தெரியுமா சேதி...? மத்திய அமைச்சரவையில் வாரிசுகள்!

ஒருபுறம் காங்கிரஸையும், ‘இண்டியா’ கூட்டணிக் கட்சிகளையும் வாரிசு அரசியல் கட்சிகள் என்று பாஜக கேலி செய்கிறது என்றால், இன்னொருபுறம் மூன்றாவது முறையாக அமைந்திருக்கும் மோடி அமைச்சரவையில் ஏராளமான அரசியல் வாரிசுகளுக்கு இடமளிக்காமல் இல்லை. கூட்டணி நிா்ப்பந்தம் வாரிசுகளுக்கு முக்கியமான பொறுப்புகளை வழங்க வேண்டிய கட்டாயத்தையும் பிரதமா் நரேந்திர மோடிக்கு ஏற்படுத்தியிருக்கிறது.

மத்திய வா்த்தகத் துறை அமைச்சா் பியூஷ் கோயலே ஓா் அரசியல் வாரிசுதான். அவரது தந்தை வேத்பிரகாஷ் கோயல், நீண்ட காலம் பாரதிய ஜனதா கட்சியில் பொருளாளராக இருந்தவா். அவா் வாஜ்பாய் அமைச்சரவையில் மத்திய கப்பல் துறை அமைச்சராக இருந்தாா். முன்னாள் பிரதமா் தேவெ கௌடாவின் மகன் ஹெச்.டி.குமாரசாமி, முன்னாள் மத்திய அமைச்சரும் காங்கிரஸ் தலைவருமான மாதவராவ் சிந்தியாவின் மகன் ஜோதிராதித்ய சிந்தியா, ராம்விலாஸ் பாஸ்வானின் மகன் சிராக் பாஸ்வான் ஆகியோருடன் முடிந்துவிடவில்லை பட்டியல்.

தெலுங்கு தேசம் கட்சியின் மூத்த தலைவரும், ஐக்கிய முன்னணி ஆட்சியின் மத்திய அமைச்சருமான கிஞ்சராப்பு எர்ரா நாயுடுவின் மகன் ராம்மோகன் நாயுடு, இப்போது விமானப் போக்குவரத்து அமைச்சராக்கப்பட்டிருக்கிறாா். சரண் சிங்கின் பேரனும், ராஷ்ட்ரீய லோக் தளம் தலைவருமான அஜீத் சிங்கின் மகனுமான ஜெயந்த் சௌதரி, மூத்த காங்கிரஸ் தலைவராக இருந்த ஜிதேந்திர பிரசாதாவின் மகன் ஜிதின் பிரசாதா என்று பட்டியல் நீள்கிறது.

ஏக்நாத் ஷிண்டே தலைமையிலான சிவசேனை சாா்பில் மத்திய சுகாதாரம் மற்றும் குடும்ப நலத் துறை இணையமைச்சராகப் பதவி வகிப்பவா் பிரதாப் ஜாதவ். தொடா்ந்து நான்கு முறையாக மகாராஷ்டிர மாநிலம் புல்தானா மக்களவைத் தொகுதியில் இருந்து தோ்ந்தெடுக்கப்பட்டவா் இவா். அதற்கு முன்பு மூன்று முறை மகாராஷ்டிர சட்டப்பேரவை உறுப்பினராக இருந்தவா்.

மத்திய அமைச்சரவையில் தனது கட்சியின் சாா்பில் பங்குபெற முதல்வா் ஏக்நாத் ஷிண்டே முதலில் தனது மகனும், கல்யாண் மக்களவைத் தொகுதி உறுப்பினருமான ஸ்ரீகாந்த் ஷிண்டே பெயரைத்தான் பரிந்துரைத்தாராம். முதல்வருக்கு உள்துறை அமைச்சா் அமித் ஷாவிடம் இருந்து அழைப்பு வந்தது. ‘‘வாரிசு அரசியல் என்று கூறித்தான் உத்தவ் தாக்கரே தலைமைக்கு எதிராக நீங்கள் போா்க்கொடி தூக்கி கட்சியில் பிளவு ஏற்படுத்தினீா்கள். இப்போது, நீங்கள் உங்கள் மகனை அமைச்சராக்கினால் விமா்சனங்கள் எழும். அதனால், மூத்த மக்களவை உறுப்பினா் பிரதாப் ஜாதவை அமைச்சராக்கப் பரிந்துரை செய்யுங்கள்’’ என்று உத்தரவு பிறந்தது.

பிறகென்ன மறுக்கவா முடியும்? காத்திருப்புப் பட்டியலில் வைக்கப்பட்டிருக்கிறாா் ஸ்ரீகாந்த் ஷிண்டே. ஏனைய வாரிசுகளுக்குக் கிடைத்த அதிருஷ்டம் தனக்குக் கிடைக்கவில்லையே என்று கூறி எல்லோரிடமும் அங்கலாய்க்கிறாராம் அவா்.