இலங்கைக்கு எதிரான இரண்டாவது டெஸ்ட் கிரிக்கெட் போட்டியின்போது, ஜாஸ்பிரித் பும்ராவின் பெளலிங் ஸ்டைலை மைதானத்தில் விராட் கோலி செய்து காண்பித்தார்.
விராட் கோலியின் குறும்புத்தனமான இந்த செயலை, பும்ரா உள்பட சக வீரர்கள் அனைவரும் கண்டு ரசித்தனர்.
விராட் கோலி ஆக்ரோஷமான ஆட்டக்காரர், கராறான கேப்டன் என்பது நாம் அனைவரும் அறிந்ததுதான். அதேபோன்றே விராட் கோலியின் குறும்புத்தனமாக மறுபுறத்தையும் சமூக வலைதளங்கள் வாயிலாகவும், அவரது சமூக வலைதளப் பதிவுகள் மூலமும் பலர் அடிக்கடி காண நேரிடுவதுண்டு.
அந்தவகையில், இலங்கைக்கு எதிரான இரண்டாவது டெஸ்ட் கிரிக்கெட் போட்டியின்போது, பும்ராவின் பெளலிங் ஸ்டைலை விராட் கோலி சின்னசாமி மைதானத்தில் செய்து காண்பித்தார்.
இலங்கைக்கு எதிரான இரண்டாவது டெஸ்ட் கிரிக்கெட் போட்டி பெங்களூரு சின்னாசாமி மைதானத்தில் நடைபெற்று வருகிறது. இரண்டாவது டெஸ்ட் போட்டியின் முதல் இன்னிங்ஸில் 109 ரன்களுக்கு இலங்கை அணி சுருண்டது.
இந்த ஆட்டத்தில் ஜாஸ்பிரித் பும்ரா அதிகபட்சமாக 5 விக்கெட்டுகளை வீழ்த்தினார். இரண்டாவது இன்னிங்சை இந்திய அணி தொடங்குவதற்கு முன்பு, வீரர்களை மைதானத்தின் பிரித்து அனுப்பும்போது, பும்ராவின் பெளலிங் ஸ்டைலை விராட் கோலி சக வீரர்களிடம் செய்து காண்பித்தார்.
சக வீரர்களை பதற்றமின்றி வைத்துக்கொள்ளும் வகையில், பும்ராவின் ஸ்டைலில் பெளலிங் போட்டு காண்பித்த விராட் கோலியின் செயலை, சக வீரர்கள் வெகுவாக கண்டு ரசித்தனர். பும்ராவும் இதனைக் கையைத் தட்டி வரவேற்றார். மைதானத்தில் இருந்த ரசிகர்களும் இதனை ரசித்தனர். இந்த விடியோ இணையத்தில் அதிகம் பகிரப்பட்டு வருகிறது.
இரண்டாவது டெஸ்ட் போட்டியின் இரண்டாவது இன்னிங்சை இந்திய அணி தற்போது விளையாடி வருகிறது.