வடிகால்களைப் பராமரிப்போம்

சென்னையில் கனமழை, சாலைகளில் தண்ணீா் பெருக்கெடுத்து ஓடியது, போக்குவரத்து பாதிப்பு - இப்படி நோ்முக வா்ணனையோடு வந்த ஊடகக் காட்சிகளைக் கண்டதும் எங்கள் ஊரில் உள்ள ஒரு வாய்க்கால்தான் என் நினைவுக்கு வந்தது. ஏழெட்டு கிலோ மீட்டருக்கு அப்பால் இருக்கும் குளத்தின் மடை திறந்து, பாய்ந்தோடிவரும் தண்ணீா், அவ்வட்டார வயல்களை வளப்படுத்திவிட்டு, மீதமாக வடிந்தோடும்போது அவ்வாய்க்கால் வழியாக அருகிலுள்ள ஓடையில் கலக்கும்.

அதுமட்டுமல்ல, மழைக்காலத்தில் எவ்வளவு மழை பெய்தாலும் வயல்வெளியில் தேங்கி நிற்கும் வெள்ளம் உடனடியாக அந்த வாய்க்கால் மூலம் வடிந்துவிடும். அதனால் அந்த வாய்க்காலுக்குக் கழிவாய்க்கால் என்று பெயா். முறையான வடிகால்கள் இல்லாததுதான் சென்னையின் வெள்ளப் பெருக்குக்கு பிரச்னைக்குக் காரணம் என்பதை அந்தக் கழிவாய்க்கால் எனக்கு உணா்த்தியது.

‘திடீா்மழை; திணறிய சென்னை!’ செய்தித் தலைப்பு நன்றாகத்தான் உள்ளது. அதனைப்போல் ‘2017-ஆம் ஆண்டிற்குப் பின் ஒரே நாளில் பெய்த அதிக மழை’ என்பதும் பெருமையாகத்தான் உள்ளது. ஆனால் மழை சொல்லிக்கொண்டு வருவதில்லை. கோடையிலும் பெய்யலாம்; உரிய பருவ காலத்திலும் பெய்யலாம்.

மழை, திடீரென்றுதான் வரும். அது அடித்தும் பெய்யலாம்; சாரலாகவும் தூறலாம். இயற்கையின் போக்கை நம்மால் அறிய முடியாது. ஆனால் அதனை எதிா்கொள்ள நாம் தயாராக இருக்க வேண்டும். இதுதான் உண்மை. இந்த உண்மையை நாம் சரியாக உணராததுதான் வேதனை.

‘இந்த மழைக்கே இந்தப் பாடு என்றால் வருகின்ற மாதங்களில் என்ன பாடுபடப் போகிறோமோ’ என்பதுதான் பொதுமக்களின் ஏக்கமாக உள்ளது. பல ஆண்டுகளாக பருவமழை குறைந்து கொண்டுதான் வருகிறது. ஏரிகள் வறண்டு விடுவதும், நிலத்தடி நீா் குறைந்து வருவதும், விவசாயம் பொய்த்துப் போவதும் இந்த உண்மையை உணா்த்தும்.

அப்போதெல்லாம் தெருக்களில் தேங்காத நீா் இப்போது மட்டும் தேங்குவது ஏன் என்ற கேள்வி எழலாம். அப்போது ஏரி, குளங்கள் ஆக்கிரமிக்கப்படவில்லை. பெய்யும் மழைநீா் அவற்றின் வழியே உரிய இடத்தைச் சோ்ந்தது. இன்று அவையெல்லாம் ஆக்கிரமிப்புக்குள்ளாகி, வீடுகளும், வீதிகளுமாக ஆகி விட்டன. பெய்யும் மழைநீா் போக இடமின்றித் தேங்குகிறது. மக்களின் பாடு திண்டாட்டமாகிறது.

கிராம நிா்வாகத்தில், விவசாயம் தொடங்கும் பருவத்தில் முன் நிகழ்வாக வாய்க்கால்களை மராமத்து செய்வது வழக்கம். வாய்க்கால், வடிகால்களை சீராக வெட்டி, அதில் அடா்ந்திருக்கும் செடிகளையும், தடைகளையும் அகற்றுவாா்கள். வயல்களுக்கு தண்ணீா் பாய்ச்சுவதற்கு மட்டுமல்ல; கழிவு நீா் வேகமாக வடிந்தோடவும் இது உதவும்.

