ஒரே நாளில் 24 விமானங்களுக்கு வெடிகுண்டு மிரட்டல்: பாதுகாப்பு நடவடிக்கைகள் தீவிரம்

இந்திய விமான நிறுவனங்களைச் சோ்ந்த 24 விமானங்களுக்கு ஞாயிற்றுக்கிழமை வெடிகுண்டு மிரட்டல் விடுக்கப்பட்டது. தொடரும் இது போன்ற மிரட்டல்களால் விமான நிலையங்களில் பாதுகாப்பு நடவடிக்கைகள் தீவிரப்படுத்தப்பட்டுள்ளன.

30-க்கும் மேற்பட்ட விமானங்களுக்கு சனிக்கிழமை வெடிகுண்டு மிரட்டல் விடுக்கப்பட்டதைத் தொடா்ந்து, இண்டிகோ, விஸ்தாரா, ஆகாசா மற்றும் ஏா் இந்தியா உள்ளிட்ட நிறுவனங்களுக்குச் சொந்தமான தலா 6 விமானங்களுக்கு ஞாயிற்றுக்கிழமை வெடிகுண்டு மிரட்டல் விடுக்கப்பட்டுள்ளது.

ஜெட்டாவில் (சவூதி அரேபியா) இருந்து மும்பை; கோழிக்கோடில் இருந்து தம்மம் (சவூதி அரேபியா); தில்லியில் இருந்து இஸ்தான்புல் (துருக்கி); மும்பையில் இருந்து இஸ்தான்புல்; புணேவில் இருந்து ஜோத்பூா் மற்றும் கோவாவில் இருந்து அகமதாபாத் சென்ற விமானம் என தங்களது 6 விமானங்களுக்கு வெடிகுண்டு மிரட்டல் விடுக்கப்பட்டதாக இண்டிகோ நிறுவனம் வெளியிட்ட செய்திக்குறிப்பில் தெரிவிக்கப்பட்டது.

இதேபோல், தில்லியில் இருந்து பிராங்க்ஃபுா்ட் (ஜொ்மனி); சிங்கப்பூரில் இருந்து மும்பை, புணே மற்றும் தில்லி; பாலியில் இருந்து தில்லி மற்றும் மும்பையில் இருந்து சிங்கப்பூா் சென்ற விமானம் ஆகிய 6 விஸ்தாரா விமானங்களுக்கு வெடிகுண்டு மிரட்டல் விடுக்கப்பட்டதாக அந்நிறுவனம் தெரிவித்தது.

அகமதாபாத்தில் இருந்து மும்பை; தில்லியில் இருந்து கோவா, ஹைதராபாத்; மும்பையில் இருந்து பக்தோரா; கொச்சியில் இருந்து மும்பை மற்றும் லக்னௌவில் இருந்து மும்பை ஆகிய 6 ஆகாசா விமானங்களுக்கு வெடிகுண்டு மிரட்டல் விடுக்கப்பட்டது. மேலும், ஏா் இந்தியாவுக்குச் சொந்தமான 6 விமானங்களுக்கும் இதே போன்ற மிரட்டல்கள் விடுக்கப்பட்டதாக தெரிவிக்கப்பட்டது.

கடந்த ஒரு வாரத்தில் மட்டும் இந்திய நிறுவனங்களால் உள்நாட்டு மற்றும் சா்வதேச வழித்தடத்தில் இயக்கப்படும் 90-க்கும் மேற்பட்ட விமானங்களுக்கு வெடிகுண்டு மிரட்டல் விடுக்கப்பட்டுள்ளது.

விமானங்களுக்கு வெடிகுண்டு மிரட்டல் விடுப்பவா்களுக்கு எதிரான கடுமையான சட்டங்களை உருவாக்க திட்டமிட்டு வருவதாக சிவில் விமானப் போக்குவரத்து அமைச்சகம் அண்மையில் தெரிவித்துள்ளது குறிப்பிடத்தக்கது.