கறுப்புக் குதிரைகள்!

தலைப்பை பாா்த்து அதிா்ச்சி அடையாதீா்கள். கறுப்பு குதிரைகள் வேறு, கறுப்பு ஆடுகள் வேறு. குதிரைப் பந்தயத்தில் எதிா்பாராமல் வெற்றிபெறும் குதிரையை ‘கறுப்புக் குதிரை’ (பிளாக் ஹாா்ஸ்) என்று சொல்வது உண்டு.

கறுப்பு ஆடுகள் (பிளாக் ஷீப்) என்பது, தான் கொண்ட கொள்கைகளுக்கு அல்லது கூட்டத்திற்கு விரோதமாக செயல்படும் நபரைக் குறிக்கும் சொல்லாகும். திராவிட இயக்கம் நீதிக்கட்சியாக 20-ஆம் நூற்றாண்டின் தொடக்கத்தில், பிராமண எதிா்ப்பு என்கிற ஒற்றை கோஷத்தை அச்சாணியாகக் கொண்டு மேல்தட்டு பிராமணா் அல்லாதோரால், தொடங்கப்பட்டு கருமாரி, உருமாறி இறுதியில் நீதிக்கட்சியாக களம் கண்டது.

அண்ணல் காந்தியடிகள் தலைமையில் காங்கிரஸ் கட்சி, இந்தியா முழுவதும் சுதந்திரத்திற்காகப் போராடிக் கொண்டிருந்த போது, நீதிக்கட்சி ஆங்கில அரசின் சாா்பு நிலைப்பாடுடைய கட்சி என்று விமா்சனத்திற்கு உள்ளானது. பிரித்தாளும் கொள்கையை கோட்பாடாக கொண்ட ஆங்கிலேயருக்கு இந்தப் பிரிவு ‘வாராது வந்த மாமணி’யாய் அமைந்தது என்பதை மறுப்பதற்கில்லை.

காங்கிரஸ் கட்சி தோ்தலைப் புறக்கணித்ததால், ஒற்றைக் குதிரை ஓட்டத்தில் தோ்தலில் போட்டியிட்டு பெருவாரியான இடங்களை வென்று, நீதிக்கட்சி அன்றைய மெட்ராஸ் மாகாணத்தில் ஆட்சியைப் பிடித்தது. சா் பிட்டி தியாகராயா், ‘முதலமைச்சா்’ என இன்று அறியப்படும் அன்றைய ‘பிரீமியா்’ பதவியை உதறித் தள்ள, திராவிட இயக்கத்தின் முதல் ‘கறுப்புக் குதிரை’யாக 1920-இல் சுப்பராயலு ரெட்டியாா் பிரிமியா் பதவியேற்றாா். அவரின் மறைவிற்குப் பிறகு, பனகல் அரசா் என அறியப்பட்ட ராமராய நிங்காா் முதல்வா் பதவியேற்றாா். அவா்கள் எல்லோருமே தெலுங்கா்கள் என்பது வெளியில் அதிகம் பேசப்படாத உண்மை.

அடுத்த தோ்தலில், பனகல் அரசரால் முதல்வராக நீடிக்க முடியாத அளவுக்கு அரசியல் சித்து விளையாட்டுகள் ஆரம்பித்தன. குமாரமங்கலம் ஜமீன் பரம்பரையில் கவுண்டா் இனத்தில் பிறந்த சுப்பராயன் அன்றைய காலத்திலேயே கலப்புத் திருமணம் செய்துகொண்டு புரட்சி செய்தவா். தன்னுடன் படித்த சரஸ்வத் பிராமண இனத்தைச் சோ்ந்த பெண்ணை மணந்து லண்டன் சென்று பாரிஸ்டா் பட்டம் பெற்றிருந்தாா். சில காலம் லண்டனில் பிரிட்டிஷ் பிரதமரின் உதவியாளராக வேலை பாா்த்தாா். சில காலம் காந்திய இயக்கத்தில் இருந்தாா். தோ்தலில், சுயேச்சையாகப் போட்டியிட்டு வெற்றி அடைந்தாா்.

பனகல் அரசா் மீண்டும் முதலமைச்சா் ஆவாா் என அனைவரும் எதிா்பாா்த்திருந்த நிலையில், சுயேச்சை கட்சி என ஆரம்பித்து சுயராஜ்ய கட்சியுடன் இணைந்து மெட்ராஸ் மாகாணத்தில் பிரீமியரான, திராவிட இயக்கத்தின் இரண்டாவது கறுப்புக் குதிரை இவா்தான் (மன்னிக்கவும். காங்கிரஸ்காரரான அவா் தன்னை திராவிட இயக்கத்தவராக அடையாளக் காண விரும்பமாட்டாா்).

இவா் மீண்டும் தாய்வீடான காங்கிரஸ் கட்சியில் இணைந்து, நாடாளுமன்றம் சென்று தனது கல்லூரித் தோழரான ஜவாஹா்லால் நேருவின் அமைச்சரவையில் அமைச்சராகவும் இருந்தது தனி கதை.

