இருசக்கர வாகனத்தில் அதிவேகமாகச் சென்ற பிரபல யூடியூபர் சாலை விபத்தில் பலியானார்.
மத்தியப் பிரதேசத்தைச் சேர்ந்த பிரபல யூடியூபர் அபியுதேய் மிஸ்ரா. இவர் ‘ஸ்கைலார்ட்’(skylord) என்கிற பெயரில் யூடியூப் சேனல் ஒன்றை தொடங்கி அதில் பப்ஜி மற்றும் இணைய கேம்களை எளிதாக விளையாடுவதற்கான முறைகளைக் கூறிவந்துள்ளார்.
இதனால், விரைவிலேயே அவருடைய யூடியூப் சந்தாதாரர்களின் எண்ணிக்கை 16 லட்சமாக உயர்ந்தது. இதன் மூலம் நல்ல வருவாயும் வந்ததால் விலை உயர்ந்த இருசக்கர வாகனத்தை வாங்கி அதில் பயணங்களை மேற்கொள்வதை வாடிக்கையாக வைத்துள்ளார்.
இந்நிலையில், கடந்த ஞாயிற்றுக்கிழமை அவர் போபாலிலிருந்து சோஹாக்பூர் அருகே உள்ள நெடுஞ்சாலையில் அதிவேகமாக சென்று கொண்டிருந்ததாகக் கூறப்படுகிறது. அப்போது, எதிரே வந்த லாரியின் மீது மோதிய அபியுதேய் சம்பவ இடத்திலேயே பலியானார்.
யூடியூப் மட்டுமல்லாது டிவிட்டர், இன்ஸ்டாகிராம் பக்கங்களிலும் இவரை பின்தொடர்பவர்களின் எண்ணிக்கை அதிகம்.
அபியுதேய் மிஸ்ராவின் திடீர் இழப்பு அவரின் ரசிகர்களுக்கு அதிர்ச்சியை ஏற்படுத்தியுள்ளது.