70 வயதினருக்கு இலவச மருத்துவக் காப்பீடு- பிரதமா் மோடி தொடங்கி வைத்தாா்

‘ஆயுஷ்மான் பாரத்’ இலவச மருத்துவக் காப்பீட்டின்கீழ், 70 மற்றும் அதற்கு மேற்பட்ட வயதுடைய மூத்த குடிமக்கள் அனைவருக்கும் ரூ.5 லட்சம் வரை மருத்துவக் காப்பீடு வழங்கும் திட்டத்தை பிரதமா் நரேந்திர மோடி செவ்வாய்க்கிழமை தொடங்கிவைத்தாா்.

கடந்த மக்களவைத் தோ்தலையொட்டி, பாஜக அளித்த வாக்குறுதிகளில் இத்திட்டமும் ஒன்றாகும். இதுதவிர நாடு முழுவதும் சுகாதாரத் துறை சாா்ந்த ரூ.12,850 கோடி மதிப்பிலான மேம்பாட்டுத் திட்டங்களையும் பிரதமா் தொடங்கிவைத்தாா்.

‘நாட்டில் சுகாதார உள்கட்டமைப்பை வலுப்படுத்த மத்திய அரசு உயா் முன்னுரிமை அளிக்கிறது; தற்போது தொடங்கப்பட்டுள்ள திட்டங்கள், குடிமக்களுக்கு உயா் தரமான, அதேநேரம் செலவு குறைந்த சுகாதார வசதிகளை உறுதி செய்யும்’ என்று அவா் குறிப்பிட்டாா்.

ஹிந்து மதத்தில் மருத்துவக் கடவுளான தன்வந்திரியின் பிறந்த தினம், ‘ஆயுா்வேத தினமாக’ கடந்த 2016-ஆம் ஆண்டில் இருந்து கொண்டாடப்பட்டு வருகிறது. 9-ஆவது ஆயுா்வேத தினம் செவ்வாய்க்கிழமை (அக். 29) கொண்டாடப்பட்டது. இதையொட்டி, தில்லியில் உள்ள அகில இந்திய ஆயுா்வேத நிறுவனத்தில் (ஏஐஐஏ) நடைபெற்ற நிகழ்ச்சியில் பங்கேற்ற பிரதமா் மோடி மேற்கண்ட திட்டங்களைத் தொடங்கி வைத்தாா்.

வரலாற்றுச் சிறப்புமிக்க தீபாவளி: பின்னா் உரையாற்றிய அவா், ‘ராமஜென்மபூமியில் கட்டப்பட்ட ஸ்ரீராமரின் கோயிலில் ஆயிரக்கணக்கான தீபங்கள் ஒளிரவிருக்கின்றன. 14 ஆண்டுகளல்ல, 500 ஆண்டுகால காத்திருப்புக்கு பின் கடவுள் ஸ்ரீராமா் தனது உறைவிடத்துக்கு திரும்பியுள்ளாா். எனவே, இந்தத் தீபாவளி வரலாற்றுச் சிறப்புமிக்கது’ என்றாா்.

பிரதமா் மேலும் பேசியதாவது: இன்று 150-க்கும் மேற்பட்ட நாடுகளில் ஆயுா்வேத தினம் கொண்டாடப்படுகிறது. இது, ஆயுா்வேதம் மீதான சா்வதேச சமூகத்தின் ஈா்ப்புக்கும் உலகுக்கான இந்தியாவின் பங்களிப்புக்கும் சான்றாகத் திகழ்கிறது.

புதிய அத்தியாயம்: கடந்த 10 ஆண்டுகளில் நவீன மருத்துவத்துடன் ஆயுா்வேதத்தை ஒன்றிணைத்ததன் மூலம் சுகாதாரத் துறையில் புதிய அத்தியாயம் தொடங்கப்பட்டது. சுகாதாரத் துறையின் ஐந்து முக்கியத் தூண்களாக, நோய்த் தடுப்பு, ஆரம்ப நிலையில் நோய் கண்டறிதல், இலவச அல்லது செலவு குறைந்த சிகிச்சை-மருந்துகள், சிறு நகரங்களிலும் மருத்துவா்களின் இருப்பை உறுதி செய்தல், சுகாதாரத் துறையில் தொழில்நுட்ப விரிவாக்கம் ஆகியவை உள்ளன.

கடந்த 10 ஆண்டுகளில் சாதனை எண்ணிக்கையில் எய்ம்ஸ் மருத்துவமனைகளும், மருத்துவக் கல்லூரிகளும் நிறுவப்பட்டுள்ளன. கூடுதலாக ஒரு லட்சம் புதிய எம்பிபிஎஸ் மற்றும் எம்டி இடங்கள் உருவாக்கப்பட்டுள்ளன. அடுத்த 5 ஆண்டுகளில் மேலும் 75,000 இடங்கள் உருவாக்கப்படும்.

நாட்டில் தற்போது 7.5 லட்சத்துக்கும் மேற்பட்ட ஆயுஷ் மருத்துவா்கள் உள்ளனா். நாடு முழுவதும் 2 லட்சத்துக்கும் மேற்பட்ட ஆயுஷ் நல்வாழ்வு மையங்கள் நிறுவப்பட்டுள்ளன.

வாக்குறுதி நிறைவேற்றம்: தீவிர நோய்களால் பாதிக்கப்படும் ஏழைகளின் துயா் துடைக்கும் நோக்கில், ரூ.5 லட்சம் வரை இலவச மருத்துவக் காப்பீடு வழங்கும் திட்டம் தொடங்கப்பட்டது. இத்திட்டத்தின்கீழ் இதுவரை 4 கோடி ஏழைகள் பலனடைந்துள்ளனா். அவா்களுக்கு மருத்துவ சிகிச்சைக்கான ரூ.1.25 லட்சம் கோடி மிச்சப்படுத்தப்பட்டுள்ளது.

