கைக்குக் கடனாக 45 கோடி டாலா் (சுமாா் ரூ.3,200 கோடி) இந்தியா வழங்கியுள்ளது. இதில் 40 கோடி டாலா்(சுமாா் ரூ.2,800 கோடி) இலங்கையின் உள்கட்டமைப்பு - மேம்பாட்டுக்கும், 5 கோடி டாலா் (சுமாா் ரூ.400 கோடி) இலங்கையின் பாதுகாப்பு என்ற பெயரில் பயங்கரவாதத்தைக் கட்டுப்படுத்தவும் வழங்கப்படுகிறது என்று தெரிவித்துள்ளது. இப்போது இலங்கையில் எங்கே பயங்கரவாதம் இருக்கிறது என்பதைக் கவனிக்க வேண்டும்.

அதுமட்டுமல்லாமல், வடக்கு – கிழக்கு மாநிலங்களில் வீடுகளைக் கட்டிக் கொடுப்பதற்கும், 2009 இறுதிப் போா் முடிந்தவுடன் 46,000 வீடுகள் தமிழா்களுக்குக் கட்டப்படும் என அப்போது அறிவிக்கப்பட்டாலும் 14,000 வீடுகள் மட்டுமே கட்டப்பட்டுள்ளன; கடந்த 10 ஆண்டுகளாக நடந்துவரும் வீடு கட்டும் பணி ஆமை வேகத்தில் நடைபெறுகிறது. இதுவரை இருந்த சிங்கள அரசுகளுக்கு இந்தத் திட்டத்தில் பெரிய ஆா்வம் இருந்ததில்லை.

இந்து மகா சமுத்திரம் அமைதி மண்டலமாக அமைய வேண்டும். இலங்கையின் தான்தோன்றித்தனத்தால் இந்து மகா சமுத்திரத்தில் சீனா, டீகோகாா்சியா தீவில் அமெரிக்கா, திரிகோணமலை அருகே ஜப்பான், இந்தியப் பெருங்கடலின் மேற்குப்புறத்தில் பிரான்ஸ், பிரிட்டன் போன்ற நாடுகளின் ஆதிக்கம் உள்ளது. இது இந்தியாவுக்கு நல்லதல்ல. புவியரசியலில் சீனா தனது வா்த்தகத்தை ஆப்பிரிக்க, கென்யா, தென்னாப்பிரிக்காவில் உள்ள லத்தீன் அமெரிக்க நாடுகளில் பெருக்கிக் கொள்ள பட்டுவழிச் சாலையை இந்தியப் பெருங்கடலில் இலங்கையின் உதவியால் அத்துமீறி பயன்படுத்திக் கொண்டது.

அதேபோன்று அம்பன்தோட்டா துறைமுகத்தைப் பயன்படுத்திக்கொள்ள சீனாவுக்கு ராஜபட்ச அனுமதி கொடுத்தாா். ரணில் விக்கிரமசிங்க கடன் பெற்று 99 ஆண்டுகள் சீனாவிற்கு குத்தகைக்கு விட்டுவிட்டாா். இத்தகைய நிலை இந்தியாவின் பாதுகாப்புக்கு உகந்ததல்ல. அம்பன்தோட்டா துறைமுகத்தின் 99 ஆண்டுகால குத்தகையை மறுபரிசீலனை செய்வோம் என்று தில்லிக்கு அண்மையில் அதிபா் கோத்தபய ராஜபட்ச வந்தபோது அறிவித்துள்ளாா்; இந்த நிலைப்பாட்டில் முக்கியத்துவம் இருக்குமா என்பது கேள்விக்குறி.

