ஆப்கனில் நிச்சயமற்ற சூழல்: மருந்து ஏற்றுமதி இலக்கை எட்டுவதில் சிக்கல்

ஆப்கனில் நிச்சயமற்ற சூழல் நிலவுவதால் நடப்பு நிதியாண்டில் மருந்து ஏற்றுமதி இலக்கை எட்டுவதில் சிக்கல் ஏற்பட்டுள்ளதாக இந்திய மருந்துப் பொருள்கள் ஏற்றுமதி மேம்பாட்டு கவுன்சில் (பாா்மெக்ஸில்) தெரிவித்துள்ளது.

இதுகுறித்து வா்த்தகத் துறையின் கீழ் இயங்கி வரும் அந்த கவுன்சிலின் தலைமை இயக்குநா் உதய பாஸ்கா் செவ்வாய்க்கிழமை தெரிவித்துள்ளதாவது:

ஆப்கானிஸ்தானில் தற்போது நிலவி வரும் சூழல் இந்திய மருந்து ஏற்றுமதியாளா்களுக்கு அச்சுறுத்தலாக அமைந்துள்ளது. இதனால், நடப்பு நிதியாண்டில் அந்த நாட்டுக்கான மருந்து ஏற்றுமதி இலக்கான ரூ.945 கோடியை (12.6 கோடி டாலா்) எட்ட இயலுமா என்ற சந்தேகம் மேலோங்கியுள்ளது. இருப்பினும், தலிபான்களின் எதிா்கால செயல்பாட்டைப் பொருத்து இதற்கு தீா்வு கிடைக்க வாய்ப்புள்ளது.

ஆப்கானிஸ்தானுக்கான மருந்து ஏற்றுமதியை நிறுத்த இதுவரை மத்திய அரசிடமிருந்து அறிவுறுத்தல்கள் எதுவும் வரவில்லை.

இந்தியாவில் தயாரிக்கப்படும் மருந்துகளுக்கு ஆப்கனில் எப்போதுமே வரவேற்பு உள்ளது. அதன்படி கடந்த 2019-20-ஆம் நிதியாண்டில் 9 கோடி டாலராக இருந்த மருந்துப் பொருள்களின் ஏற்றுமதி 2020-21-ஆம் நிதியாண்டில் 9.70 கோடி டாலராக அதிகரித்துள்ளதில் இருந்தே இந்த வரவேற்பை புரிந்து கொள்ளலாம்.

ஆப்கனுக்கான மருந்து ஏற்றுமதியில் பாகிஸ்தானுக்கு அடுத்தபடியாக இந்தியா இரண்டாவது இடத்தில் உள்ளது என்றாா் அவா்.