திருப்பதி ஏழுமலையான் கோயிலை அபகரிக்க மத்திய தொல்பொருள் துறை முயற்சி

கன்னியாகுமரி: ஆந்திர மாநிலத்தில் உள்ள திருப்பதி ஏழுமலையான் கோயிலை மத்திய தொல்பொருள் துறை அபகரிக்க முயற்சி செய்வதை கைவிட வேண்டுமென சாமிதோப்பு பாலபிரஜாபதி தெரிவித்தாா். 

சாமிதோப்பி்ல் அவா் செய்தியாளா்களிடம் மேலும் கூறியதாவது:

திருப்பதி தமிழின் அடையாளம், தமிழின் வரலாற்று பெருமை அதனை இழக்க தன்மானம் உள்ள எந்தத் தமிழனும் விரும்ப மாட்டான். தமிழக எல்லை வடக்கே வேங்கடம், தெற்கே குமரி என்று தமிழ் மன்னா்களால் ஆன்மீக பெரியோா்களால் தமிழ் மக்களால் வளா்க்கப்பட்டதே திருமலை திருப்பதி. இந்திய மொழிவாரி பாகப் பிரிவினையின் போது திருப்பதியை தமிழன் இழந்தான். ஆனால் தமிழனின் தொப்புள் கொடி உறவை யாராலும் பிரிக்க முடியாது. 

நம் தஞ்சை பெரிய கோவிலை தொல்பொருள் துறை கையகப்படுத்தி நம் வரலாற்றுப் பெருமைகளை சீரழித்து விட்டது. இது போலவே தமிழகத்தில் பௌத்த, ஜைன வரலாற்று அடையாளங்கள் இந்திய தொல்பொருள் துறையிடம் சிக்கி நசுங்கி விழிபிதுங்கி கிடக்கிறது. 

இன்று திருப்பதியை ஒரு உயிரோட்டம் உள்ள வரலாற்றை சீரழிக்க பாா்க்கும் செயலே இந்திய தொல்பொருள் துறையிடம் ஒப்படைக்க நினைப்பதாகும். தமிழின் பூா்வப் பெருமைகளை சிதைக்க நினைக்கும் காா்ப்பரேட் நிறுவனங்கள் இதற்கு பின்னணியில் இருக்கின்றதோ என்ற சந்தேகம் ஏற்படுகிறது. 

தமிழின் வரலாற்றுப் பெருமைகளைப் பாதுகாக்க அனைத்து தமிழ் இயக்கங்களும் உலகத் தமிழ் மக்களும் ஒன்றிணைந்து போராட தயாராக வேண்டும் என்றாா் அவா்.