பெரும்பாலான மாநிலங்களில் தனிமைப்படுத்துதல் கடைப்பிடிப்பதில்லை: மத்திய அரசு

பெரும்பாலான மாநிலங்களில் தனிமைப்படுத்துதல் கடைப்பிடிக்கப்படுவதில்லை என மத்திய சுகாதாரத் துறைச் செயலர் ராஜேஷ் பூஷண் தெரிவித்துள்ளார்.

இதுபற்றி செய்தியாளர்களிடம் அவர் தெரிவித்தது:

"நாடு முழுவதிலும் கரோனா வைரஸ் நோய்த் தொற்று இருப்பது உறுதி செய்யப்படுவோரின் வாராந்திர விகிதம் 5.65 சதவிகிதம். மகாராஷ்டிரத்தில் இதன் வாராந்திர விகிதம் 23 சதவிகிதம். பஞ்சாபில் 8.82 சதவிகிதம், சத்தீஸ்கரில் 8 சதவிகிதம், மத்தியப் பிரதேசத்தில் 7.82 சதவிகிதம், தமிழகத்தில் 2.50 சதவிகிதம், கர்நாடகத்தில் 2.45 சதவிகிதம், குஜராத்தில் 2.2 சதவிகிதம், தில்லியில் 2.04 சதவிகிதம்.

இந்த மாநில பிரதிநிதிகளிடம் பேசினோம். கரோனா பாதிப்பு எண்ணிக்கை அதிகரிக்கும்போது பரிசோதனை எண்ணிக்கையை ஏன் அதிகரிக்கவில்லை என்றோம். ஆர்டி-பிசிஆர் பரிசோதனைகளைக் கொண்டு பரிசோதனை எண்ணிக்கையை அதிகரிப்பது அவசியம்.

பெரும்பாலான மாநிலங்களில் தனிமைப்படுத்துதல் கடைப்பிடிக்கப்படவில்லை. வீட்டிலேயே தனிமைப்படுத்திக்கொள்ள அறிவுறுத்தப்படுகின்றனர். ஆனால், வீட்டில் தனிமையில் இருக்கிறார்களா என்பதைக் கண்காணிப்பதில்லை. அப்படி கடைப்பிடிக்கவில்லை என்றால், அவர்களை ஏதேனும் தங்குமிடத்தில் தனிமைப்படுத்தப்பட வேண்டும்."