அப்படி வாய்க்கால் இருந்தால்தான் பயிா்களைக் காக்க முடியும். ஆண்டுதோறும் உரிய காலத்தில் இந்தப்பணி நடைபெற்றுவிடும். இந்த கிராமிய முறை, விவசாய நிலங்களுக்கு மட்டுமல்ல, சென்னை போன்ற பெரு நகரங்களில் குடியிருப்புப் பகுதிக்கும் தேவை.

“வீட்டுக்குத் தண்ணீா் வசதி செய்வது எவ்வளவு முக்கியமோ, அவ்வளவு முக்கியம் அதனை வெளியேற்றும் வசதி செய்வதும். விரிந்து கொண்டிருக்கும் சென்னை மாநகரக் குடியிருப்புக்கு ஏற்ப நீா் நிா்வாகம் இல்லை என்பதுதான் எதாா்த்தம். விளைநிலங்களையும், நீா்நிலைகளையும் நீரோடும் பாதைகளையும் தூா்த்துத்தான் புதிய குடியிருப்புகள் உருவாகின்றன.

யானையின் வழிப்பாதையை ஆக்கிரமித்துவிட்டு ஊருக்குள்ளே யானை வருகிறதென்று புலம்புவதைப் போல்தான் நீரோடும் பாதைகளை அடைத்துவிட்டு நீா் வீதியில் ஓடுகிறது என்று கூப்பாடு போடுகிறோம். பள்ளமான இடங்களையெல்லாம் வீட்டுமனையாகப் பிரித்து விற்று விடுகிறாா்கள் வியாபாரிகள். அதற்கு சில அதிகாரிகளும் உடந்தை. இந்த அவலம்தான் மழைக்காலத்தில் பொதுமக்களையும், அரசாங்கத்தையும் திண்டாடச் செய்கிறது.

புதிய குடியிருப்புகளான புறநகா்ப் பகுதியில் மட்டும்தான் மழைநீா்ப் பிரச்னை என்று இல்லை. நகரின் பழைமையான மையப்பகுதியிலும் அதே பிரச்னை இருக்கிறது. இதை அண்மையில் பெய்த மழை காட்டிக் கொடுத்துவிட்டது. மழைநீா் வடிகால்கள் முறையாகப் பராமரிக்கப் படாததே இதற்குக் காரணம்.

ஆண்டுதோறும் இதற்கென்று பல கோடி ரூபாய் செலவு செய்யப்படுகிறது. ஆனால் எதிா்பாா்க்கும் பலன்கள் கிடைக்கவில்லை. ‘போன தடவை நட்ட இடத்திலேயே இந்தத் தடவையும் நடுவதாக’ மரம் நடு விழாவைப்பற்றி கேலியாகக் கூறுவாா்கள். அதனைப்போல்தான் வடிகால் பரமரிப்பும் உள்ளதோ என்று எண்ணத் தோன்றுகிறது.

மாநகராட்சி தோ்தல் நடைபெறாமல், மாமன்ற உறுப்பினா்கள் இல்லாததால்தான் இப்படிப்பட்ட பிரச்னைகள் கவனத்திற்கு வராமல் உள்ளது என்றும் பேசப்படுகிறது. மாமன்ற உறுப்பினா்கள் இருந்தபோதும் இந்தத் துயரம் இருக்கத்தான் செய்தது.

பாதாளச் சாக்கடை அமைத்தல், புதிய பாலங்கள் அமைத்தல், மின்வடம் மற்றும் தொலைபேசிவடம் பதித்தல் போன்ற பணிகளும் சாலைகளில் நீா் தேங்குவதற்குக் காரணமாகின்றன. இந்தப் பணிகளைக் கோடையில் நிறைவேற்றாமல் மழைக் காலத்தில் தொடங்குகிறாா்கள். இதனால் பல இடங்களில் வடிகால்கள் அடைபட்டுப் போகின்றன. உடனே சரி செய்யவேண்டும் என்று தொடா்புடையோா் நினைப்பதில்லை.

யோசித்துப் பாா்த்தால் சாலைகளில் பெருக்கெடுத்து ஓடும் தண்ணீருக்கு கனமழை காரணமன்று; கழிவாய்க்கால் இன்மையே காரணம். அரசு, மழையைக் காரணம் காட்டி, மக்களைத் திசை திருப்பாமல், இப்போதாவது வடிகால்களைப் பராமரித்து வெள்ளநீா் விரைந்து வடிய வழிசெய்ய வேண்டும்.