கலைஞா்களின் வாழ்க்கையில்...

ினிமா பிரபலங்கள் விவாகரத்து செய்வது மிக மிக முக்கியமான செய்தியா? முன்பெல்லாம் இது போன்ற செய்திகள் செய்தித்தாளில் ஒரு சிறிய இடத்தைப் பிடித்திருக்கும். அவ்வளவே. அதற்கு மேல் அச்செய்திக்கு எந்த முக்கியத்துவமும் கொடுக்கப்பட்டதில்லை. ஆனால், தற்போது முகநூல் மற்றும் யூடியூப் சேனல்கள் இப்படிப்பட்ட செய்திகளை நம்பியே பிழைப்பை ஓட்டுகின்றன. ஒரு குறிப்பிட்ட இணையா் விவாகரத்து செய்யவிருப்பதாகப் பதிவு போட்டுக் கொண்டே இருக்கிறாா்கள். ஆனால், அவா்கள் மகிழ்ச்சியாக வாழ்ந்து கொண்டிருக்கிறாா்கள்.

இவா்களாக ஒரு பூதத்தைக் கிளப்பிவிட்டு, காத்திருக்கிறாா்கள். வெட்டியான்கள்கூட குழியை வெட்டி வைத்துக் கொண்டு காத்திருப்பதில்லை. ஒரு திரைப் பிரபலம் விவாகரத்து செய்கிறாா் என்றால் அது அவரது சொந்த விருப்பு, வெறுப்பு சாா்ந்த விஷயம். ஏன் அது குறித்த காணொலிகளைப் பதிவிட்டுக் கொண்டே இருக்க வேண்டும்? பாா்வையாளா்களின் எண்ணிக்கை கூடக்கூட, அவா்களுக்கு வருமானம் கூடும். இதுதான் உண்மை.

ஒரு முன்னணி நடிகையைப் பற்றி, அவா் யாரை நேசிக்கிறாா்? என்ன செய்கிறாா்? எங்கே போகிறாா்? அவருடைய பழைய காதல்கள் என்னவாயிற்று? இந்த

ரீதியில் அவரைப் பற்றி பதிவிட்டுக் கொண்டே இருந்தாா்கள். கடைசியில் அவா் திருமணம் முடிவாயிற்று. பிறகு அது குறித்த செய்திகள் வந்துகொண்டே இருந்தன.

கலைஞா்களுக்கென ஒரு தனிப்பட்ட வாழ்க்கை இல்லையா? எல்லாம் பொதுவெளியில் அலசப்பட வேண்டுமா? அவரவா் வாழ்க்கையில் ஆயிரம் இருக்கும். பொதுவாழ்வில் இருப்பவா்களின் வாழ்க்கை, சமுதாயத்தைப் பாதிக்கும்போது விமா்சனம் செய்யலாம்; அது பற்றி செய்தி வெளியிடலாம். மற்றபடி நம் கை, எதிரில் இருப்பவரின் மூக்கில் படாமல் நாம் எட்ட நிற்க வேண்டும். அதுதான் நயத்தக்க நாகரிகம்.

ஒரு நடிகை கோயிலுக்குப் போனதெல்லாம் ஒரு காணொலி. நடிகைகள், நடிகா்கள் கடைக்குப் போக மாட்டாா்களா? கோயிலுக்குப் போக மாட்டாா்களா? குழந்தைகள் படிக்கும் பள்ளிக்குப் போக மாட்டாா்களா? எங்கு போனாலும் மக்களும் ஊடகமும் துரத்தினால் அவா்களுக்கு எரிச்சல் வராதா?

முன்பெல்லாம் பிரபலங்களைக் கண்டால் வியந்து பாா்த்துவிட்டு நகா்ந்துவிடுவா். ஆனால், தற்போது தற்படம் எடுக்கத் துடிக்கிறாா்கள். அவா்களுக்கு அது ஓா் ஆவணம். சிலா் இன்னும் கொஞ்சம் முன்னேறி தொட்டுப் பாா்க்கிறாா்கள். இதில் என்ன மகிழ்ச்சி கிட்டப் போகிறது? அந்தத் தொடுகை ஆயுள் முழுவதும் அப்படியே ஒட்டிக் கொண்டிருக்குமா?

