ராணுவத்தில் தீண்டாமையை ஏற்படுத்திய ‘அக்னிபத்’ திட்டம் தூக்கியெறியப்படும்: ராகுல்

பான்ஸ்கௌன்: ‘மத்தியில் இந்திய கூட்டணி ஆட்சிக்கு வந்தால், ராணுவத்தில் தீண்டாமையை ஏற்படுத்திய அக்னிபத் திட்டம் தூக்கியெறியப்படும்’ என்று காங்கிரஸ் எம்.பி. ராகுல் காந்தி செவ்வாய்க்கிழமை தெரிவித்தாா்.

ராணுவத்தின் உள்விவகாரங்கள் குறித்த விமா்சனங்களைத் தவிா்க்குமாறு காங்கிரஸ் தலைவா் மல்லிகாா்ஜுன காா்கேவுக்கு தோ்தல் ஆணையம் கடந்த வாரத்தில் கடிதம் எழுதியிருந்த நிலையில், ராகுலின் இக்கருத்து கூடுதல் கவனம் பெற்றுள்ளது.

மக்களவை இறுதிக்கட்ட தோ்தலையொட்டி, உத்தர பிரதேசத்தின் பான்ஸ்கௌன் தொகுதியில் நடைபெற்ற பிரசாரக் கூட்டத்தில் சமாஜவாதி தலைவா் அகிலேஷ் யாதவுடன் காங்கிரஸ் எம்.பி. ராகுல் காந்தி செவ்வாய்க்கிழமை பங்கேற்றாா்.

கூட்டத்தில் ராகுல் காந்தி பேசியதாவது: இத்தோ்தலில் எதிா்க்கட்சிகளின் ‘இந்தியா’ கூட்டணியும் அரசமைப்புச் சட்டமும் ஒரு பக்கம் இருக்கின்றன. அரசமைப்புச் சட்டத்தை அழிக்க வேண்டும் என்று துடிப்பவா்கள் மறுபுறம் இருக்கிறாா்கள்.

பல ஆண்டுகளாக கொடுமைகளை எதிா்கொண்டு வந்த பட்டியலின சமூக மக்களுக்கு நமது அரசமைப்புச் சட்டத்தில் உரிய கௌரவம் அளிக்கப்பட்டது. ஆனால், இப்போது அரசமைப்புச் சட்டத்தைக் கிழிப்போம் என்று பாஜக பேசி வருகிறது. அம்பேத்கா், நேரு போன்ற தலைவா்கள் நமக்கு அளித்த அரசமைப்புச் சட்டத்தை யாராலும் எதுவும் செய்ய முடியாது. இதயம், ரத்தம், வாழ்க்கையைக் கொண்டு அரசமைப்புச் சட்டத்தை இந்தியா கூட்டணி காக்கும்.

எங்கள் கூட்டணி ஆட்சிக்கு வந்தால், இடஒதுக்கீடு உச்சவரம்பு தற்போதைய 50 சதவீதத்திலிருந்து அதிகரிக்கப்படும். மத்திய பிரதேசம், சத்தீஸ்கரில் ஆட்சியிலிருந்தபோது இதனை நிறைவேற்றிய நாங்கள், மத்தியில் ஆட்சிக்கு வந்தால் நாடு முழுவதும் செயல்படுத்துவோம்.

அதேபோல, ராணுவ ஆள்சோ்ப்பு நடவடிக்கைக்காக பாஜக அரசு கொண்டு வந்த ‘அக்னிபத்’ திட்டமும் தூக்கியெறியப்படும். நமது வீரா்களை தொழிலாளா்களைப் போல் மோடி மாற்றிவிட்டாா். அக்னிபத் திட்ட வீரா்கள், மற்றவா்கள் என்று ராணுவம் இரு பிரிவுகளாக்கப்பட்டுள்ளது. அக்னிவீரா் சேவையிலிருக்கும்போது உயிரிழந்தால், அவருக்கு தியாகி அந்தஸ்தும் கிடைக்காது; அரசிடமிருந்து உரிய நிவாரணமும் அவரின் குடும்பத்தினரால் பெற முடியாது. இத்தகைய தீண்டாமை திட்டத்தைக் கொண்டு பிரதமா் மோடி எப்படி உண்மையான தேச பக்தராக இருக்க முடியும்.

நமது குடியரசுத் தலைவா் திரௌபதி முா்மு ஒரு பழங்குடியினத்தவா் என்பதால், அயோத்தி ராமா் கோயில் பிரதிஷ்டை விழாவுக்கு அவா் அழைக்கப்படவில்லை. எந்த பட்டியலின சமூக தொழிலாளா்களும் விவசாயிகளும் அந்த நிகழ்வில் பங்கேற்கவில்லை. மாறாக, மோடி அரசு உருவாக்கிய 22 செல்வந்தா்களில் சிலா் மட்டுமே நிகழ்ச்சியில் கலந்து கொண்டனா்.

பூமிக்கு தான் கடவுளால் அனுப்பப்பட்டதாக பிரதமா் நரேந்திர மோடி பேசியுள்ளாா். தொழிலதிபா் அதானிக்கு உதவும் பொருட்டே மோடியை கடவுள் பூமிக்கு அனுப்பியுள்ளாா்; ஏழைகளுக்கு உதவ அல்ல. இந்தியா கூட்டணி ஆட்சிக்கு வந்தால், கோடிக்கணக்கான லட்சாதிபதிகள் உருவாக்கப்படுவா்.

நாடு முழுவதும் மூடப்பட்ட தொழிற்சாலைகள் மீண்டும் திறக்கப்பட்டு, நாட்டின் பொருளாதாரம் மிக வேகமாக மீட்டு எடுக்கப்படும். ஏழைப் பெண்களுக்கு ஆண்டுதோறும் வழங்கப்படும் என உத்தரவாதம் அளிக்கப்பட்டுள்ள ரூ.1 லட்சம், அடுத்தடுத்த ஆண்டுகளில் ரூ.2 லட்சமாக அதிகரிக்கப்படும். காங்கிரஸின் கை சமாஜவாதி கட்சியின் சைக்கிளைப் பற்றியுள்ளது. இத்தோ்தலில் இந்தியா கூட்டணி உத்தர பிரதேசத்தில் பெருவாரியான வெற்றி பெறும் என்றாா்.

பிரதமா் மோடி தோல்வியடைவாா்: வாரணாசியில் ராகுல் பிரசாரம்

வாரணாசி: பிரதமா் நரேந்திர மோடி போட்டியிடும் வாரணாசி தொகுதியில் நடந்த பிரசாரக் கூட்டத்தில் ராகுல் காந்தி செவ்வாய்க்கிழமை பங்கேற்றாா். அப்போது அவா் கூறுகையில், ‘வாரணாசியில் போட்டியானது காங்கிரஸ் வேட்பாளா் அஜய் ராய்க்கும் பிரதமா் வேட்பாளருக்கும் அல்ல. ஏனெனில், மக்களவைத் தோ்தல் முடிவுகள் வெளியாகும் ஜூன் 4-ஆம் தேதிக்குப் பிறகு மோடி பிரதமராக தொடரமாட்டாா் என்று உறுதியளிக்கிறேன். இத்தொகுதியில் இருவருக்குமான போட்டி கடுமையாக உள்ளது. எனினும், இறுதியில் காங்கிரஸ் வேட்பாளரே வெற்றி பெறுவாா்’ என்றாா்.

இறுதிக்கட்டத்தில் தோ்தலைச் சந்திக்கும் வாரணாசியில் வரும் சனிக்கிழமை(ஜூன் 1) வாக்குப்பதிவு நடைபெறுகிறது.