மொத்த வாக்காளர்கள் 90, பதிவான வாக்குகள் 171: அசாம் தேர்தலில் குழப்பம்

அசாமில் திமா ஹசாவ் மாவட்டத்தில் ஹாப்லாங் தொகுதியிலிருக்கும் ஒரு வாக்குச்சாவடியில் மொத்த வாக்காளர்கள் எண்ணிக்கை 90 ஆக இருக்க, அங்கு மொத்தம் 171 வாக்குகள் பதிவாகியுள்ளன.

அசாமில் ஏப்ரல் 1-ம் தேதி நடைபெற்ற 2-ம் கட்ட வாக்குப்பதிவில் இந்த குளறுபடி ஏற்பட்டுள்ளது.

இதையடுத்து, வாக்குச் சாவடியில் பணியிலிருந்த 5 தேர்தல் அலுவலர்களை மாவட்ட தேர்தல் அதிகாரி பணியிடைநீக்கம் செய்தார். மேலும் அங்கு மறுவாக்குப்பதிவுக்கும் ஏற்பாடு செய்யப்பட்டுள்ளது. 

தேர்தல் அலுவலர்களைப் பணியிடைநீக்கம் செய்யப்பட்டதற்கான உத்தரவு வாக்குப்பதிவுக்கு அடுத்த நாளான ஏப்ரல் 2-ம் தேதியே வழங்கப்பட்டபோதிலும், திங்கள்கிழமை காலைதான் இந்த விவகாரம் வெளிச்சத்துக்கு வந்தது.

இதுபற்றி தேர்தல் அலுவலர் ஒருவர் தெரிவித்தது:

"அந்த கிராமத் தலைவர் வாக்காளர்கள் பட்டியலை ஏற்க மறுத்து, சொந்தமாக வாக்காளர்கள் பட்டியலை கொண்டுவந்துள்ளார். அந்தப் பட்டியலின்படியே கிராம மக்கள் வாக்களித்துள்ளனர். கிராமத் தலைவர் கோரிக்கையை தேர்தல் அலுவலர்கள் எந்தக் காரணத்துக்காக ஏற்றுக்கொண்டனர் என்ற தகவல் உடனடியாகக் கிடைக்கப்பெறவில்லை."