தேரா சச்சா தலைவருக்கு மன்னிப்பு:"அகால் தக்த்தின் முடிவை சீக்கியர்கள் ஏற்க வேண்டும்'

""சீக்கிய மதத்தினரின் உணர்வுகளை அவமதித்ததாக குற்றம்சாட்டப்பட்ட தேரா சச்சா சௌதா அமைப்பின் தலைவர் குர்மீத் ராம் ரஹீம் சிங்குக்கு மன்னிப்பு வழங்கி அகால் தக்த் எடுத்த முடிவை, சீக்கியர்கள் ஏற்றுக் கொள்ள வேண்டும்'' என்று சிரோமணி குருத்வாரா பிரபந்தக் கமிட்டியின் தலைவர் அவதார் சிங் மக்கார் தெரிவித்தார்.

இதுதொடர்பாக, சண்டீகரில் அவர் சனிக்கிழமை கூறியதாவது:

அகால் தக்த் அமைப்பின் தலைவர்கள் எடுக்கும் முடிவை, ஒவ்வொரு சீக்கியரும் மதித்து நடத்தல் அவசியமாகும்.

தேரா சச்சா சௌதாவின் தலைவர் குர்மீத் ராம் ரஹீம் சிங்குக்கு மன்னிப்பு வழங்கி

அகால் தக்த் அமைப்பு எடுத்துள்ள முடிவை எதிர்க்கக் கூடாது. அதை, அனைத்து சீக்கியர்களும் ஏற்றுக்கொள்ள வேண்டும் என்றார் அவதார் சிங் மக்கார்.

சீக்கிய மதத்தின் 10-ஆவது குருவான கோவிந்த் சிங் போன்று உடையணிந்தபடி தேரா சச்சா தலைவர் ராம் ரஹீம் சிங், கடந்த 2007-ஆம் ஆண்டு புகைப்படம் எடுத்து வெளியிட்டார்.

இதன்மூலம், சீக்கியர்களின் உணர்வுகளை அவர் அவமதித்துவிட்டார் என்று புகார் எழுந்தது.

இந்நிலையில், தனது செயலுக்கு வருத்தம் தெரிவித்து அகால் தக்த் அமைப்புக்கு ராம் ரஹீம் சிங் கடிதம் எழுதினார். அதையடுத்து, அவருக்கு மன்னிப்பு வழங்குவதாக அகால் தக்த் வியாழக்கிழமை அறிவித்தது. எனினும், இதற்கு சீக்கிய அமைப்பினர் சிலர் கடும் எதிர்ப்பு தெரிவித்தனர்.