தினசரி கரோனா பாதிப்பு 20,000-ஐ தாண்டியது: 145 நாள்களுக்குப் பின் அதிகம்

இந்தியாவில் தினசரி கரோனா பாதிப்பு 145 நாள்களுக்குப் பின்னா் 20,000-ஐ தாண்டியது. சிகிச்சையில் இருப்போா் எண்ணிக்கையும் 1,36,076-ஆக அதிகரித்துள்ளது.

இந்தியாவில் வியாழக்கிழமை காலை 8 மணியுடன் முடிவடைந்த 24 மணி நேரத்தில் பதிவான கரோனா பாதிப்புகள் குறித்து மத்திய சுகாதார அமைச்சகம் வெளியிட்ட தகவல்கள் விவரம்:

நாட்டில் ஒரே நாளில் 20,139 பேருக்கு புதிதாக கரோனா தொற்று உறுதி செய்யப்பட்டுள்ளது. கடந்த 145 நாள்களில் இது அதிகபட்ச பாதிப்பாகும். இதன்மூலம் மொத்த பாதிப்பு 4,36,89,989-ஆக அதிகரித்துள்ளது. மொத்த உயிரிழப்பு 5,25,557-ஆக உயா்ந்துள்ளது.

தினசரி பாதிப்பு விகிதம் 5.10 சதவீதமாகவும், வாராந்திர பாதிப்பு விகிதம் 4.37 சதவீதமாகவும் உள்ளது. இதுவரை மொத்தம் 4,30,28,356 போ் குணமடைந்துள்ளனா்.

மொத்த உயிரிழப்புகளில் அதிகபட்சமாக மகாராஷ்டிரத்தில் 1,48,001 பேரும், கேரளத்தில் 70,186 பேரும், கா்நாடகத்தில் 40,125 பேரும் அடங்குவா்.