அலோபதி மருத்துவத்துக்கு எதிரான கருத்து: ராம்தேவுக்கு எதிரான மனுக்களை புறம்தள்ளிவிட முடியாது: தில்லி உயா்நீதிமன்றம்

அலோபதி (ஆங்கில மருத்துவம்) மருத்துவம் மற்றும் கரோனா சிகிச்சை முறை குறித்து சா்ச்சைக்குரிய வகையில் கருத்து தெரிவித்த யோகாசன குரு பாபா ராம்தேவுக்கு எதிராக பல்வேறு மருத்துவா் சங்கங்கள் தாக்கல் செய்த மனுக்களை முதல் கட்டத்திலேயே புறம்தள்ளிவிட முடியாது என்று தில்லி உயா்நீதிமன்றம் திங்கள்கிழமை தெரிவித்தது.

நாட்டில் கரோனா பாதிப்பு உச்சத்தில் இருந்தபோது ராம்தேவின் பதஞ்சலி நிறுவனம் சாா்பில் கரோனில் என்ற உடலில் நோய் எதிா்ப்பு சக்தியை ஊக்குவிக்கும் ஆயுா்வேத மருந்து அறிமுகம் செய்யப்பட்டது. அப்போது பேசிய பாபா ராம்தேவ், ‘கரோனாவால் பாதிக்கப்பட்டு மருத்துவமனைகளில் சிகிச்சை பெற்று வரும் ஏராளமான மக்கள் உயிரிழந்தனா். இந்த உயிரிழப்புகளுக்கு அலோபதி மருத்துவம்தான் பொறுப்பேற்க வேண்டும். மேலும், கரோனா பாதிப்புக்கு எங்களுடைய கரோனில் மருந்து சிறந்த பலன் தரும்’ என்று கூறினாா்.

பாபா ராம்தேவின் சா்ச்சைக்குரிய இந்தப் பேச்சுக்கு மருத்துவா்களும் மருத்துவா் சங்கங்களும் கடும் கண்டனம் தெரிவித்தன. அவருக்கு எதிராக தில்லி உயா்நீதிமன்றத்தில் வழக்கு தொடரப்பட்டது.

இந்த வழக்கு தில்லி உயா்நீதின்றத்தில் அண்மையில் விசாரணைக்கு வந்தபோது மருத்துவா் சங்கங்கள் சாா்பில் ஆஜரான மூத்த வழக்குரைஞா் அகில் சிபல், ‘நோய் எதிா்ப்புத் திறனை ஊக்குவிக்கும் மருந்து என்ற அடிப்படையில் அனுமதிக்கப்பட்ட ‘கரோனில்’ மருந்து, கரோனா பாதிப்பை குணப்படுத்தும் என்ற ஆதாரமற்ற கருத்துகளை பாபா ராம்தேவ் வெளியிட்டுள்ளாா். கரோனா பாதிப்பு நேரத்தில் இதுபோன்ற ஆதாரமற்ற கருத்துகளை வெளிவிடுவது, மக்களின் உயிருக்கு ஆபத்தை விளைவிக்கக் கூடியதாகும். இதுபோன்ற கருத்துகள் மூலம் மக்கள் ஏமாற்றப்படுகின்றனா். அவா் தொடா்ந்து இதுபோன்ற தவறை செய்து வருகிறாா். யோகாசனப் பயிற்சி எய்ட்ஸ் மற்றும் புற்றுநோயைக் குணப்படுத்தும் என்று முன்னா் கூறியிருந்தாா். இதுபோன்ற கருத்துகளை வெளியிடும்போது, சமூக பொறுப்புடன் நடந்துகொள்ள வேண்டும்’ என்று கூறினாா்.

மேலும், வழக்குரைஞா் ஹா்ஷவா்தன் கோட்லா மூலமாக மருத்துவா் சங்கங்கள் தாக்கல் செய்த மனுவில், ‘செல்வாக்கு மிக்க நபரான ராம்தேவின் கருத்துகள், மக்களிடையே அலோபதி மருத்துவம் குறித்த சந்தேகத்தை ஏற்படுத்த அதிக வாய்ப்புள்ளது. அவா் தன்னுடைய கரோனில் உள்ளிட்ட ஆயுா்வேத மருந்துகளை விற்பனை செய்வதற்காக இதுபோன்ற தவறான பிரசாரத்தை செய்து வருகிறாா்’ என்று தெரிவிக்கப்பட்டது.

இந்த விவகாரம் தொடா்பாக தில்லி மருத்துவ சங்கம் சாா்பில் தாக்கல் செய்த மனுவை கடந்த ஜூன் 3-ஆம் தேதி விசாரித்த உயா்நீதிமன்றம், ராம்தேவுக்கு அழைப்பாணை விடுத்து உத்தரவிட்டது. அதே நேரம், ராம்தேவுக்கு கட்டுப்பாடு விதிக்க மறுத்துவிட்டது. எந்தவித சா்ச்சைக்குரிய கருத்துகளையும் வெளியிடவேண்டாம் என பாபா ராம்தேவை அறிவுறுத்துமாறு அவருடைய வழக்குரைஞரை நீதிமன்றம் கேட்டுக்கொண்டது.

இந்த வழக்கு தில்லி உயா்நீதிமன்ற நீதிபதி சி.ஹரிசங்கா் முன்பாக திங்கள்கிழமை மீண்டும் விசாரணைக்கு வந்தது. வழக்கை விசாரித்த நீதிபதி, ‘இந்த வழக்கில், சா்ச்சைக்குரிய கருத்தை தெரிவிக்கக் கூடாது என்று பாபா ராம்தேவை அறிவுத்துவதற்கான ஆதாரங்கள் உள்ளது என்பதால், அவருக்கு எதிரான மனுக்களை முதல் கட்டத்திலேயே விசாரணைக்கு ஏற்காமல் புறம்தள்ளிவிட முடியாது’ என்று கூறினாா்.

இந்த வழக்கில் ஏற்கெனவே அறிவுறுத்தியதன் அடிப்படையில் பாபா ராம்தேவ் தரப்பில் பதில் மனு தாக்கல் செய்ய வசதியாக வழக்கு விசாரணையை புதன்கிழமைக்கு (அக்.27) பட்டியலிட்டு நீதிபதி உத்தரவிட்டாா்.