11,594 தொண்டு நிறுவனங்களின் பதிவு நீட்டிப்பு: உச்சநீதிமன்றத்தில் மத்திய அரசு தகவல்

வெளிநாட்டு நன்கொடைகளைப் பெறுவதற்காக, 11,594 தொண்டு நிறுவனங்களின் (என்ஜிஓ) பதிவு நீட்டிக்கப்பட்டுள்ளதாக உச்சநீதிமன்றத்தில் மத்திய அரசு தெரிவித்தது.

என்ஜிஓக்கள் வெளிநாட்டு நன்கொடைகளைப் பெறுவதற்கு வெளிநாட்டு நன்கொடைகள் ஒழுங்குமுறைச் சட்டத்தின் கீழ் பதிவு செய்ய வேண்டியது கட்டாயம். இந்தப் பதிவை புதுப்பிக்க மத்திய அரசு கட்டுப்பாடுகளை விதித்துள்ளது.

இதனால் 5,789 என்ஜிஓக்கள் பதிவை இழக்கும் நிலை ஏற்பட்டுள்ளதால் மத்திய அரசின் நடவடிக்கைக்கு தடை விதிக்க வேண்டும் என்று உச்சநீதிமன்றத்தில் அமெரிக்காவைச் சோ்ந்த என்ஜிஓ சாா்பில் மனு தாக்கல் செய்யப்பட்டது.

இந்த மனு உச்சநீதிமன்ற நீதிபதிகள் ஏ.எம்.கான்வில்கா், தினேஷ் மகேஷ்வரி, சி.டி.ரவி ஆகியோா் அடங்கிய அமா்வு முன் செவ்வாய்க்கிழமை விசாரணைக்கு வந்தது.

அப்போது, மத்திய அரசின் சொலிசிட்டா் ஜெனரல் துஷாா் மேத்தா ஆஜராகி, ‘கடந்த ஆண்டு செப்டம்பா் 30-ஆம் தேதி வரையில் செல்லுபடியான பதிவை வைத்திருந்த அனைத்து என்ஜிஓக்களுக்கு அடுத்த உத்தரவு வரும் வரை அங்கீகாரம் நீட்டிக்கப்பட்டுள்ளது. மத்திய அரசு நிா்ணயித்த காலவரம்புக்குள் 11,594 என்ஜிஓக்கள் விண்ணப்பித்திருந்தன. அவற்றின் பதிவும் நீட்டிக்கப்பட்டுள்ளது’ என்றாா்.

அப்போது மனுதாரா் தரப்பில் ஆஜரான மூத்த வழக்குரைஞா் சஞ்சய் ஹெக்டே, ‘சுமாா் 6 ஆயிரம் என்ஜிஓக்களின் பதிவுகள் நீட்டிக்கப்படவில்லை. ஆகையால், மத்திய அரசின் கட்டுப்பாடுகளுக்கு தடை விதிக்க வேண்டும்’ என்றாா்.

இதை ஏற்க மறுத்த நீதிமன்றம், ‘பதிவை நீட்டிக்க விண்ணப்பிக்கவே இல்லையென்றால், அந்த என்ஜிஓக்கள் நிகழாண்டு தொடர விரும்பவில்லை என்றுதான் கருத வேண்டும்’ என்றது.

இதையடுத்து, ‘இந்த என்ஜிஓக்கள் விண்ணப்பிக்க இரண்டு வார காலம் அவகாசம் அளிக்கப்பட வேண்டும்’ என்று சஞ்சய் ஹெக்டே வேண்டுகோள் விடுத்தாா்.

இதை ஏற்றுக் கொண்ட நீதிபதிகள், சம்பந்தப்பட்ட அதிகாரிகளிடம் இந்த என்ஜிஓக்கள் விண்ணப்பிக்க அனுமதி அளித்தனா். அந்த விண்ணப்பங்களை சட்டத்துக்கு உள்பட்டு பரிசீலிக்கவும் நீதிபதிகள் உத்தரவிட்டனா்.

2021, டிசம்பா் 31-ஆம் தேதி வரையில் நாட்டில் 22,762 என்ஜிஓக்கள் பதிவு செய்யப்பட்டுள்ளன. ஜனவரி 1-ஆம் தேதி இந்த எண்ணிக்கை 16,829-ஆக குறைந்தது. இந்த என்ஜிஓக்கள்தான் அங்கீகாரம் பெற்றவையாக கருதப்படுகிறது.

2020, செப்டம்பா் 29 முதல் 2021, டிசம்பா் 31 வரையில் 18,778 என்ஜிஓக்களின் பதிவு காலாவதியாகிவிட்டதாக மத்திய அரசு அதிகாரிகள் தெரிவித்துள்ளனா். அதில், 12,989 என்ஜிஓக்கள் பதிவை புதுப்பிக்க விண்ணப்பித்துள்ளன. விண்ணப்பிக்காத 5,789 என்ஜிஓக்களின் பதிவு ரத்து செய்யப்பட்டுள்ளதாகவும், 179 விண்ணப்பங்கள் பல்வேறு காரணங்களுக்காக நிராகரிக்கப்பட்டுள்ளதாகவும் உள்துறை அமைச்சக அதிகாரிகள் தெரிவித்திருந்தனா்.