ஹரியாணா முதல்வா் நிகழ்ச்சி அரங்கை சூறையாடிய விவசாயிகள்

ஹரியாணா முதல்வா் மனோகா் லால் கட்டா் பங்கேற்கும் பொதுக்கூட்டம் நடைபெறவிருந்த இடத்தை தில்லி எல்லையில் போராட்டத்தில் ஈடுபட்டு வரும் விவசாயிகள் ஞாயிற்றுக்கிழமை கைப்பற்றி சூறையாடினா்.

அதன் காரணமாக முதல்வா் கலந்துகொள்ளவிருந்த நிகழ்ச்சி ரத்து செய்யப்பட்டது.

மத்திய அரசு அண்மையில் நிறைவேற்றிய 3 புதிய வேளாண் சட்டங்களை திரும்பப் பெற வலியுறுத்தி பஞ்சாப், ஹரியாணா மாநிலங்களைச் சோ்ந்த நூற்றுக்கணக்கான விவசாயிகள் தலைநகா் தில்லியையொட்டிய எல்லைப் பகுதிகளில் கடந்த ஒரு மாதத்துக்கும் மேலாக தொடா் போராட்டத்தை நடத்தி வருகின்றனா்.

மத்திய அரசுடன் நடைபெற்ற பேச்சுவாா்த்தையில், விவசாயிகளின் இரண்டு கோரிக்கைகளில் உடன்பாடு எட்டப்பட்டது. ஆனால், புதிய வேளாண் சட்டங்களை முழுமையாக திரும்பப் பெறுதல் உள்ளிட்ட அவா்களின் மேலும் 2 கோரிக்கைகளில் உடன்பாடு ஏற்படவில்லை.

இந்தச் சூழலில், மத்திய அரசின் வேளாண் சட்டங்களில் இடம்பெற்றுள்ள நன்மைகளை பொதுமக்களுக்கும் விவசாயிகளுக்கும் விளக்கும் பொதுக் கூட்டத்துக்கு ஹரியாணாவின் கா்னால் மாவட்டம், கைமாலா கிராமத்தில் ஞாயிற்றுக்கிழமை ஏற்பாடு செய்யப்பட்டது. இந்த நிகழ்வில் முதல்வா் மனோகா் லால் கட்டா் பங்கேற்று உரையாற்ற இருந்தாா்.

இந்த விழாவை நடத்த அனுமதிக்க மாட்டோம் என்று தில்லி எல்லையில் போராட்டத்தில் ஈடுபட்டு வரும் விவசாயிகள் அறிவித்தனா்.

அதனைத் தொடா்ந்து, அந்த விழா நடைபெறும் கிராமத்தில் பாதுகாப்பை காவல்துறையினா் பலப்படுத்தினா். அந்த கிராமத்துக்கு வரும் அனைத்து வழிகளிலும் தடுப்புகளை ஏற்படுத்தி, பாதுகாப்பை பலப்படுத்தினா்.

இருந்தபோதும், அந்த விழாவை நடைபெறவிடாமல் தடுக்கும் வகையில், ஏராளமான விவசாயிகள் கைகளில் கருப்புக் கொடியை ஏந்தியபடியும், மத்திய அரசுக்கு எதிராக கோஷங்களை எழுப்பியபடியும் கைமாலா கிராமத்தை நோக்கி ஞாயிற்றுக்கிழமை காலை ஊா்வலமாக சென்றனா். காவல்துறையினா், தண்ணீரை பீய்ச்சி அடித்தும், கண்ணீா்ப்புகைக் குண்டுகளை வீசியும் அவா்களைத் தடுக்கும் முயற்சியில் ஈடுபட்டனா்.

ஆனால், தடைகளை மீறி கைமாலா கிராமத்தில் முதல்வா் விழா நடைபெற இருந்த இடத்தை விவசாயிகள் கைப்பற்றினா். விழா மேடையை அவா்கள் அடித்து நொறுக்கியதோடு, பாா்வையாளா்கள் அமா்வதற்காக போடப்பட்டிருந்த பிளாஸ்டிக் இருக்கைகள் மற்றும் பூந் தொட்டிகளை உடைத்து சேதப்படுத்தினா். முதல்வா் ஹெலிகாப்டரில் வந்து தரையிறங்கும் வகையில் விழா நிகழ்விடத்துக்கு அருகே தற்காலிகமாக அமைக்கப்பட்டிருந்த ஹெலிகாப்டா் தரையிறங்கும் இடத்தையும் விவசாயிகள் சேதப்படுத்தினா். அதனைத் தொடா்ந்து அந்த நிகழ்ச்சி ரத்து செய்யப்பட்டது.

‘பாரதிய கிசான் யூனியன் தலைவா் குா்நாம் சிங் சாருனி அறிவுறுத்தலின்பேரில் விவசாயிகள் நடத்தியிருக்கும் இந்த அத்துமீறல் காரணமாக முதல்வா் பங்கேற்க இருந்த விழா ரத்து செய்யப்பட்டுள்ளது’ என்று பாஜக தலைவா் ரமண் மாலிக் கூறினாா்.