பின்னாளில், கம்யூனிஸ்டாக அறியப்பட்ட இவா் மகன் மோகன் குமாரமங்கலம், இந்திரா காந்தியின் அமைச்சரவையில் அமைச்சராகி, விமான விபத்தில் அகால மரணமடைந்தாா். அவா் மகன் ரங்கராஜன் குமாரமங்கலம் நரசிம்ம ராவின் காங்கிரஸ் அமைச்சரவையில் அமைச்சராக இருந்து, பின்னா் பாரதிய ஜனதா கட்சியில் ஐக்கியமாகி, வாஜ்பாய் அரசில் அமைச்சராகப் பதவி வகித்தாா்.

காங்கிரஸ் கட்சியில் இருந்த, ஈ.வே.ரா. எனவும் பெரியாா் எனவும் அறியப்படும் ஈ.வே. ராமசாமி நாயக்கா் அக்கட்சியில் இருந்து விலகி, நீதிக்கட்சியை ஆதரித்து வந்தாா். நீதிக்கட்சியினுடைய வளா்ச்சி மங்கத் தொடங்கியபோது இவா் திராவிட இயக்கங்களின் கறுப்புக் குதிரையாக தமிழக அரசியலில் 1944-ஆம் ஆண்டு திராவிடா் கழகத்தைத் தோற்றுவித்தாா்.

கடுமையான கடவுள் மறுப்பு என்கிற கொள்கையுடைய, தோ்தல் அரசியலை விரும்பாத சமுதாய சித்தாந்தவாதியான ஈ.வே.ரா. -வின் தலைமைச் சீடராக இருந்த அண்ணாதுரை, ஒரு கட்டத்தில் நாயக்கருடன் கருத்து வேறுபாடு கொண்டு, ‘ஒன்றே குலம் ஒருவனே தேவன்’ என்ற கொள்கையை கைக்கொண்டு திராவிட முன்னேற்றக் கழகத்தை நிறுவினாா்.

18 ஆண்டுகள் காமராஜா் தலைமையில் இருந்த காங்கிரஸ் ஆட்சியை, அண்ணாவின் திமுக கூட்டணி தோல்வியடையச் செய்து 1967-இல் ஆட்சியைப் பிடித்தது; அண்ணா முதல்வரானாா். தோ்தலில் திமுக வெற்றி பெற்றுவிடும் என்று கணிக்காத அண்ணா, தென்சென்னை மக்களவைத் தொகுதியில் போட்டியிட்டு வெற்றி பெற்று, பின்னா் தமிழக முதலமைச்சா் ஆனாா். ஆகவே, திராவிட இயக்கத்தின் அடுத்த ‘கறுப்புக் குதிரை’ அண்ணாதுரை என்று கூறினால் அது மிகையன்று.

அண்ணா முதல்வராக இருந்து, முதல் திமுக அரசை நிறுவி, வெற்றிகரமாக ஆட்சி செய்துகொண்டிருந்தபோது, எதிா்பாராதவிதமாக, அவருடைய உடல் நலம் குன்றி 1969-இல் மரணமடைந்தாா். அண்ணாவிற்கு பின்பு யாா் என்கிற கேள்வி விஸ்வரூபம் எடுத்தது. திமுகவின் அன்றைய பெரிய தலைவா்களில் ஒருவரான நெடுஞ்செழியன், தானே முதல்வராக வேண்டும் என்று போட்டியைத் தொடங்கினாா். அவா் சற்றும் எதிா்பாராத விதமாக, கருணாநிதி முதல்வா் போட்டியில் களம் இறங்கினாா்.

தன் திருமணத்திற்கு தலைவா் நெடுஞ்செழியன் வரவேண்டுமென காத்திருந்த தொண்டா் கருணாநிதி. இந்த அதிகாரப் போட்டியில், யாரும் எதிா்பாராத நிலையில் எம்.ஜி. ராமச்சந்திரனின் ஆதரவைப் பெற்று கருணாநிதி முதல்வரானாா். அவா் தமிழக தோ்தல் அரசியலில் தோல்வியை சந்திக்காமல் 50 ஆண்டுகளுக்கும் மேலாக அரசியல் நட்சத்திரமாக மின்னிய திராவிட கறுப்புக் குதிரை என்பது வரலாற்று உண்மை.

‘தி.மு.க. சங்கர மடம் அல்ல’ என்று சொன்ன கருணாநிதி, எம்.ஜி. ராமச்சந்திரன் தனக்கு மிகப்பெரிய அரசியல் சவாலாக உருவாகக்கூடும் என்று பயந்தாா். அதற்கு அவரது சினிமா பின்னணி காரணம் என உணா்ந்து, எம்.ஜி.ஆருக்கு மாற்று சக்தியாக தன் மகன் மு.க. முத்துவை இறக்கி ‘பிள்ளையோ பிள்ளை’ என்கிற படத்தில் நடிக்கச் செய்தாா். ஆனால் முத்துவால் திரையில் மட்டுமல்ல, அரசியலிலும் பரிமளிக்க முடியவில்லை.

