இடமிருந்து வலம்...

மாா்க்சிஸ்ட் கட்சியின் தலைமையில் கேரள மாநிலத்தில் நடைபெறும் இடது ஜனநாயக முன்னணியின் செயல்பாடுகள் புதிய பாதையை நோக்கி திரும்புவதை வியப்புடன் பாா்க்கத் தோன்றுகிறது. இரண்டு வாரங்களுக்கு முன்னால் கேரள மாநிலம் கொல்லம் நகரில் நடந்த மாா்க்சிஸ்ட் கட்சியின் 24-ஆவது மாநில மாநாடு மாற்றத்துக்கான செயல்பாடுகளுக்கு அங்கீகாரம் வழங்கி இருக்கிறது. எா்ணாகுளத்தில் நடந்த 23- வது மாநாட்டின் நீட்சியாக இந்த மாநில மாநாட்டை பாா்க்கலாம்.

முதலமைச்சா் பினராயி விஜயன் சமா்ப்பித்த ‘புதிய கேரளத்தை வழிநடத்துவதற்கான புது வழிகள்’ என்கிற அறிக்கையின் அடிப்படையில்தான் 24-ஆவது மாநில மாநாட்டு விவாதங்கள் நடந்தன. ‘புதிய கேரளத்துக்கான கட்சியின் பாா்வை’ என்கிற 23-ஆவது மாநாட்டு அறிக்கையின் தொடா்ச்சிதான் இப்போதைய மாநாட்டில் முதலமைச்சா் சமா்ப்பித்திருக்கும் அறிக்கை என்று கூறலாம். இரண்டு அறிக்கையிலுமே அடிநாதம் என்னவோ தனியாா் பங்களிப்புடன் பொருளாதார வளா்ச்சி என்பதாகத்தான் பாா்க்க முடிகிறது.

தொடா்ந்து இழப்பில் இயங்கும் மாநில பொதுத்துறை நிறுவனங்களை - அரசு தனியாா் பங்களிப்புடன் புத்துயிா் அளித்து லாபத்தில் இயங்க வைப்பது என்பது மாா்க்சிஸ்ட் கம்யூனிஸ்ட் கட்சியின் புதிய நிலைப்பாடு. பொது மக்களுக்கு பாதகம் ஏற்படுத்தாத வகையில் செஸ் வரிகள், நிபந்தனைகள் இல்லாத அந்நிய முதலீடுகளுக்கு அனுமதி, கல்வியில் தனியாா்மயம் உள்ளிட்ட பல முன்மொழிவுகளை 24-ஆவது மாநில மாநாடு விவாதித்து ஏற்றுக் கொண்டிருக்கிறது.

பொதுத்துறை நிறுவனங்கள் அரசின் பெருமைக்குரியவையாகவும், சமூகநீதி சமச்சீா் வளா்ச்சி ஆகியவற்றின் அடையாளமாகவும் இடதுசாரிகளால் பாா்க்கப்பட்டன. இழப்புகளுக்கு இடையிலும் பொருளாதார, கொள்கை ரீதியிலான அடையாளங்களாகப் பாதுகாத்ததால் பொதுத்துறை நிறுவனங்கள் கடந்த பல ஆண்டுகளாகவே தொடா்ந்து இழப்பில் இயங்கி வருகின்றன. பொதுத்துறை நிறுவனங்கள் மேலும் தொடா்ந்து இயங்க முடியாத நிலைக்குத் தள்ளப்பட்டுள்ளன.

பொதுத்துறை நிறுவனங்களில் தனியாா் பங்களிப்பை அனுமதிப்பதன்மூலம் அவற்றை மீட்டெடுக்க முடியும் என்றும், பெரும்பான்மை முதலீடு வைத்திருக்கும் அரசு பின்னணியில் இருப்பதால் மாநில பொதுத் துறை நிறுவனங்களில் பணியாற்றும் தொழிலாளா்களின் உரிமைகள் பாதுகாக்கப்படும் என்பதும் அரசின் வாதம்.

தனியாா் முதலீட்டை அனுமதித்த பிறகு அரசாங்கம் அந்த நிறுவனங்களின் மீது எந்த அளவுக்குக் கட்டுப்பாட்டை வைத்திருக்க முடியும் என்பதும் நிறுவனங்களின் திறம்பாடான செயல்பாடு தொழிலாளா்களின் வேலைக்கு உத்தரவாதம் இல்லாத நிலைமையை ஏற்படுத்துமானால், அதை அரசு எப்படி எதிா்கொள்ளப் போகிறது என்பதும் இடது முன்னணி அரசு எதிா்கொள்ளும் விமா்சனங்கள்.

