புதிய இணையதள சேவை தொடங்கினார் அமித் ஷா

பாஜக தேசியத் தலைவர் அமித் ஷா, தனது பெயரில்  www.amitshah.co.in' என்ற புதிய இணையதளத்தைத் தொடங்கியுள்ளார்.

இதையொட்டி, தில்லியில் உள்ள பாஜக தலைமையகத்தில் சனிக்கிழமை நடைபெற்ற நிகழ்ச்சியில் அமித் ஷா பேசியதாவது:

ஊடகங்களிடம் தொடர்ச்சியாக நான் தொடர்பில் இருப்பதில்லை என்று பரவலாக என் மீது சிலர் புகார் கூறுகின்றனர். அதை நான் ஏற்றுக் கொள்கிறேன்.

அக்குறைகளைத் தீர்க்கும் வகையில் மக்களிடம் எனது கருத்துகளைத் தெரிவிக்க புதிய இணையதளத்தைத் தொடங்கியுள்ளேன். இதன் மூலம் எனது கருத்துகள், பாஜகவின் செயல்பாடுகள், மத்தியில் ஆளும் தேசிய ஜனநாயகக் கூட்டணி தலைமையிலான அரசின் செயல்பாடு ஆகியவை தொடர்பான கருத்துகள் பகிர்ந்து கொள்ளப்படும்.

கட்சித் தொண்டர்களும் இந்த இணையதளம் மூலமாக என்னுடன் தொடர்பில் இருக்கலாம். இந்த இணையதள சேவை பராமரிப்பு பொறுப்பை கட்சியின் அமைப்பு பொதுச் செயலர் ராம் லாலிடம் ஒப்படைத்துள்ளேன்.

ஒரு வாரத்தில் இதன் அனைத்து பக்கங்களும் முழுமையாகச் செயல்படும்' என்றார்.