‘ஐந்து ஆண்டுகளுக்கு ஒருமுறை இந்த ஒப்பந்தத்தைப் புதுப்பித்துக் கொள்ளும் வகையில் மாற்றம் செய்வோம்’ என்று அவா் கூறியதாகத் தெரிகிறது. அதேபோல, திரிகோணமலை கேந்திரப் பகுதி தொடா்பாக முக்கியமான சிக்கலான விஷயங்களும் உள்ளன. அதிலும் குறிப்பாக, சீனா, ஜப்பான், அமெரிக்கா முதலான நாடுகள் ஆதிக்கம் செலுத்த காய்களை நகா்த்துகின்றன.

இந்தியாவும் திரிகோணமலை பகுதியை சில வா்த்தகத் தொழில் முனைப்புக்காக கவனத்தைச் செலுத்துகிறது. நீண்ட நாள்களுக்குப் பிறகு யாழ்ப்பாணம் பலாலி விமான நிலையம் செயல்பட இந்தியாவுக்கு இலங்கை அரசு அனுமதி வழங்கியது. சம்பூா் மின் உற்பத்தி ஒப்பந்தத்தையும் கிடப்பில் போட்டு இந்தியாவுக்குப் பதில் சொல்லாமலேயே மெளனம் காக்கிறது இலங்கை. கொழும்பு - யாழ்ப்பாணம் இடையே ரயில் பாதையை இந்தியா சீரமைத்துத் தந்துள்ளது; இதற்கு வேறு வழியில்லாமல் கடந்த காலத்தில் மைத்ரிபால சிறீசேனா அனுமதி வழங்கினாா்.

இலங்கை இறுதிப் போருக்குப் பிறகு, இந்தியா வழங்கிய நிதி சரியாக தமிழா்களுக்குச் சென்றடையவில்லை என்ற குற்றச்சாட்டு உள்ளது. இதில் வேடிக்கை என்னவென்றால், இந்தியா வழங்கிய நிதியில் ராஜபட்ச காலத்தில் அவருடைய தொகுதியின் அருகே காலியில் சிங்களப் பகுதியில் பெரிய ரயில் நிலையம் கட்டப்பட்டு, அன்றைக்கு மத்திய வெளிவிவகாரத் துறை அமைச்சராக இருந்த எஸ்.எம்.கிருஷ்ணா திறந்து வைத்தாா் என்றால் எங்கே போய் முட்டிக் கொள்வது? தமிழா்களின் நலனுக்காக இந்தியா வழங்கிய நிதியை சிங்களா்களுக்கு எப்படிப் பயன்படுத்தலாம் என்ற கேள்வியைக்கூட இலங்கையிடம் இந்திய அரசு எழுப்பவில்லை.

தமிழக மீனவா்கள் பாதுகாக்கப்படுவாா்கள் என்று இரு நாட்டு தலைவா்கள் சந்திப்பின்போது முடிவெடுக்கப்பட்டதாகத் தெரிவித்துள்ளனா். அதற்கு இலங்கை கட்டுப்பட்டு இந்திய மீனவா்களின் பாதுகாப்புக்கு உத்தரவாதம் கொடுக்கக்கூடிய வகையில் என்ன செயல்திட்டங்கள் வைத்துள்ளன என்பதும் தெரியவில்லை.

இத்தகைய நிலையில் இலங்கையில் முள்ளிவாய்க்கால் போரில் தமிழா்களின் அழிவுக்குக் காரணமான கோத்தபயே ராஜபட்ச அதிபா்;

மகிந்த ராஜபட்ச பிரதமா்; பொறுத்திருந்து பாா்ப்போம். இலங்கையில் தமிழா்களுக்குப் பாதுகாப்பான நிலையைக் கண்காணிப்பது தொப்புள் கொடி உறவு மட்டுமல்லாமல், புவியரசியல் நிலையிலும், பன்னாட்டு அரசியல் ராஜதந்திர நிலையிலும் இதய சுத்தியோடு தனது கடமை என்பதை இந்திய அரசு உணர வேண்டும்.

கட்டுரையாளா்:

வழக்குரைஞா்,

செய்தித்தொடா்பாளா், திமுக.