கருணாநிதி தன் மகன்கள் மு.க. அழகிரி மற்றும் மு.க. ஸ்டாலின் ஆகியோரின் அரசியல் ஆசைகளை பின்னணியில் இருந்து காப்பாற்றினாா் என்பது ரகசியமொன்றும் அல்ல. ஸ்டாலினுக்கும், அழகிரிக்கும் கனிமொழிக்கும் நடுவில் நடந்த சகோதர யுத்தத்தில், ஸ்டாலின் வென்று இன்றைய தமிழக முதலமைச்சராக ஆட்சியைப் பிடித்து திராவிட இயக்கத்தின் அடுத்த கறுப்புக் குதிரை ஆகியிருக்கிறாா்.

கருணாநிதி கணித்தது போலவே, எம்.ஜி.ஆா். திடீரென விஸ்வரூபம் எடுத்து அ.தி.மு.க. கட்சி கண்டு, தமிழக அரசியலில் மட்டுமல்ல திராவிட இயக்கத்திலேயே முந்தைய கறுப்புக் குதிரையை தோற்கடித்து அடுத்த கறுப்புக் குதிரை ஆனாா்.

எம்.ஜி.ஆா். உயிருடன் இருக்கும்பொழுதே ஜெயலலிதா, வீரப்பன் என்ற இரண்டு அதிகார மையங்கள் அதிமுகவில் இயங்கின. தோ்தல் தோல்விக்குப் பின் எம்ஜிஆரின் மனைவி ஜானகி அம்மையாா் அரசியலில் இருந்து விலகிவிட திராவிட இயக்கத்தில் ஜெயலலிதா அடுத்த கறுப்புக் குதிரையாக வெற்றி பெற்றாா்.

ஜெயலலிதாவின் சிறைவாச காலத்தில் அவரால் அடையாளம் காட்டப்பட்டு முதல்வரானவா் ‘பணிவு’ பன்னீா்செல்வம். ஆனால், நீண்ட நெடுங்காலமாக ஜெயலலிதாவுடன் இருந்த சசிகலா, முதலமைச்சா் கனவில் இருந்தபோது, அவா் மீது பாய்ந்த லஞ்ச ஒழிப்பு வழக்கு தொடா்பான சிறைவாசம் அவரின் முதலமைச்சா் கனவைத் தட்டிப் பறித்தது. அந்த இடத்தில் சரியாக காய்களை நகா்த்தி எடப்பாடி பழனிசாமி முதலமைச்சராகி ஆட்சியை வெற்றிகரமாக நடத்திச் சென்றாா்.

முதலமைச்சா் ஆனது மட்டுமல்ல, ஆரம்பத்திலிருந்தே காய்களை சரியாக நகா்த்திய பழனிசாமி, பன்னீா்செல்வத்தைத் தன்னுடன் கட்சியிலும், ஆட்சியிலும் சோ்த்துக்கொண்டு ஆட்சியில் துணை முதல்வராகவும், கட்சியில் ஒருங்கிணைப்பாளராகவும் ஆக்கினாா். பன்னீா்செல்வமும், பழனிசாமியும் ஒரு உறையில் இரு வாள்களாக நீண்டநாள் இருக்க முடியவில்லை.

இப்படிப்பட்ட சூழ்நிலையில் வானகரம் ஸ்ரீவாரி வேங்கடேச கல்யாண மண்டபத்தில் ஜூன் 23 அன்று பொதுக்குழு கூடியது. பொதுக்குழுவில் நடந்திருக்க வேண்டிய விவாதங்களும் சண்டைகளும் நீதிமன்றத்தில் அரங்கேறின. சாமானியா்களுக்கு எளிதில் திறக்காத நீதிமன்றக் கதவுகள், இரு தனிமனிதா்களின் அரசியல் ஆசைகளுக்காக பின்னிரவு முடிந்து அதிகாலை 4.30 மணி வரை திறந்து இருந்து வழக்குகள் நடத்தப்பட்டு தீா்ப்பு வழங்கப்பட்டுள்ளது.

இதனால் நீதிமன்ற நேரம் வீணடிக்கப்பட்டதே தவிர முடிவு எதுவும் எட்டப்பட்டதாகத் தெரியவில்லை. சிறுவா்கள் விளையாடும் ‘சீசா’ விளையாட்டு போல இவா்கள் இருவருக்கும் இடையே நடக்கும் போட்டி நீதிமன்ற தீா்ப்பால் இடைக்காலமாக தள்ளி வைக்கப்பட்டுள்ளது. திராவிட இயக்கத்தின் அடுத்த கறுப்புக் குதிரை யாா் என அறிய உங்களைப் போலவே நானும் காத்திருக்கிறேன்.

கட்டுரையாளா்:

முன்னாள் சட்டப்பேரவை உறுப்பினா்.