ராமஜென்ம பூமியில் நடனமாடிய 4 பெண் காவலர்கள்! பணியிடை நீக்கம் (விடியோ)

அயோத்தியில் ராமர் கோயில் கட்டுமானப் பணிகள் நடைபெறும் இடத்தில் பாதுகாப்பு பணியில் ஈடுபட்டிருந்த 4 பெண் காவலர்கள் நடனமாடிய விடியோ இணையத்தில் வைரலானதைத் தொடர்ந்து அவர்கள் பணியிடை நீக்கம் செய்யப்பட்டுள்ளனர். 

பணியிடை நீக்கம் செய்யப்பட்ட காவலர்கள் நடனமாடும்போது சீருடை அணிந்திருக்கவில்லை, எனினும் அவர்கள் மீது காவல் துறை சார்பில் நடவடிக்கை எடுக்கப்பட்டுள்ளது. 

படிக்க | நாடாளுமன்றத்தில் வழுக்கி விழுந்த சசிதரூர்! கால் கட்டுடன் பகிர்ந்த படம் வைரல்!

உத்தரப் பிரதேச மாநிலம் அயோத்தி ராம ஜென்ம பூமியில், ராமர் கோயில் கட்டுமானப் பணிகள் நடைபெற்று வருகின்றன. இந்தப் பணியின்போது பாதுகாப்பு வழங்குவதற்காக 4 பெண் காவலர்கள் பணியமர்த்தப்பட்டனர். 

அவர்கள் தங்கள் கூடாரத்தில், வானொலியில் ஒலிபரப்பான போஜ்புரி பாடலுக்கு நடனமாடி தங்கள் மகிழ்ச்சியை பகிர்ந்துகொண்டனர். இந்த விடியோ இணையத்தில் வைரலானதைத் தொடர்ந்து 4 பெண் காவலர்களும் பணியிடை நீக்கம் செய்யப்பட்டுள்ளனர். 

மாநில சிறப்பு காவல் கண்காணிப்பாளர், பெண் காவலர்கள் 4 பேரையும் பணியிடை நீக்கம் செய்து உத்தரவிட்டுள்ளார். அவர்களிடம் விசாரணை நடத்தப்படும் எனவும் குறிப்பிட்டுள்ளார்.