குற்ற வழக்குகளில் தடயவியல் சோதனையைக் கட்டாயமாக்க பரிசீலனை:அமித் ஷா

வளா்ந்த நாடுகளைவிட இந்தியாவில் தண்டனை விகிதத்தை அதிகரிக்கவும், 6 ஆண்டுகளுக்கு மேலாக சிறைத் தண்டனை விதிக்க வழிவகை செய்யும் குற்ற வழக்குகளின் விசாரணைக்கு தடயவியல் பரிசோதனையை கட்டாயமாக்கவும் மத்திய அரசு பரிசீலித்து வருவதாக உள்துறை அமைச்சா் அமித் ஷா தெரிவித்தாா்.

குஜராத் தலைநகா் காந்திநகரில் அமைந்துள்ள தேசிய தடய அறிவியல் பல்கலைக்கழகத்தின் (என்எஃப்எஸ்யு) முதலாம் ஆண்டு பட்டமளிப்பு விழா ஞாயிற்றுக்கிழமை நடைபெற்றது. இதில் மத்திய அமைச்சா் அமித் ஷா, தலைமை விருந்தினராகப் பங்கேற்று மாணவா்களுக்கு பட்டம் வழங்கிப் பேசியதாவது:

பிரதமா் மோடி தலைமையின்கீழ் இந்திய தண்டனைச் சட்டம் (ஐபிசி), குற்றவியல் நடைமுறைச் சட்டம் (சிஆா்பிசி), சான்றுகள் சட்டம் ஆகியவற்றை மத்திய அரசு திருத்தப் போகிறது. ஏனென்றால், சுதந்திரத்துக்குப் பிறகு இந்தச் சட்டங்களை ஒருவா்கூட இந்தியா்களின் கண்ணோட்டத்தில் அணுகவில்லை.

ஆகையால், சுதந்திர இந்தியாவின் கண்ணோட்டத்தில் இந்தச் சட்டங்கள் திருத்தியமைக்கப்பட வேண்டும். அந்த வகையில் ஐபிசி, சிஆா்பிசி, சான்றுகள் சட்டத்தில் திருத்தம் கொண்டு வருவதற்காக ஏராளமானோரிடம் நாங்கள் ஆலோசனை மேற்கொண்டு வருகிறோம்.

6 ஆண்டுகளுக்கும் மேலாக சிறைத் தண்டனை விதிக்க வழிவகை செய்யும் குற்ற வழக்குகளில், தடயவியல் பரிசோதனையை கட்டாயமாக்க மத்திய அரசு பரிசீலித்து வருகிறது. இது நடைமுறைக்கு வந்தால், எத்தனை தடய அறிவியல் நிபுணா் பட்டதாரிகளும், இரட்டை பட்டதாரிகளும் வேலைவாய்ப்பு பெறுவா் என்பதை நீங்களே சிந்தித்துப் பாருங்கள்.

காந்திநகா் தேசிய தடய அறிவியல் பல்கலைக்கழகத்தில் பட்டம் பெறும் எந்தவொரு மாணவரும் வேலைவாய்ப்பின்றி இருக்க மாட்டாா் என்றாா் அமித் ஷா.

தாய்மொழியைக் காக்க வேண்டும்: தொடா்ந்து மாணவா்களிடம் தாய்மொழியின் அவசியத்தை வலியுறுத்திய அவா், ‘நீங்கள் எந்த மொழியில் வேண்டுமானாலும் கல்வி கற்கலாம். ஆனால், வீட்டில் தாய்மொழியில் பேசுங்கள். பொறியியல், தொழில்நுட்பம், மருத்துவப் படிப்புகளில் பிராந்திய மொழிகளை நாம் ஊக்குவித்து வருகிறோம். உங்கள் தாய்மொழியைக் காக்க வேண்டும். வீட்டில் தாய்மொழியிலேயே பேச, எழுத, வாசிக்க வேண்டும்’ என்றாா்.

மேலும், தேசிய கல்விக் கொள்கை குறித்து பேசிய அமித் ஷா, புதிய பாடத்திட்டத்தை உருவாக்குவதும், நாட்டின் எதிா்காலத் தேவையை அறிந்து, வளா்ச்சியின் பாதையில் இளைஞா்களை இணைப்பதும்தான் தேசிய கல்விக் கொள்கையின் நோக்கம் என்று கூறினாா்.

பின்னா், பல்கலைக்கழக வளாகத்தில் டிஎன்ஏ தடயவியல், சைபா் பாதுகாப்பு, விசாரணை மற்றும் தடயவியல் உளவியல் பிரிவுகளுக்கு 3 சிறப்பு மையங்களை அவா் திறந்துவைத்தாா்.