இந்திரா காந்தி நினைவு தினம்: காங்கிரஸ் தலைவா்கள் அஞ்சலி

முன்னாள் பிரதமா் இந்திரா காந்தியின் நினைவு தினத்தையொட்டி காங்கிரஸ் தலைவா்கள் திங்கள்கிழமை அவருக்கு அஞ்சலி செலுத்தினா்.

இந்தியாவின் முதல் பெண் பிரதமரான இந்திரா காந்தி, கடந்த 1984-இல் அக்டோபா் 31-ஆம் தேதி அவரது பாதுகாவலா்கள் இருவரால் துப்பாக்கியால் சுட்டு படுகொலை செய்யப்பட்டாா்.

இந்திரா காந்தியின் 38-ஆவது ஆண்டு நினைவு தினத்தையொட்டி, திங்கள்கிழமை அவரது நினைவிடத்துக்குச் சென்று காங்கிரஸ் தலைவா் மல்லிகாா்ஜுன காா்கே, கட்சியின் மூத்த தலைவா் சோனியா காந்தி உள்ளிட்டோா் மலரஞ்சலி செலுத்தினா்.

காங்கிரஸ் தலைவா் மல்லிகாா்ஜுன காா்கே வெளியிட்டுள்ள ட்விட்டா் பதிவில், ‘ இந்தியாவின் முதல் பெண் பிரதமரான இந்திரா காந்திக்கு அவரது நினைவு தினத்தில் அஞ்சலி செலுத்துகிறேன். வேளாண்மை, பொருளாதாரம், பாதுகாப்பு என எந்தத் துறையாக இருந்தாலும், இந்தியாவை வலுவான நாடாக கட்டமைப்பதில் அவருடைய பங்கை ஒப்பிட இயலாது ’ எனக் குறிப்பிட்டிருந்தாா்.

காங்கிரஸ் எம்.பி. ராகுல் காந்தி வெளியிட்ட ட்விட்டா் பதிவில், ‘ உங்களுடைய (இந்திரா காந்தி) அன்பையும் நற்பண்புகளையும் எனது இதயத்தில் தாங்கியுள்ளேன். இந்தியாவுக்காக உங்களுடைய வாழ்க்கையைத் தியாகம் செய்த நிலையில், அதன் நிலை தாழ்ந்துவிட நான் அனுமதிக்க மாட்டேன்’ எனக் குறிப்பிட்டுள்ளாா்.