திரையில் நடிப்பது அவா்களது தொழில். அவா்களது நடிப்பைப் பாராட்டிவிட்டு, நமது வேலையைப் பாா்க்க வேண்டும். ரசிகா்களின் அளவுக்கு மீறிய ஆராதனையால்தான் ஊடகங்கள் நடிகா்களைப் பற்றி எதையாவது பதிவிட்டுப் கொண்டே இருக்கிறாா்கள்.

ஊடகங்கள் விவகாரமான செய்திகளைத் தேடி அலைகின்றன. ஒரு நடிகை/நடிகரின் அந்தரங்க வாழ்க்கை இச்சமுதாயத்துக்குத் தேவையில்லாதது. எல்லோா் வாழ்க்கையிலும் ஒரு கதை இருக்கும்: கருப்பு பக்கம் இருக்கும்; வலி இருக்கும்; வேதனை இருக்கும். அதையெல்லாம் மறைத்து, மறந்து, புனா்வாழ்வு வாழ்ந்து கொண்டிருக்கும்போது, பழையதைக் கிண்டிக் கிளற வேண்டுமா? மேலும் இவா்கள் கொடுக்கும் தலைப்பு, பிள்ளைகளை உள்ளே போகத் தூண்டும். சில சமயம் தலைப்புக்கும் செய்திக்கும் சம்பந்தமே இருக்காது. தலைப்பு ஆா்வத்தைத் தூண்ட வேண்டும் அவ்வளவே.

நாட்டில் நடக்கும் நல்ல விஷயங்களைப் பதிவிட்டால், ஒரு சிறு அளவு சமுதாய மாற்றம் நிகழ வாய்ப்புண்டு.

திருமணமாகி பத்தோ, பதினைந்தோ ஆண்டுகள் ஆன பின்னும் கணவன், மனைவி நேசம் ஈரத்தோடு இருக்க வேண்டும். ஆரம்பக் காதல் ஏன் காலம் போகப் போக மாறிப்போகிறது? இந்த உலகில் ஒருவரை நேசிப்பதும், ஒருவரால் நேசிக்கப்படுவதும் ஒருவரை உயிா்ப்புடன் வைத்திருக்கும். நம்பிக்கை பொய்க்கும்போது, பிரிவு சம்பவிக்கிறது. விவாகரத்து கோரி நீதிமன்றத்தின் வாசலில் காத்திருப்போரின் வலி அதிகம். ஒவ்வொருவரின் வாழ்விலும் மற்றவா்கள் அறிந்து கொள்ளத் தேவையில்லாத பக்கங்கள் இருக்கும். ‘வெற்றி’ அவா்களுக்கு எளிதில் வசப்படவில்லை. பல்வேறு அவமானங்கள், வலிகள், ஏமாற்றங்கள், தோல்விகள் என அனைத்தையும் கடந்து வெற்றி பெற்றிருப்பாா்கள். அந்தக் கடந்த காலத்தைப் பூதக்கண்ணாடி கொண்டு பாா்த்து, ஊருக்கு அம்பலப்படுத்த வேண்டுமா? கடந்தவைகள் கடந்தவையாகவே இருக்கட்டும், இனி நடப்பவை நல்லனவாக இருக்கட்டும். ஆறிப்போன புண்ணை மீண்டும் குத்திக்கிழித்து, அந்த இடத்தை இரணமாக்கி நாம் மகிழ வேண்டுமா? அவா்களின் சொந்த வாழ்க்கை நமக்கெதற்கு?

ஒரு நடிகையைப் பற்றி முகநூலில் ஒரு செய்தி, திரும்பத் திரும்ப வந்து கொண்டே இருந்தது. ‘இவா் ஒருமுறை உடுத்திய ஆடையை மறுமுறை அணிய மாட்டாா்’. அது அவா்பாடு. இச்செய்தியால் யாருக்கு என்ன பயன்?

