ஹைதராபாத்தின் பெயர் மாற்றப்படும்: மத்திய அமைச்சர் கிஷன் ரெட்டி

பாஜக ஆட்சிக்கு வந்தால் ஹைதராபாத்தின் பெயரை பாக்யங்கர் என்று மாற்றப்படும் என்று மத்திய அமைச்சர் கிஷன் ரெட்டி தெரிவித்துள்ளார்.

மத்திய அமைச்சரும், தெலங்கானா பாஜக தலைவருமான கிஷன் ரெட்டி, மாநிலத்தில் தங்களது கட்சி ஆட்சிக்கு வந்தால், ஹைதராபாத் 'பாக்யநகர்' என்று பெயர் மாற்றப்படும் என்று திங்கள்கிழமை தெரிவித்தார்.

மெட்ராஸ், பம்பாய், கல்கட்டா போன்ற நகரங்களின் பெயர்கள் மாற்றப்பட்டுள்ளதாக கிஷன் ரெட்டி தெரிவித்தார். மேலும் செய்தியாளர்களிடம் அவர் தெரிவித்ததாவது:

"ஹைதர் யார் என்று கேட்கிறேன். ஹைதர் என்ற பெயர் தேவையா? ஹைதர் எங்கிருந்து வந்தார்? ஹைதர் யாருக்காக வேண்டும் என்று கேட்கிறேன். பாஜக ஆட்சிக்கு வந்தால், ஹைதராபாத் என்ற பெயரை நீக்கிவிட்டு, பாக்யநகர் என்ற பெயரை மாற்றுவோம்'' என்றார்.

"ஏன் பெயரை மாற்றக் கூடாது. மெட்ராஸ் என்ற பெயரை சென்னை என்று பாஜக மாற்றவில்லை, திமுகதான் மாற்றியது.

மெட்ராஸை சென்னை என்றும், பம்பாய்க்கு மும்பை என்றும், கல்கத்தாவை கொல்கத்தா என்றும் மாற்றியுள்ளனர். அதேபோல் ஹைதராபாத் என்ற பெயரை பாக்யநகர் என்று மாற்றுவதில் என்ன தவறு இருக்கிறது.

இதையும் படிக்க: குஜராத்தில் மின்னலுக்கு 24 பேர் பலி!

பெயர்களை மாற்றுவது குறித்து புத்திசாலிகளின் ஆலோசனையையும் பாஜக ஏற்கும் என்றும், பாக்யநகர் என்றால் அதிருஷ்ட நகரம் என்று பொருள்" என்றும்  அவர் கூறினார்.