மாநிலங்களவைத் தோ்தல்: மகாராஷ்டிரத்தில் 3 இடங்களில் பாஜக வெற்றி; ஆளும் கூட்டணிக்குப் பின்னடைவு

மகாராஷ்டிர மாநிலத்தில் 6 மாநிலங்களவை உறுப்பினா் இடங்களுக்கான தோ்தலில் 3 இடங்களில் பாஜக வெற்றி பெற்றது. இது ஆளும் கூட்டணிக்குப் பின்னடைவாக அமைந்தது.

கா்நாடகம், ராஜஸ்தான், மகாராஷ்டிரம், ஹரியாணாவில் 16 மாநிலங்களவை உறுப்பினா்களுக்கான தோ்தல் வெள்ளிக்கிழமை நடைபெற்றது. கா்நாடகம், ராஜஸ்தானில் தலா 4 இடங்களுக்கான தோ்தல் முடிவுகள் அன்றைய தினமே அறிவிக்கப்பட்டன.

மகாராஷ்டிரம், ஹரியாணாவில் காங்கிரஸ், சிவசேனை எம்எல்ஏ-க்கள் தோ்தல் விதிமுறைகளை மீறியதாக பாஜகவினா் குற்றஞ்சாட்டினா். இந்த விவகாரம் தொடா்பாக காங்கிரஸ், பாஜக என இருதரப்பிலும் தோ்தல் ஆணையத்திடம் புகாா் தெரிவிக்கப்பட்டது. அதன் காரணமாக வாக்கு எண்ணிக்கை சுமாா் 8 மணி நேரம் தாமதமடைந்தது.

தோ்தல் ஆணையத்தின் அனுமதியை அடுத்து வெள்ளிக்கிழமை நள்ளிரவுக்குப் பிறகே வாக்கு எண்ணிக்கை நடைபெற்றது. அதிகாலை 3 மணியளவில் முடிவுகள் அறிவிக்கப்பட்டன. மகாராஷ்டிரத்தில் காலியாகவுள்ள 6 இடங்களுக்கு நடைபெற்ற தோ்தலில் பாஜக 3 இடங்களையும், சிவசேனை, காங்கிரஸ், தேசியவாத காங்கிரஸ் ஆகியவை தலா ஓரிடத்தையும் கைப்பற்றின.

மாநிலத்தில் சிவசேனை-தேசியவாத காங்கிரஸ் -காங்கிரஸ் கூட்டணி ஆட்சியில் உள்ள நிலையில், பாதிக்குப் பாதி இடங்களில் பாஜக வெற்றி பெற்றிருப்பது ஆளும் கூட்டணிக்கு நெருக்கடியை ஏற்படுத்தியுள்ளது. பாஜக சாா்பில் போட்டியிட்ட மத்திய அமைச்சா் பியூஷ் கோயல், முன்னாள் மாநில அமைச்சா் அனில் போன்டே, தனஞ்செய் மஹாதிக் ஆகியோா் வெற்றி பெற்றனா். சிவசேனை தரப்பில் சஞ்சய் ரௌத், தேசியவாத காங்கிரஸின் பிரஃபுல் படேல், காங்கிரஸின் பிரதாப்கா்ஹி ஆகியோரும் வெற்றி பெற்றனா்.

சிவசேனை வேட்பாளா் சஞ்சய் பவாா் தோல்வியடைந்தாா்.

6-ஆவது இடத்துக்கு சிவசேனையின் சஞ்சய் பவாருக்கும், பாஜகவின் தனஞ்செய் மஹாதிக்கிற்கும் இடையே கடும் போட்டி நிலவியது. இரண்டாவது சுற்று வாக்கு எண்ணிக்கை முடிவில் மஹாதிக் 41 வாக்குகள் பெற்று வெற்றி பெற்றாா். சஞ்சய் பவாருக்கு 33 வாக்குகள் கிடைத்தன.

முன்னதாக, பாஜகவினா் அளித்த குற்றச்சாட்டின் காரணமாக, சிவசேனை எம்எல்ஏ சுகாஸ் காந்தேவின் வாக்கு செல்லாது எனத் தோ்தல் ஆணையம் அறிவித்தது. இது பாஜகவுக்கு சாதகமாக அமைந்தது. தோ்தல் ஆணையம் பாஜகவுக்கு ஆதரவாக நடந்துகொண்டதாக சிவசேனை செய்தித் தொடா்பாளா் சஞ்சய் ரௌத் குற்றஞ்சாட்டினாா்.

ஹரியாணாவில்... ஹரியாணாவில் 2 இடங்களுக்கு நடைபெற்ற தோ்தலில், பாஜக வேட்பாளா் கிருஷ்ணன் லால் பன்வா் வெற்றி பெற்றாா். பாஜக ஆதரவுடன் சுயேச்சையாகப் போட்டியிட்ட காா்த்திகேய சா்மாவும் வெற்றி பெற்றாா். காங்கிரஸ் சாா்பில் போட்டியிட்ட அஜய் மாக்கன் தோல்வியடைந்தாா்.

காங்கிரஸை சோ்ந்த எம்எல்ஏ குல்தீப் பிஷ்னோய் பாஜக வேட்பாளருக்கு வாக்களித்ததாலும், ஒரு காங்கிரஸ் எம்எல்ஏ-வின் வாக்கு செல்லாது என அறிவிக்கப்பட்டதாலும் அஜய் மாக்கன் தோல்வியடைந்தாா்.

தோ்தலில் வெற்றி பெற்றோருக்கு மாநில முதல்வா் மனோகா் லால் கட்டாா் வாழ்த்து தெரிவித்தாா். இந்த வெற்றி ஜனநாயகத்துக்குக் கிடைத்த வெற்றி எனத் தெரிவித்த அவா், காங்கிரஸ் எம்எல்ஏ குல்தீப் பிஷ்னோய், பாஜகவில் இணைய விரும்பினால் அவரை கட்சி வரவேற்கும் எனவும் தெரிவித்தாா்.

காங்கிரஸ் எம்எல்ஏ நீக்கம்: ஹரியாணாவில் நடைபெற்ற மாநிலங்களவைத் தோ்தலில் பாஜக வேட்பாளருக்கு ஆதவாக வாக்களித்த காங்கிரஸ் எம்எல்ஏ குல்தீப் பிஷ்னோய் அக்கட்சியின் அனைத்துப் பொறுப்புகளில் இருந்தும் நீக்கப்பட்டுள்ளாா்.

இது தொடா்பாக காங்கிரஸ் பொதுச் செயலாளா் கே.சி.வேணுகோபால் வெளியிட்ட அறிக்கையில், கட்சிப் பொறுப்புகளில் இருந்து குல்தீப் பிஷ்னோய் உடனடியாக நீக்கப்படுவதாகக் குறிப்பிட்டுள்ளாா்.

முன்னதாக, தனது விருப்பப்படி மாநிலங்களவைத் தோ்தலில் வாக்களித்ததாக குல்தீப் பிஷ்னோய் தெரிவித்திருந்தாா்.