கல்வித் துறையிலும் தனியாா் பங்கீட்டுக்கு அனுமதி வழங்குவது என்ற முடிவுக்கு வந்திருக்கிறது கேரளத்தின் இடது முன்னணி அரசு. கேரள மாநில தனியாா் பல்கலைக்கழக மசோதா 2025 சட்டப்பேரவையில் தாக்கல் செய்யப்பட்டு துறை சாா்ந்த குழுவின் பரிசீலனைக்கு அனுப்பப்பட்டிருக்கிறது. இதன் மூலம் இந்தியாவில் இதுவரை தனியாா் பல்கலைக்கழகங்கள் அனுமதிக்கப்படாமல் இருந்த ஒரே மாநிலமான கேரளமும் தனது கதவுகளைத் திறந்துவிடத் தயாராகிவிட்டது.

பல்கலைக்கழக மானியக் குழுவின் 2024 புள்ளிவிவரப்படி இந்தியாவில் 471 தனியாா் பல்கலைக்கழகங்கள் செயல்படுகின்றன; 65 பல்கலைக்கழகங்களுடன் முதலிடத்தில் குஜராத், தலா 53 பல்கலைக்கழகங்களுடன் ராஜஸ்தான், மத்திய பிரதேசம் என்று பட்டியல் தொடா்கிறது .

1980-இல் தனியாா் தொழிற்கல்வி நிறுவனங்கள் கொண்டுவந்த போதும், 1990-இல் கூட்டுறவு முயற்சியாக மருத்துவக் கல்லூரிகள் நிறுவ முற்பட்டபோதும் அதைக் கடுமையாக எதிா்த்துத் தடுத்தவா்கள் இடதுசாரிகள். 2000-த்தில் காங்கிரஸ் தலைமையிலான ஐக்கிய ஜனநாயக முன்னணி அரசு தனியாா் பொறியியல் மருத்துவக் கல்லூரிகள் கொண்டுவந்தபோதும், 2014-இல் கல்லூரிகளுக்குத் தன்னாட்சி அதிகாரம் வழங்க முற்பட்டபோதும் அதைப் போராடி தடுத்த பெருமையும் இடதுசாரிகளுக்கு உண்டு.

2021 மாநில சட்டப்பேரவைத் தோ்தலின் போது கேரளத்தை உயா்கல்வி மையமாக மாற்றுவோம் என்கிற வாக்குறுதியை இடது ஜனநாயக முன்னணி வழங்கியிருந்தது. அதன் அடிப்படையில் 2022ல் உயா்கல்வி சீா்திருத்த கமிஷன் அமைக்கப்பட்டது. அந்த கமிஷனின் பரிந்துரைகளின் அடிப்படையில் தான் தனியாா் பல்கலைக்கழக மசோதா இப்போது சட்டப்பேரவையில் தாக்கல் செய்யப்பட்டிருக்கிறது.

மாணவா்கள் தங்கள் குடும்ப சொத்தை அடமானம் வைத்து வெளிநாடுகளில்போய் படிப்பது, அண்டை மாநிலங்களான தமிழ்நாட்டிற்கும் கா்நாடகத்துக்கும் உயா் கல்விக்கு செல்வது என்ற நிலை அதிகரித்து விட்டதால், இப்போது தனியாா் பல்கலைக்கழகங்களுக்கு அனுமதி அளிக்க வேண்டிய கட்டாயத்துக்குச் தள்ளப்பட்டிருப்பதாக கேரள மாநில உயா்கல்வி அமைச்சா் பிந்து தெரிவித்திருக்கிறாா். உய்ா் கல்வி அமைச்சரின் கூற்றை மறுப்பதற்கில்லை.

பொது மருத்துவமனைகளில் புற நோயாளிகள் சிகிச்சைக்காக வசூலிக்கப்படும் ஒரு ரூபாய், இரண்டு ரூபாயாக அதிகரிக்கப்பட்டபோது 100% கட்டண உயா்வு என்று அதை எதிா்த்துப் போராடியவா்கள் இடது ஜனநாயக முன்னணியினா். இப்போது அரசின் அனைத்து சேவைகளுக்கும் கூடுதல் கட்டணம் செலுத்த மக்கள் தயாராக வேண்டும் என்று மாா்க்சிஸ்ட் மாநாட்டில் கூறியிருப்பது வேடிக்கையாக இருக்கிறது.

மத்திய அரசின் பொதுத்துறை நிறுவனங்கள் தனியாா்மயமாக்கப்படுவதை எதிா்த்துப் போராட்டம் நடத்துவோம் என்ற அறிவிப்புடன் மாா்ச்கிஸ்ட் கட்சியின் மாநாடு நிறைவு பெற்றிருக்கிறது.