ஒரு நடிகா் அல்லது நடிகை தற்போது வயதானவராக இருப்பாா். ஆனால், அவரது இளமைக்காலம் பற்றிப் பதிவிட வேண்டிய அவசியம் என்ன? அதேபோல, மறைந்து போனவரின் வாழ்க்கை ரகசியங்கள் இப்போது ஏன் வெளிப்பட வேண்டும்? எல்லாவற்றையும் கூட இருந்தே பாா்த்தது போல ஒருவா் பேசுகிறாா். அந்த குறிப்பிட்ட நடிகா்/நடிகை மீது நாம் வைத்திருந்த அன்பு அல்லது மரியாதை அப்படியே அடுக்கி வைக்கப்பட்டிருந்த சீட்டுக்கட்டு சரிவது போல சரிந்துவிடுகிறது. எல்லோரையும் கிழித்துத் தொங்கவிடுவதில் அப்படி என்ன ஓா் அலாதி மகிழ்ச்சி?

அந்தக் காலத்தில் வார இதழ்கள் சிலவற்றில் நடிகா்கள், நடிகைகள் பற்றிய ‘கிசுகிசு’ வரும். பெயரை வெளிப்படையாகக் கூறாமல், ஏதாவது குறிப்பு கொடுத்து எழுதுவாா்கள். ‘அது யாராக இருக்கும்?’ என்று வாசகா்கள் மண்டையைப் பிய்த்துக் கொண்டு யோசிப்பாா்கள்.

இத்தகைய கிசுகிசுக்களால் பாதிக்கப்பட்டவா்கள் பலா். கிசுகிசுவை எழுதிய ஒருவா் கொலை செய்யப்பட்ட கதையும், அக்கொலை காரணமாக வாழ்க்கையில் சறுக்கி, தன்னிலை தாழ்ந்து போனவா் பற்றியும் முதியவா்கள் அறிவாா்கள்.

இதுவரை விவாகரத்து செய்தவா்கள் பட்டியல், அதற்கான காரணங்கள் என்று செய்தி போடுகிறாா்கள். தற்போது யாா் யாா் விவாகரத்து கோரி இருக்கிறாா்கள்? யாா் அடுத்து அந்த வரிசையில் வரப் போகிறாா்கள் என்று காணொலிகள் வந்து கொண்டே இருக்கின்றன. அண்மையில் ஓா் இணையா் குறித்து எவ்வளவு செய்திகள்! விவரங்கள்! அவா்கள் காதல் எப்படி ஆரம்பித்தது, வளா்ந்தது? அவா்கள் குழந்தை, அவா்களின் அன்பான வாழ்க்கைப் பதிவுகள், தற்போது ஏன் இந்தப் பிரிவு? யாா் காரணம்? யாா், யாா் அவா்களுக்கு அறிவுரை கூறினாா்கள்? இது என்ன தொடா்கதையா?

பல ஆண்டுகள் அன்னியோன்யமாக வாழ்ந்தவா்கள் பிரிகிறாா்கள் என்றால் அதற்கு ஒரு வலுவான காரணம் இருக்கும். அவா்களே உள்ளுக்குள் உடைந்து போயிருப்பாா்கள். இந்த நிலையில் அவா்களைப் பற்றி காணொலிகளைப் பதிவிட்டு ஆதாயம் தேடுவது முறையா? அதையும் நேரத்தை செலவழித்துக் கொண்டு பாா்ப்பவா்களை என்ன சொல்ல?

நமக்கு எப்போதும் பக்கத்து வீட்டு சண்டை அல்வா சாப்பிடுவது போல் இருக்கும். அறிதிறன்பேசி வைத்திருப்பவா்கள் இணையத்தின் மூலம் பல்வேறு அரிய தகவல்களைத் தெரிந்து கொள்ளலாம். ‘உலகம் நம் உள்ளங்கையில்’ என்று ஆகிவிட்டது. போட்டித் தோ்வுக்குப் படிப்பவா்கள் புத்தகத்தைத் தேடி அலையாமல் பாடங்களைக் கைப்பேசியிலேயே படித்துக்கொள்ளலாம். நமக்கு எந்த சந்தேகம் வந்தாலும் சட்டென இணையத்தில் தேடி எடுத்துக் கொள்கிறோம். கல்லூரிகளில் புரிந்து கொள்ள இயலாமல் விட்ட பகுதிகளை இப்போது தெளிவாகப் புரிந்து கொள்ளலாம். ஒரு மாணவன் அவ்வாறு கற்றுக் கொள்ள முனையும்போது, அவனது கவனத்தை மடைமாற்றம் செய்ய பல தேவையற்ற கவா்ச்சித் தலைப்புடன் காணொலிகளை வெளியிடுகிறாா்கள். மனக்கட்டுப்பாடு இல்லாதவா்கள் தங்கள் நேரத்தை விரயம் செய்கிறாா்கள்.

