கடல் பகுதி கூட்டுக் கண்காணிப்பு: அமெரிக்காவின் யோசனையை நிராகரித்தது இந்தியா

ஆசிய பசிபிக் கடல் பகுதியில், பிற நாடுகளுடன் இணைந்து ரோந்து, கண்காணிப்புப் பணிகளில் இந்தியா ஈடுபடலாம் என்ற அமெரிக்காவின் யோசனையை பாதுகாப்பு அமைச்சர் மனோகர் பாரிக்கர் நிராகரித்துள்ளார்.
 "இந்தியா, ஆஸ்திரேலியா, ஜப்பான், அமெரிக்கா ஆகிய நாடுகள் இணைந்து பாதுகாப்பு தொடர்பான பேச்சுவார்த்தை நடத்தலாம். இதன் மூலம் ஆசிய பசிபிக் கடல் பகுதியில் அந்நாடுகளுடன் இணைந்து ரோந்துப் பணியில் இந்தியா ஈடுபடலாம். இது விரைவில் நடைபெறும் என்று நம்புகிறேன்' என்று அமெரிக்காவின் பசிபிக் பிராந்திய கடற்படை கமாண்டர் ஹாரி ஹாரிஸ் அண்மையில் தெரிவித்திருந்தார்.
 இந்நிலையில், தில்லியில் செய்தியாளர்களிடம் வெள்ளிக்கிழமை பேசிய பாதுகாப்புத் துறை அமைச்சர் மனோகர் பாரிக்கர் இது தொடர்பாக கூறியதாவது:
 இப்போதைய சூழ்நிலையில் பிற நாடுகளுடன் இணைந்து கடல் பகுதி ரோந்து, கண்காணிப்புப் பணிகளில் இந்தியா ஈடுபடாது. எனினும், கூட்டு கடற்படைப் பயிற்சிகள் நடைபெறும். இது, அமெரிக்க கடற்படை கமாண்டர் கூறியுள்ள கருத்துக்கான பதில் இல்லை. இந்திய அரசும், பாதுகாப்பு அமைச்சகமும் தேச நலனைக் கருத்தில் கொண்டே அனைத்து முடிவுகளையும் எடுக்கின்றன என்றார்.
 ஆசிய பசிபிக் பிராந்தியத்தில் சீனாவுக்கு எதிராக தன்னை நிலைநிறுத்திக் கொள்ள அமெரிக்க முயன்று வருகிறது. இந்த அமெரிக்க-சீன விவகாரத்தில் இருந்து விலகியிருக்க இந்தியா முடிவு செய்துள்ளது என்பதையே பாரிக்கர் மறைமுகமாகத் தெரிவித்துள்ளார்.