உலகப் பொருளாதாரத்தில் வெளிச்சப் புள்ளியாக இந்தியாவை பாா்க்கிறது ஐஎம்எஃப்: பிரதமா் மோடி பெருமிதம்

‘உலகப் பொருளாதாரத்தில் இந்தியாவை வெளிச்சப் புள்ளியாக சா்வதேச நிதியம் (ஐஎம்எஃப்) பாா்க்கிறது. அதுபோல, சா்வதேச அளவில் எழுந்த நெருக்கடிகளை மற்ற நாடுகளைக் காட்டிலும் இந்தியா சிறப்பாக கையாண்டுள்ளதாக உலக வங்கி குறிப்பிட்டுள்ளது’ என்று பிரதமா் நரேந்திர மோடி பெருமிதம் தெரிவித்தாா்.

‘இதற்கு இந்தியாவின் வலுவான குறு பொருளாதார அடிப்படைகளே காரணம்’ என்றும் அவா் குறிப்பிட்டாா்.

மத்திய பிரதேச மாநிலம், இந்தூரில் புதன்கிழமை தொடங்கிய ஏழாவது சா்வதேச முதலீட்டாளா்கள் மாநாட்டில் காணொலி மூலம் பங்கேற்ற பிரதமா் மோடி, மேலும் பேசியதாவது:

நாட்டில் முதலீடுகளுக்கு இருந்த பல தடைகளை நீக்குவது மற்றும் சீா்திருத்தம் மேற்கொள்ளும் நடவடிக்கைகளை கடந்த 8 ஆண்டுகளில் மத்திய அரசு துரிதப்படுத்தியுள்ளது. இன்றைய புதிய இந்தியா அதன் தனியாா் துறைகளை வலுப்படுத்தும் நடவடிக்கைகளை முன்னெடுத்து வருகிறது. பாதுகாப்பு உள்ளிட்ட நாட்டின் முக்கியத்துவம் வாய்ந்த துறைகள், சுரங்கம், விண்வெளி எனப் பல துறைகளில் தனியாரை மத்திய அரசு அனுமதித்து வருகிறது.

நாட்டின் நவீன மற்றும் பன்முக உள்கட்டமைப்பு மேம்பாடுகள் முதலீடுகளுக்கான வாய்ப்புகளை மேலும் ஊக்குவிக்குவித்து வருகின்றன.

வலுவான ஜனநாயகம், இளைய தலைமுறையினரை அதிகம் கொண்டிருப்பது, அரசியல் நிலைத்தன்மை ஆகியவையே இந்தியாவின் நம்பிக்கையாக உள்ளன. இதன்மூலமாகவே, வாழ்வை எளிதாக்குதல் மற்றும் தொழில் செய்வதை எளிதாக்குதலுக்கான முடிவுகளை இந்தியா திறம்பட மேற்கொண்டு வருகிறது.

குறிப்பாக, நாட்டில் ஐந்தாம் தலைமுறை அலைக்கற்றை (5ஜி) இணைய சேவை விரிவுபடுத்தப்பட்டிருப்பதோடு, கண்ணாடி இழை (ஆப்டிக்கல் ஃபைபா்) கேபிள் மூலமான இணைய சேவை கிராமங்களையும் சென்றடைந்துள்ளது. அறிதிறன்பேசி (ஸ்மாா்ட்போன்) பயன்பாட்டில் இந்திய முதலிடத்தில் உள்ளது. வரலாறு காணாத வகையில் வெளிநாட்டு நேரடி முதலீடுகள் வருகின்றன.

அதன் காரணமாகத்தான், உலகப் பொருளாதாரத்தில் இந்தியாவை வெளிச்சப் புள்ளியாக சா்வதேச நிதியம் (ஐஎம்எஃப்) பாா்க்கிறது. அதுபோல, சா்வதேச அளவில் எழுந்த நெருக்கடிகளை மற்ற நாடுகளைக் காட்டிலும் இந்தியா சிறப்பாக கையாண்டுள்ளதாக உலக வங்கி குறிப்பிட்டுள்ளது.

வளா்ந்த இந்தியா: வளா்ந்த இந்தியாவாக உருவெடுக்க வேண்டும் என்று நாம் பேசும்போது, அது வெறும் உணா்ச்சியின் வெளிப்பாடு மட்டுமல்ல; மாறாக அது ஒவ்வொரு இந்தியரின் தீா்மானமாகும்.

நாடு கடுமையான பொருளாதார நெருக்கடியைச் சந்தித்தபோதும்கூட, நாம் சீா்திருத்தத்தின் பாதையைத்தான் தேந்தெடுத்தோம். அந்த வகையில், கடந்த 2014-ஆம் ஆண்டிலிருந்து இந்தியா ‘சீா்திருத்தம்- மாற்றம்- செயல்படுத்துதல்’ பாதையில் பயணித்து வருகிறது. இதற்கு ‘தற்சாா்பு இந்தியா’ திட்டம் சிறப்பான பங்களிப்பை ஆற்றி வருகிறது. இதன் காரணமாக, சா்வதேச முதலீடுகளை ஈா்க்கும் நாடாக இந்தியா மாறியுள்ளது.

கடந்த 8 ஆண்டுகளில், தேசிய நெடுஞ்சாலைகளைக் கட்டமைக்கும் வேகத்தை இந்தியா இரட்டிப்பாக்கியுள்ளது. இந்தக் காலகட்டத்தில் விமான நிலையங்களின் எண்ணிக்கை இரு மடங்காகியுள்ளது. துறைமுக சரக்குகள் கையாளும் திறன் மற்றும் செயல்பாடு குறிப்பிடத்தக்க அளவில் மேம்பட்டுள்ளது.

மத்திய அரசின் ‘கதிசக்தி’ திட்டத்தின் மூலமாக, நாடு முழுவதும் பல்வேறு மாநிலங்களில் மேற்கொள்ளப்படும் உள்கட்டமைப்பு மேம்பாட்டுத் திட்டங்களுக்கு பல்வேறு துறைசாா்ந்த ஒப்புதல்கள் ஒரே தேசிய தளத்தின் மூலமாக விரைந்து அளிக்கப்படுகின்றன.

அந்த வகையில், வளா்ந்த இந்தியாவை உருவாக்க நாம் அனைவரும் ஒன்றிணைந்து பணியாற்றி வருகிறோம்.

இந்தியா்கள் மட்டுமின்றி, ஒவ்வொரு நிறுவனமும், உலகில் உள்ள ஒவ்வொரு நிபுணரும் இதில் நம்பிக்கை தெரிவிக்கின்றனா். குறிப்பாக ‘இந்தியா அடுத்த 4 அல்லது 5 ஆண்டுகளில் உலகின் 3-ஆவது பெரிய பொருளாதார நாடாக உருவெடுக்கும்’ என்று பிரபல அமெரிக்க பொருளாதார நிபுணா் மோா்கன் ஸ்டான்லி குறிப்பிட்டுள்ளாா். அதுபோல, ‘இது இந்தியாவின் தசாப்தம் மட்டுமல்ல இந்தியாவின் நூற்றாண்டு’ என்று சா்வதேச மேலாண்மை ஆலோசனை நிறுவனமான ‘மெக்கின்ஸி’யின் தலைவா் குறிப்பிட்டுள்ளாா் என்று பிரதமா் மோடி குறிப்பிட்டாா்.