தற்போது 70 மற்றும் அதற்கு மேற்பட்ட வயதுடைய அனைத்து மூத்த குடிமக்களுக்கும் வருமான வித்தியாசமின்றி இலவச மருத்துவக் காப்பீடு பெறும் வகையில் திட்டம் விரிவுபடுத்தப்பட்டுள்ளது. அவா்களுக்கு ‘ஆயுஷ்மான் வய வந்தனா அட்டை’ வழங்கப்படும். இத்திட்டம் தொடங்கப்பட்டதன் மூலம் எங்களின் தோ்தல் வாக்குறுதி நிறைவேற்றப்பட்டுள்ளது.

14,000 மக்கள் மருந்தகங்கள்: நாடு முழுவதும் 14,000-க்கும் மேற்பட்ட மக்கள் மருந்தகங்கள் செயல்படுகின்றன. இங்கு 80 சதவீதம் மலிவான விலையில் மருந்துகள் விற்கப்படுகின்றன. இதன்மூலம் மருந்துகளுக்காக மக்கள் செலவிடும் ரூ.30,000 கோடி மிச்சமாகியுள்ளது. ஸ்டென்ட், செயற்கை மூட்டு உள்ளிட்ட மருத்துவ உபகரணங்களின் விலை குறைப்பால் சாமானிய மக்களின் ரூ.80,000 கோடி செலவு மிச்சமாகியுள்ளது. இலவச டயாலிசிஸ் சிகிச்சை திட்டம், இந்திரதனுஷ் இயக்கம் போன்ற நடவடிக்கைகளால் உயிரிழப்புகள் தடுக்கப்பட்டு வருகின்றன.

மருத்துவ சிகிச்சைக்கான ஏழை-நடுத்தர மக்களின் சுமையை முழுமையாக நீக்கும் வரை நான் ஓயமாட்டேன்.

பாரம்பரிய மூலிகைகள்: அஸ்வகந்தா, மஞ்சள், மிளகு போன்ற பாரம்பரிய மூலிகைகள் சாா்ந்த அறிவியல் ஆய்வுகள், அவற்றின் மதிப்பை அதிகரிப்பதோடு, குறிப்பிடத்தக்க சந்தையையும் உருவாக்கும். அஸ்வகந்தாவுக்கான தேவை உயா்ந்து வருவதால், அதன் சந்தை மதிப்பு 2030-ஆம் ஆண்டுக்குள் 2.5 பில்லியன் டாலா்களாக உயரும்.

கடந்த 10 ஆண்டுகளில் ஆயுஷ் உற்பத்தி துறையின் மதிப்பு 3 பில்லியன் டாலரில் இருந்து 24 பில்லியன் டாலராக அதிகரித்துள்ளது. 150-க்கும் மேற்பட்ட நாடுகளுக்கு ஆயுஷ் பொருள்கள் ஏற்றுமதி செய்யப்படுவதால், இந்திய விவசாயிகள் பலனடைந்து வருகின்றனா் என்றாா்.

ரூ.12,850 கோடி திட்டங்கள் தொடக்கம் - அடிக்கல்

பல்வேறு மாநிலங்களில் மொத்தம் ரூ.12,850 கோடி மதிப்பிலான சுகாதார வளா்ச்சித் திட்டங்களைத் தொடங்கி வைத்த பிரதமா் மோடி, புதிய திட்டங்களுக்கு அடிக்கல் நாட்டினாா். தில்லியில் உள்ள அகில இந்திய ஆயுா்வேத நிறுவனத்தில் மேலும் பல வசதிகளுடன் 2-ஆம் கட்ட வளாகப் பகுதியை அவா் திறந்துவைத்தாா்.

ஆயுஷ்மான் பாரத் சுகாதார உள்கட்டமைப்பு இயக்கத்தின்கீழ் தமிழகம், கா்நாடகம் உள்ளிட்ட மாநிலங்களில் தீவிர சிகிச்சை வளாகங்களுக்கு அடிக்கல் நாட்டிய பிரதமா், தெலங்கானா, ராஜஸ்தான், உத்தர பிரதேசம், ஆந்திரம், உத்தரகண்ட் உள்ளிட்ட மாநிலங்களில் உள்ள 11 எய்ம்ஸ் மற்றும் இதர உயா் மருத்துவமனைகளில் ட்ரோன் பயன்பாட்டையும் தொடங்கி வைத்தாா்.

கா்ப்பிணிகள் மற்றும் குழந்தைகளுக்கான தடுப்பூசி நடைமுறைகள் அனைத்தையும் எண்மமயமாக்கும் யு-வின் இணையதளமும் பிரதமரால் தொடங்கிவைக்கப்பட்டது.

தில்லி, மேற்கு வங்க அரசுகள் மீது விமா்சனம்

‘அரசியல் ரீதியிலான காரணங்களால், ஆயுஷ்மான் பாரத் திட்டத்தில் தில்லி மற்றும் மேற்கு வங்க அரசுகள் இணையவில்லை; இந்த மாநிலங்களில் மூத்த குடிமக்களுக்கு ஏற்படும் பாதிப்பையும் வேதனையையும் உணா்ந்துள்ளபோதிலும், அவா்களுக்கு என்னால் சேவையாற்ற இயலவில்லை. அவா்களிடம் மன்னிப்புக் கோருகிறேன். இவ்விரு மாநில அரசுகளின் செயல்பாடு, மனிதநேயத்துக்குப் புறம்பானது’ என்றாா் பிரதமா் மோடி.