மேற்கு வங்கம்: மம்தா உத்தரவின் பேரில் திரிணமூல் எம்எல்ஏ கைது

மேற்கு வங்க மாநிலம், தெற்கு 24 பர்கானாஸ் மாவட்டத்தில் உள்ள ஒரு கல்லூரியில் நடந்த மோதலில் தொடர்புடைய ஆளும் திரிணமூல் காங்கிரஸ் எம்எல்ஏ தீபக் ஹல்தரை கைது செய்யுமாறு முதல்வர் மம்தா பானர்ஜி உத்தரவிட்டார். அதன்படி, எம்எல்ஏ தீபக் ஹல்தரை போலீஸார் திங்கள்கிழமை கைது செய்தனர்.
 இதுகுறித்து போலீஸார் தெரிவித்ததாவது:
 தெற்கு 24 பர்கானாஸ் மாவட்டத்தில் உள்ள ஃபக்கீர்சந்த் கல்லூரியில் திரிணமூல் காங்கிரஸ் மாணவர் அணியின் இரண்டு பிரிவினருக்கு இடையே திங்கள்கிழமை மோதல் ஏற்பட்டது.
 ஒரு மணி நேரத்துக்கு மேல் நடைபெற்ற இந்த மோதலில் இரு தரப்பினரும் உருட்டுக்கட்டைகளால் தாக்கிக் கொண்டனர். இந்த மோதல் நடைபெற்றபோது, எம்எல்ஏ தீபக் ஹல்தர் சம்பவ இடத்தில் இருந்தார் என்று போலீஸார் தெரிவித்தனர்.
 இதுதொடர்பாக மாநில கல்வி அமைச்சர் பார்த்தா சாட்டர்ஜி செய்தியாளர்களிடம் கூறுகையில், ""தெற்கு 24 பர்கானாஸ் மாவட்டத்தில் உள்ள ஃபக்கீர்சந்த் கல்லூரி வளாகத்தில் நடைபெற்ற மோதலில் தொடர்புடையதாகக் குற்றம்சாட்டப்பட்டுள்ள எம்எல்ஏ தீபக் ஹல்தரை கைது செய்யுமாறு முதல்வர் மம்தா பானர்ஜி உத்தரவு பிறப்பித்துள்ளார்'' என்றார்.
 மேற்கு வங்க மாநிலம் முழுவதும் அதிகரித்து வரும் கல்லூரி வளாக மோதல்களில், ஆளும் திரிணமூல் காங்கிரஸ் கட்சியினருக்கு தொடர்பு உள்ளதாக, எதிர்க்கட்சிகள் குற்றம்சாட்டி வருகின்றன. இந்த நிலையில், ஆளுங்கட்சி எம்எல்ஏ ஒருவரை கைது செய்யுமாறு, முதல்வர் மம்தா பானர்ஜி உத்தரவிட்டது குறிப்பிடத்தக்கது.