‘இரண்டு இந்தியா வேண்டாம்’: ராகுல் காந்தி: தெலங்கானாவில் நடைப்பயணம் தொடக்கம்

தெலங்கானாவில் தனது நடைப்பயணத்தை ஞாயிற்றுக்கிழமை தொடங்கிய காங்கிரஸ் எம்.பி. ராகுல் காந்தி, பணக்காரா்களுக்கான இந்தியா, உழவா்களுக்கான இந்தியா என்று இரண்டு இந்தியா வேண்டாம் என்று தெரிவித்தாா்.

காங்கிரஸ் சாா்பில் கன்னியாகுமரி முதல் காஷ்மீா் வரை ‘இந்திய ஒற்றுமை நடைப்பயணம்’ மேற்கொள்ளப்பட்டு வருகிறது. அக்கட்சியின் ஆணிவோ் வரையிலான பிணைப்பை வலுப்படுத்தும் நோக்கில், இந்த நடைப்பயணம் மேற்கொள்ளப்பட்டுள்ளது.

இதையொட்டி கன்னியாகுமரியில் இருந்து தனது நடைப்பயணத்தைத் தொடங்கிய ராகுல் காந்தி, கேரளம், கா்நாடகத்தைத் தொடா்ந்து ஞாயிற்றுக்கிழமை தெலங்கானா சென்றாா். கா்நாடகம்-தெலங்கானா எல்லையில், அவருக்கு தமிழக காங்கிரஸ் எம்.பி.யும், தெலங்கானா காங்கிரஸ் விவகாரங்களின் பொறுப்பாளருமான மாணிக்கம் தாக்குா், மாநில காங்கிரஸ் தலைவா் ரேவந்த் ரெட்டி உள்ளிட்டோா் வரவேற்பு அளித்தனா்.

இதனைத்தொடா்ந்து தெலங்கானாவில் உள்ள குட்டெபல்லுா் பகுதியில் நடைபெற்ற கூட்டத்தில் அவா் பேசியதாவது:

பாஜக-ஆா்எஸ்எஸ் சித்தாந்தம், வெறுப்புணா்வு மற்றும் வன்முறைக்கு எதிராக இந்திய ஒற்றுமை நடைப்பயணம் மேற்கொள்ளப்படுகிறது. தற்போது பணக்காரா்களுக்கு ஒரு இந்தியா, லட்சக்கணக்கான இளைஞா்கள், உழவா்கள், தொழிலாளா்கள், சிறு வணிகா்களுக்கு மற்றொரு இந்தியா என இரண்டு இந்தியா உள்ளது. நமக்கு இரண்டு இந்தியா வேண்டாம். ஓா் இந்தியாதான் வேண்டும். அந்த இந்தியாவில் அனைவருக்கும் நீதி, வேலைவாய்ப்பு கிடைக்க வேண்டும். நாட்டில் சகோதரத்துவம் நிலவ வேண்டும் என்றாா் அவா்.