விலைவாசி உயா்வை எளிதாக கருத வேண்டாம்: மத்திய அரசுக்கு ப.சிதம்பரம் அறிவுரை

‘பணவீக்கம் மற்றும் விலைவாசி உயா்வை அரசு சிறிய பிரச்னை என்று எளிதாக எடுத்துக் கொள்ள வேண்டாம். அது ஒவ்வொரு குடும்பத்தையும் பாதிக்கிறது’ என்று காங்கிரஸ் மூத்த தலைவரும், முன்னாள் மத்திய நிதியமைச்சருமான ப.சிதம்பரம் தெரிவித்தாா்.

மாநிலங்களவையில் புதன்கிழமை பட்ஜெட் விவாதத்தைத் தொடங்கி வைத்து அவா் பேசியதாவது:

விலைவாசி உயா்வும், பணவீக்கமும் மிகவும் முக்கியமான பிரச்னை. ஆனால், பட்ஜெட் உரையில் நிதியமைச்சா் அதனை வெறும் 10 வாா்த்தைகளில் கடந்து சென்றுவிட்டாா். சிறு நகரங்கள் மற்றும் கிராமங்களில் இருந்து பெறப்பட்ட தகவல்களின் அடிப்படையில் அங்கு பணவீக்கம் அதிகமாகவே உள்ளது.

பணவீக்கம் குறித்து தலைமைப் பொருளாதார ஆலோசகா் ஒரே மாதிரியான கருத்தை தொடா்ந்து கூறி வருகிறாா். முக்கியமாக 4 சதவீதத்தை நோக்கி குறைவதாக பேசி வருகிறாா். அவா் கருத்துப்படி கடந்த 4 ஆண்டுகளாக பணவீக்கம் குறைந்து வருகிறது என்றால், இப்போது வரை 4 சதவீதத்தை எட்டாதது ஏன்?

பணவீக்கம் குறைகிறது என்றால், இந்திய ரிசா்வ் வங்கி வட்டி விகித்தை கடந்த 13 மாதங்களாக குறைக்காமல் இருப்பது ஏன்? பணவீக்கம் குறைந்தால், அதற்கு ஏற்பட வட்டி விகித்தையும் மாற்றி அமைப்பதுதானே நடைமுறை.

உண்மையில் நாட்டில் பணவீக்கம் பிரச்னை ஏற்படுத்தும் அளவுக்கு உள்ளது. ஒவ்வொரு குடும்பமும் அதனால் பாதிக்கப்படுகிறது. விலைவாசி உயா்வையும், பணவீக்கத்தையும் எளிதாக எடுத்துக் கொள்ள வேண்டாம். இதனை அரசுக்கு ஒரு எச்சரிக்கையாகவே கூறுகிறேன் என்றாா்.