நாற்காலியை மட்டுமே ராகுல் துரத்துகிறார்: கங்கனா

காங்கிரஸ் தலைவர் ராகுல் காந்தியை தெளிவற்றவர் என்று கங்கனா ரணாவத் விமர்சித்துள்ளார்.

முன்னாள் இந்திய பிரதமர் இந்திரா காந்தியின் கதாபாத்திரத்தை சித்திரிக்கும் எமர்ஜென்சி என்ற புதிய படத்தில் இந்திரா காந்தியின் தோற்றத்தில் பாஜக எம்.பி.யும் நடிகையுமான கங்கனா ரணாவத் நடித்துள்ளார்.

இந்த நிலையில், எமர்ஜென்சி படம் குறித்த தொலைக்காட்சி உரையாடலில் பேசிய கங்கனா, ``ஒரு தலைவராக தான் யார்? என்பது குறித்து ராகுலுக்கு ஒரு தெளிவான யோசனை இல்லை என்று தெரிகிறது. ஒரு நாற்காலியை மட்டுமே அவர் துரத்துகிறார்.

எப்போதுமே தனது பேச்சுகளிலும், நடத்தையிலும் குழப்பமாகவே அவர் இருக்கிறார். பிரதமர் மோடி தலைமையிலான மத்திய அரசை தாக்க, மக்களவையில் சிவபெருமான் படத்தைப் பயன்படுத்தியது தொடர்பான சர்ச்சையின்போது, ராகுல் காந்தி மீது போதைப்பொருள் சோதனை மேற்கொள்ள வேண்டும் என்று தான் நினைத்தேன்’’ என்று கூறியுள்ளார்.

மேலும், இந்திரா காந்தியையும் குறிப்பிட்ட கங்கனா ``அனைவராலும் இந்திராகாந்தி மிகவும் நேசிக்கப்பட்டார்; ஆனால், அதைவிட அதிகமாக வெறுக்கவும்பட்டார்’’ என்று கூறினார்.