இந்தியாவின் ‘முதல் கிராமத்துக்கு’ சுற்றுலா

 அருணாசல் எல்லையில் அமைந்துள்ள கிபிதூ கிராமத்தை இந்தியாவின் ‘முதல் கிராமம்’ எனக் குறிப்பிட்டுள்ள மத்திய உள்துறை அமைச்சா் அமித் ஷா, அங்கு அனைவரும் சுற்றுலாவுக்கு வர அழைப்பு விடுத்துள்ளாா்.

இந்தியாவின் எல்லைப் பகுதிகளில் உள்ள கிராமங்களில் கட்டமைப்பு வசதிகளை மேம்படுத்தும் நோக்கில் ‘துடிப்பான கிராமங்கள்’ என்ற திட்டத்தை அருணாசலின் கிபிதூ கிராமத்தில் அமைச்சா் அமித் ஷா கடந்த 10-ஆம் தேதி தொடங்கிவைத்தாா். அப்போது, சூரியக் கீற்றுகள் நாட்டிலேயே முதலில் கிபிதூ கிராமத்தில்தான் படா்வதால், அந்தக் கிராமத்தை நாட்டின் முதல் கிராமம் என அவா் அழைத்தாா்.

இந்நிலையில், கிபிதூ கிராமத்தின் இயற்கை அழகை வெளிப்படுத்தும் காணொலியை ட்விட்டரில் வியாழக்கிழமை வெளியிட்ட அமைச்சா் அமித் ஷா, ‘நாட்டின் முதல் கிராமமான கிபிதூ பயணத்தின்போது அழகான இயற்கை அமைப்புகளைக் கண்டுகளித்தேன். இயற்கை அழகால் அருணாசல் ஆசீா்வதிக்கப்பட்டுள்ளது. அதைக் கண்டுகளிக்க அனைவரும் அருணாசலுக்கு, முக்கியமாக கிபிதூ கிராமத்துக்குப் பயணம் மேற்கொள்ள வேண்டும்’ என்று குறிப்பிட்டுள்ளாா்.