அத்தகைய காணொலி ஒன்றை தப்பித்தவறிப் பாா்த்துவிட்டால், அடுத்து அது போன்ற காணொலிகளே வந்து விழும். நாம் தேட வேண்டாம்; அவை நம்மைத் தேடி வரும். புதைகுழியில் விழுந்த கதை ஆகிவிடும். இதனால் மாணவா்களின் கவனக்குவிப்பு குறைந்து போய்விடுகிறது.

‘சினிமா’ என்பது வெறும் பொழுதுபோக்கு. பிற தொழில்களைப் போல, பிற வேலைகளைப் போல இதுவும் ஒரு தொழில்; ஒரு வேலை. அவா்களை அளவுக்கு

அதிகமாகக் கொண்டாடத் தேவையில்லை. ஒருவா் ஒரு திரைப்படத்தில் ஒரு சிறிய வேடத்தில் தலைகாட்டினாலே போதும், இந்த ஊடகவியலாா் அவரைப் பற்றி என்ன செய்தி கிடைக்கும் என்று தேடுவாா்கள்.

ஒரு பள்ளி மாணவி இறந்துவிட்டாள் என்ற செய்தி, பற்பல விதங்களில் வாதங்களாக, விவாதங்களாக, செய்திகளாக, காட்சிகளாக மாறி மாறி வெளிவருகிறது.

அதைப் பற்றி மீண்டும் மீண்டும் பேசிக் கொண்டே இருக்கிறாா்கள். அடுத்த பரபரப்பான செய்தி வந்தால் மட்டுமே முன்னது அடங்கிப்போகும். எந்த காலத்திலோ நடந்த கொலை வழக்குகளை இவா்கள் தூசி தட்டி எடுத்து பதிவிடுகிறாா்கள். இவை தேவையற்ற ஆணிகள்.

திரைப்பிரபலம் என்றாலும்கூட அவா்களுடைய சொந்த வாழ்க்கையில் ஏன் அநாவசிய வெளிச்சம்? யூகங்களின் அடிப்படையில் காணொலிகள் ஏன்? எப்படியாவது செய்தியை முந்தித்தர வேண்டும் என்ற போட்டி அதிகமாக உள்ளது.

ஒரு தரமான இலக்கிய உரை, நயமான பேச்சு, அறிவை வளா்க்கும் தகவல்கள் என பல பயனுள்ள பதிவுகளை ஓரம் கட்டிவிட்டு, ஊா்வம்பு பேசும் காணொலிகளுக்கு பாா்வையாளா்களை ஈா்க்கின்றனா். சலிப்பாக இருக்கிறது. சங்கடமாக இருக்கிறது. மக்களின் ரசனை மாறிப் போனதா? அப்படி இவா்கள் மாற்றுகிறாா்களா?

ஆனால், ஒன்று மட்டும் உண்மை. இந்தப் போக்கு சரி அல்ல. இது ஒரு மன நோய்.

ஒரு காணொலியைப் பதிவிடும் முன் இந்தச் செய்தி உண்மையா? இதனால் சமூகம் அடையப் போகும் நன்மை என்ன? இது அடுத்தவரின் சொந்த வாழ்க்கையில் அத்துமீறல் ஆகுமா? இது வெறும் அவதூறு பரப்பும், களங்கம் ஏற்படுத்தும் செய்தியா? நல்ல மனிதருக்கு மிகுந்த மன உளைச்சலை ஏற்படுத்திவிடுமா? என்ற பல்வேறு கோணங்களில் ஆராய்ந்து பதிவிட வேண்டும்.

கட்டுரையாளா்: பேராசிரியா்.