ஹைதராபாத்தை ஸ்தம்பித்த 'இகியா' விற்பனையகத்தின் விடியோ

ஸ்வீடன் நாட்டைச் சேர்ந்த வீட்டு உபயோகப் பொருட்களுக்கான இகியா விற்பனையகம் ஹைதராபாத்தில் வியாழக்கிழமை முதன்முறையாக திறக்கப்பட்டது. இந்தியாவிலேயே இங்குதான் முதன்முறையாக இகியா விற்பனையகம் தனது முதல் கிளையை விரிவுபடுத்தியுள்ளது குறிப்பிடத்தக்கது.

சுமார் 4 லட்சம் சதுர அடியில் மிகப் பிரமாண்டமாக ஹைதராபாத்தின் பிரதான பகுதியான ஹைடெக் சிட்டியில் இகியா விற்பனையகம் திறக்கப்பட்டுள்ளது. முதல் நாளிலேயே சுமார் 40 ஆயிரத்துக்கும் அதிகமான வாடிக்கையாளர்கள் இங்கு குவிந்தனர்.

இதனால் ஹைடெக் சிட்டி முழுவதும் பெரும் போக்குவரத்து நெரிசல் ஏற்பட்டது. சாலைகள் முழுவதும் ஸ்தம்பித்தது. மேலும் இகியா கட்டடத்திலும் கூட்ட நெரிசல் மிகுந்து காணப்பட்டது.

முதல் நாளிலேயே யாரும் எதிர்பார்க்காத வகையில் இவ்வளவு வாடிக்கையாளர்கள் வருகை தந்துள்ளனர். இங்கு ஏற்பட்ட கூட்ட நெரிசலை சீர்செய்யவதற்குள் பணியாளர்கள் மிகுந்த சிரமத்துக்கு உள்ளானதாக இந்த கிளையின் நிர்வாக இயக்குநர் ஜான் ஆச்சிலியா தெரிவித்துள்ளார்.