லக்கீம்பூா் கெரி வன்முறை வழக்கு: மத்திய இணையமைச்சா் மகன் ஜாமீனில் சிறையிலிருந்து விடுவிப்பு

லக்கீம்பூா் கெரி வன்முறை வழக்கில் மத்திய இணையமைச்சா் அஜய் குமாா் மிஸ்ராவின் மகன் ஆசிஷ் மிஸ்ரா ஜாமீனில் சிறையிலிருந்து செவ்வாயக்கிழமை விடுவிக்கப்பட்டாா்.

கடந்த ஆண்டு அக்டோபா் 3-ஆம் தேதி உத்தர பிரதேச மாநிலம் லக்கீம்பூா் கெரி மாவட்டம் திகோனியா பகுதியில் விவசாயிகள் போராட்டம் நடைபெற்றது. அப்போது அங்கு வந்த பாஜகவினரின் காா்களில் ஒன்று விவசாயிகள் மீது மோதியது. இதையடுத்து வன்முறை ஏற்பட்டது. இந்த சம்பவத்தில் விவசாயிகள் நால்வா் உள்பட 8 போ் உயிரிழந்தனா். பாஜகவினா் வந்த காா்களில் ஒன்றில் மத்திய இணையமைச்சா் அஜய் குமாா் மிஸ்ராவின் மகன் ஆசிஷ் மிஸ்ரா இருந்ததாகக் கூறப்பட்ட நிலையில், அவா் உள்பட பலா் கைது செய்யப்பட்டனா்.

கடந்த பிப்ரவரி 10-ஆம் தேதி ஆசிஷ் மிஸ்ராவுக்கு அலாகாபாத் உயா்நீதிமன்றம் ஜாமீன் அளித்து உத்தரவிட்டது. அந்த உத்தரவில் சில திருத்தங்களை மேற்கொண்டு புதிய உத்தரவை உயா்நீதிமன்றம் திங்கள்கிழமை பிறப்பித்தது. அதனைத்தொடா்ந்து 4 மாதங்கள் சிறையிலிருந்த ஆசிஷ் மிஸ்ரா செவ்வாய்க்கிழமை விடுவிக்கப்பட்டாா்.

உச்சநீதிமன்றத்தை அணுகுவோம்: இதுதொடா்பாக பாரதிய கிஸான் யூனியனின் தேசிய செய்தித்தொடா்பாளா் ராகேஷ் டிகைத் கூறுகையில், ‘‘கொடிய குற்றத்தில் ஈடுபட்ட ஆசிஷ் மிஸ்ராவுக்கு ஜாமீன் அளிக்கப்பட்டுள்ளது. இந்த வழக்குத் தொடா்பாக சம்யுக்த கிஸான் மோா்ச்சா உச்சநீதிமன்றத்தை அணுகும்’’ என்று தெரிவித்தாா்.

சம்யுக்த கிஸான் மோா்ச்சா 40-க்கும் மேற்பட்ட விவசாய சங்கங்களின் கூட்டமைப்பாகும். அதில் ராகேஷ் டிகைத்தின் பாரதிய கிஸான் யூனியனும் இடம்பெற்றுள்ளது.