முஸ்லிம் இடஒதுக்கீடு: பாஜக பதிவை நீக்க வேண்டும்: எக்ஸ் தளத்துக்கு தோ்தல் ஆணையம் அறிவுறுத்தல்

புது தில்லி: முஸ்லிம் இடஒதுக்கீடு குறித்த சா்ச்சை கருத்து அடங்கிய கேலிசித்திர விடியோவை வெளியிட்ட கா்நாடக பாஜகவின் பதிவை உடனடியாக நீக்குமாறு ‘எக்ஸ்’ வலைதளத்தை இந்திய தோ்தல் ஆணையம் செவ்வாய்க்கிழமை அறிவுறுத்தியது.

கா்நாடத்தின் 28 மக்களவைத் தொகுதிகளில் 14 தொகுதிகளுக்கு கடந்த மாதம் 26-ஆம் தேதி வாக்குப்பதிவு நிறைவுற்ற நிலையில், மற்ற 14 தொகுதிகளுக்கு செவ்வாய்க்கிழமை வாக்குப்பதிவு நடைபெற்றது.

முன்னதாக, 3-ஆம் கட்ட தோ்தல் பிரசாரம் அனல் பறந்த கட்டத்தில், பழங்குடியினா், பட்டியலினத்தவா், ஓபிசி பிரிவினரிடமிருந்து இடஒதுக்கீட்டைப் பறித்து முஸ்லிம் சமூகத்தினருக்கு காங்கிரஸ் வழங்குவதாக சித்தரிக்கப்பட்ட விடியோ ஒன்று கா்நாடக பாஜகவின் எக்ஸ் சமூக ஊடகப் பக்கத்தில் வெளியிடப்பட்டது.

பட்டியலினத்தவா் மற்றும் முஸ்லிம்கள் இடையே பகைமையை ஏற்படுத்தும் இந்தப் பதிவு குறித்து நடவடிக்கை கோரி கா்நாடக மாநிலத் தலைமைத் தோ்தல் அதிகாரியிடம் காங்கிரஸ் புகாரளித்தது. அதன்படி, விடியோவை நீக்க கோரிய கா்நாடக தோ்தல் அதிகாரியின் உத்தரவை எக்ஸ் வலைதளம் இன்னும் செயல்படுத்தவில்லை.

இதையடுத்து, எக்ஸ் வலைதளத்துக்கு தோ்தல் ஆணையம் செவ்வாய்க்கிழமை எழுதிய கடிதத்தில், ‘கா்நாடக பாஜகவின் குறிப்பிட்ட அந்த சமூக வலைதளப் பதிவு தோ்தல் ஆணையத்தின் விதிகளுக்குப் புறம்பானது. இதுதொடா்பாக கா்நாடக தலைமைத் தோ்தல் அதிகாரி வழக்குப்பதிவு செய்துள்ளாா். மேலும், தகவல் தொழில்நுட்பச் சட்ட விதிகளின்படி விடியோ பதிவை வலைதளத்தில் இருந்து நீக்குமாறு மாநிலத் தலைமைத் தோ்தல் அதிகாரி உத்தரவிட்டுள்ளாா். ஆனால், அந்த உத்தரவு இன்னும் செயல்படுத்தப்படாமல் உள்ளது. எனவே, சா்ச்சை பதிவை எக்ஸ் வலைதளத்திலிருந்து உடனடியாக நீக்க வேண்டும்’ என அறிவுறுத்தப்பட்டுள்ளது.