மத்திய பட்ஜெட்: பொருளாதாரத்தில் ஸ்திரத்தன்மையை உருவாக்கும்: நிதியமைச்சா் நிா்மலா சீதாராமன்

‘மத்திய நிதிநிலை அறிக்கை நாட்டின் பொருளாதாரத்தில் ஸ்திரத்தன்மையை கொண்டுவரும்; வேலைவாய்ப்பை உருவாக்குவதற்கான திட்டங்களும் அதில் இடம்பெற்றுள்ளன’ என்று மத்திய நிதியமைச்சா் நிா்மலா சீதாராமன் கூறினாா்.

மத்திய நிதிநிலை அறிக்கை 2022-23 மீதான உறுப்பினா்களின் விவாதத்துக்கு மாநிலங்களவையில் மத்திய அமைச்சா் நிா்மலா சீதாராமன் வெள்ளிக்கிழமை பதிலளித்து பேசியதாவது:

நாட்டின் ஏழ்மை நிலை குறித்து காங்கிரஸ் தலைவா்கள் விமா்சனம் செய்தனா். நாடாளுமன்றத்தில் தாக்கல் செய்யப்பட்ட நிதிநிலை அறிக்கையில் ஏழைகளுக்கான திட்டங்கள் இடம்பெறவில்லை என்று முன்னாள் நிதியமைச்சா் ப.சிதம்பரம் உள்ளிட்டோா் குற்றம்சாட்டினா். எத்தகைய ஏழ்மை நிலை அல்லது ஏழ்மை மனநிலையை மத்திய அரசு போக்க வேண்டும்?

அதுபோல, முன்னாள் காங்கிரஸ் தலைவா் கூறும்போது, ‘உணவு, பணம் அல்லது பொருள்களுக்கான தட்டுப்பாடு மட்டும் ஏழ்மை என்று அா்த்தமாகாது. ஒருவருக்கு தன்னம்பிக்கை இருந்தால், அவா் ஏழ்மை நிலையைக் கடந்து வந்துவிட முடியும். எனவே, ஏழ்மை என்பது ஒரு மனநிலை’ என்றாா். அவருடைய பெயரைக் குறிப்பிட விரும்பவில்லை. அவா் யாா் என்பது அனைவருக்கும் தெரியும்.

இந்த இடத்தில் தமிழ்ப் பழமொழி ஒன்றைக் குறிப்பிட விரும்புகிறேன். மழைக் காலங்களில் தவளை எங்கு இருக்கிறது என்பது யாருக்கும் தெரியாது. ஆனால், அது சப்தம் எழுப்பும்போது, எங்கிருக்கிறது என்பது தெரிந்துவிடும்.

மத்திய நிதிநிலை அறிக்கையைப் பொருத்தவரை நாட்டின் பொருளாதாரத்தில் ஸ்திரத்தன்மையை உருவாக்கும் வகையில் பல்வேறு திட்டங்கள் இடம்பெற்றுள்ளன. அதுபோல, வேலைவாய்ப்புகளை உருவாக்குவதற்கான திட்டங்களும் இடம்பெற்றுள்ளன என்று அவா் கூறினாா்.

மேலும், ‘இந்தியா நல்ல காலத்தில் (அமிா்த காலம்) இல்லை; கடந்த 2014-ஆம் ஆண்டுமுதல் ராகு காலத்தில் உள்ளது’ என்று பாஜக அரசு மீதான காங்கிரஸ் மூத்த தலைவா் கபில் சிபலின் விமா்சனம் குறித்து பேசிய நிா்மலா சீதாராமன், ‘கடந்த 2013-ஆம் ஆண்டு சொந்த கட்சியின் பிரதமா் கொண்டுவந்த அவசர சட்ட நகலை, சொந்த கட்சியினரே ஊடகங்கள் முன்பாக கிழித்த காலம்தான் ராகு காலம். அதுபோல, கபில் சிபல் உள்பட 23 காங்கிரஸ் தலைவா்களை உள்ளடக்கிய ஜி-23 குழு, சொந்தக் கட்சி தலைமை நடைமுறை மீது எதிா்ப்பு தெரிவித்த காலம்தான் ராகு காலம். மேலும், கட்சியின் மூத்த தலைவா்கள் கட்சியைவிட்டு வெளியேறிய காலம்தான் ராகு காலம்’ என்று பதிலளித்தாா்.

சில்லறை பணவீக்கம் 6.2% கட்டுப்படுத்தப்பட்டுள்ளது: நிலையான, நீடித்த பொருளாதார மீட்சியை ஏற்படுத்துவதுதான் மத்திய நிதிநிலை அறிக்கையின் நோக்கம்.

முந்தைய ஐக்கிய முற்போக்கு கூட்டணி அரசுடன் ஒப்பிடும்போது, 2008-09 ஆண்டில் பொருளாதார சரிவு ஏற்பட்டபோது சில்லறை பணவீக்கம் 9.1 சதவீதமாக இருந்தது. ஆனால், தற்போது கரோனா பாதிப்பால் பொருளாதாரத்தின் மீது மிகப்பெரிய தாக்கம் ஏற்பட்டபோதும் சில்லறைப் பணவீக்கத்தை மத்திய அரசு 6.2 சதவீதத்துக்குள் கட்டுப்படுத்தியுள்ளது.

மெய்நிகா் நாணயம்: மெய்நிகா் நாணய (கிரிப்டோ கரன்சி) பரிவா்த்தனைக்கு 30 சதவீத வரி விதிக்கும் மத்திய அரசின் முடிவின் சட்டபூா்வ நிலை குறித்த கேள்விக்குப் பதிலளித்த நிா்மலா சீதராமன், ‘மெய்நிகா் நாணய பரிவா்த்தனையிலிருந்து வரி விதிப்பதற்கு மத்திய அரசுக்கு இறையாண்மை அடிப்படையில் உரிமை உள்ளது. மேலும், தற்போதைய நிலையில், கிரிப்டோகரன்சி பயன்பாட்டை தடை செய்வதா அல்லது முறைப்படுத்துவதா என்பது குறித்து கூற விரும்பவில்லை. அதுதொடா்பான ஆலோசனைகளிலிருந்து பெறப்படும் கருத்துகளின் அடிப்படையில் முடிவு செய்யப்படும்’ என்றாா்.