குடியரசுத் தலைவர் தேர்தலில் எதிர்க்கட்சிகளின் சார்பில் பொது வேட்பாளராக முன்னாள் மத்திய அமைச்சர் யஷ்வந்த் சின்ஹ போட்டியிடக் கூடிய வாய்ப்பு உருவாகி வருகிறது.
திரிணமுல் காங்கிரஸில் இணைந்து செயல்பட்டு வந்த யஷ்வந்த் சின்ஹ, எதிர்க்கட்சிகளின் ஒற்றுமை, தேசிய நலன் கருதி, கட்சியிலிருந்து விலகுவதாக அறிவித்துள்ளார்.
குடியரசுத் தலைவர் தேர்தலில் போட்டியிடப் பொது வேட்பாளராக யஷ்வந்த் சின்ஹ பெயரைத் திரிணமுல் காங்கிரஸ் தலைவரும் மேற்கு வங்க முதல்வருமான மம்தா பானர்ஜி பரிந்துரைத்துள்ளதாகக் கூறப்பட்ட நிலையில் இந்த முடிவை அறிவித்துள்ளார் சின்ஹ.
தனக்கு மம்தா அளித்துவந்த மதிப்புக்கும் மரியாதைக்கும் மிக்க நன்றி என்று குறிப்பிட்டுள்ள சின்ஹ, நாட்டு நலன் கருதித் தாம் கட்சியிலிருந்து விலக வேண்டியுள்ளதாகவும் இதை மம்தாவும் ஒப்புக்கொள்வார் என்றும் ட்விட்டர் பதிவொன்றில் தெரிவித்துள்ளார்.
குடியரசுத் தலைவர் தேர்தலில் எதிர்க்கட்சிகளின் சார்பில் போட்டியிடும் பொது வேட்பாளரைத் தெரிவு செய்வதற்கான கூட்டம், இன்று பிற்பகலில் தில்லியில் நடைபெறவுள்ளது குறிப்பிடத் தக்கது.
இந்தக் கூட்டத்தின் முடிவில் வேட்பாளராக சின்ஹவை அறிவிக்கும் வாய்ப்பு இருக்கிறது.
ஏற்கெனவே, எதிர்க்கட்சிகளின் பொது வேட்பாளராகப் போட்டியிடும் வாய்ப்பை தேசியவாத காங்கிரஸ் தலைவர் சரத் பவார், ஜம்மு - காஷ்மீர் தேசிய மாநாட்டுக் கட்சித் தலைவர் பாரூக் அப்துல்லா, மகாத்மா காந்தியின் பேரன் கோபாலகிருஷ்ண காந்தி ஆகியோர் மருத்துவிட்டனர்.