இலங்கை: இரவுநேர உள்நாட்டு விமானங்களுக்கு விதிக்கப்பட்டிருந்த கட்டுப்பாடுகள் நீக்கம்

இலங்கையில் இரவு நேர உள்நாட்டு விமானச் சேவைகளுக்கு விதிக்கப்பட்ட கட்டுப்பாடுகள் இன்று முதல் நீக்கியுள்ளதாக சிவில் விமானப் போக்குவரத்து ஆணையம் தெரிவித்துள்ளது. 

உள்நாட்டு மோதலின்போது இந்த கட்டுப்பாடுகள் விதிக்கப்பட்டது. இது உள்நாட்டு விமானத் துறைக்கு தேவையற்ற சுமைகளை உருவாக்குவதாக சிவில் விமானப் போக்குவரத்து நிர்வாக இயக்குநர் தெமியா அபேவிக்ரம தெரிவித்தார். 

இரவு நேரம் பயணிகள் விமானத்திற்கு விதிக்கப்பட்ட கட்டுப்பாடு காரணமாக விமானத்தை இயக்குபவர்களுக்கும், பயணிகளுக்கும் தேவையற்ற சிரமங்கள் ஏற்படுவதோடு, கூடுதல் செலவு ஏற்படுகிறது. 

கட்டுப்பாடு நீக்கப்பட்ட நிலையில் உள்ளூர் விதிகள் மற்றும் சர்வதேச அளவில் விதிக்கப்பட்ட விதிமுறைகளைக் கடைப்பிடிக்க வேண்டும் என்று அபேவிக்ரம கூறினார்.