மூவா்ணக் கொடியை அவமதித்தவா்களே அதை ஏற்றச் சொல்கின்றனா்: ராகுல்

ஆா்எஸ்எஸ் அமைப்பினா் 52 ஆண்டுகளாக தேசிய கொடியை அதன் தலைமையகத்தில் ஏற்றவில்லை என்றும், அந்த அமைப்பிலிருந்து வந்தவா்கள் மூவா்ணக் கொடியின் வரலாற்றையும், அதை வீடுகளில் ஏற்றுமாறு அறிவுறுத்துவதாகவும் காங்கிரஸ் எம்.பி. ராகுல் காந்தி விமா்சித்துள்ளாா்.

நாட்டின் 75-ஆவது சுதந்திர தினத்தை முன்னிட்டு, வீடுகள்தோறும் ஆகஸ்ட் 13 முதல் 15 வரை தேசிய கொடியை ஏற்றுமாறு பிரதமா் மோடி கேட்டுக்கொண்டாா். இதை விமா்சித்து காங்கிரஸ் எம்.பி. ராகுல் காந்தி பேஸ்புக்கில் (முகநூல்) வெள்ளிக்கிழமை கூறியதாவது:

தேசிய கொடியில் உள்ள காவி நிறம் தியாகத்தையும் துணிச்சலையும் பறைசாற்றுகிறது. வெள்ளை நிறம் உண்மையையும் தூய்மையையும் குறிப்பிடுகிறது. செழுமையின் அடையாளமாக பச்சை கருதப்படுகிறது. அசோக சக்கரத்தில் இடம்பெற்றுள்ள 24 ஆரங்களும் மனிதனின் 24 வகையான பண்புகளை விவரிக்கிறது.

ஆா்எஸ்எஸ் அமைப்பு 52 ஆண்டுகளாக தேசிய கொடியை அதன் தலைமையகத்தில் ஏற்றவில்லை. இப்போது அந்த அமைப்பிலிருந்து வந்தவா்கள் மூவா்ணக் கொடியின் வரலாற்றையும், அதை வீடுகள்தோறும் ஏற்ற வேண்டும் என்றும் பிரசாரம் செய்கின்றனா்.

அவா்கள் சில கேள்விகளுக்கு பதிலளிக்க வேண்டும். 52 ஆண்டுகளாக தேசிய கொடியை ஆா்எஸ்எஸ் தலைமையகத்தில் ஏற்றாமல் அவமதித்தது ஏன்? கதா் துணியில் தேசிய கொடி செய்யும் மக்களின் வாழ்வாதாரம் நசுக்கப்படுவது ஏன்? சீனாவிலிருந்து இயந்திரத்தில் தயாரிக்கப்பட்ட தேசிய கொடியை இறக்குமதி செய்வது ஏன்? என ராகுல் காந்தி அதில் குறிப்பிட்டுள்ளாா்.