பெண் மருத்துவா் கொலை: குற்றவாளிக்கு ஆயுள் சிறை - கொல்கத்தா நீதிமன்றம் தீா்ப்பு

கொல்கத்தா பெண் மருத்துவர் கொலை வழக்கில், சஞ்சய் ராய்க்கு சாகும்வரை ஆயுள் தண்டனை பிறப்பிக்கப்பட்டுள்ளது.
கொல்கத்தா மருத்துவர் கொலை வழக்கில் குற்றவாளி சஞ்சய் ராய்
கொல்கத்தா மருத்துவர் கொலை வழக்கில் குற்றவாளி சஞ்சய் ராய்ANI
Published on
Updated on
2 min read

கொல்கத்தா: மேற்கு வங்க மாநிலம், கொல்கத்தாவில் பெண் மருத்துவா் பாலியல் படுகொலை செய்யப்பட்ட வழக்கில், குற்றவாளியாக அறிவிக்கப்பட்ட சஞ்சய் ராய்க்கு சாகும் வரை ஆயுள் சிறைத் தண்டனை விதித்து சியால்டா நீதிமன்றம் திங்கள்கிழமை உத்தரவிட்டது.

கொல்கத்தாவில் உள்ள அரசு மருத்துவக் கல்லூரி மருத்துவமனையில் 31 வயது முதுநிலை பெண் பயிற்சி மருத்துவா் கடந்த ஆண்டு ஆகஸ்ட் 9-ஆம் தேதி பாலியல் வன்கொடுமை செய்து கொல்லப்பட்டாா்.

இதுதொடா்பாக, காவல் துறைக்கு உதவும் தன்னாா்வலராகப் பணியாற்றிய சஞ்சய் ராய் என்பவரை காவல் துறை கைது செய்தது. இந்த சம்பவம் நாடு முழுவதும் அதிா்வலைகளை ஏற்படுத்தி, மருத்துவா்களின் போராட்டத்துக்கு வழிவகுத்தது.

கொல்கத்தாவில் உள்ள சியால்டா நீதிமன்றத்தில் கூடுதல் மாவட்ட மற்றும் அமா்வு நீதிபதி அனிா்பன் தாஸ் முன்பாக, இந்த வழக்கு விசாரணை நடைபெற்று வந்தது.

இந்த வழக்கில் சஞ்சய் ராயை குற்றவாளி என்று சனிக்கிழமை தீா்ப்பளித்த நீதிபதி அனிா்பன் தாஸ், தண்டனை விவரம் திங்கள்கிழமை அறிவிக்கப்படும் என்று தெரிவித்தாா்.

‘நான் நிரபராதி’: அதன்படி, சியால்டா நீதிமன்றத்தில் சஞ்சய் ராய் திங்கள்கிழமை ஆஜா்படுத்தப்பட்டாா். அப்போது அவா் கூறுகையில், ‘நான் நிரபராதி. என்னை சிறையில் அடித்து உதைத்து சில ஆவணங்களில் கையொப்பமிட கட்டாயப்படுத்தினா். நான் எந்தக் குற்றமும் செய்யவில்லை’ என்றாா்.

மூன்று பிரிவுகளின் கீழ் சிறை: ஆதாரத்தின் அடிப்படையில்தான் தீா்ப்பளிக்கப்படும் என்று சஞ்சய் ராயிடம் நீதிபதி அனிா்பன் தாஸ் தெரிவித்தாா். இதைத் தொடா்ந்து அவா் அறிவித்த தண்டனை விவரம்:

சஞ்சய் ராய்க்கு பாரத நியாய சம்ஹிதா சட்டத்தின் 64-ஆவது பிரிவின் கீழ் ஆயுள் சிறைத் தண்டனை, ரூ.50,000 அபராதம், அபராதத்தை கட்டத் தவறினால் கூடுதலாக 5 மாதங்கள் சிறைத் தண்டனை, 103(1)-ஆவது பிரிவின் கீழும் ஆயுள் சிறைத் தண்டனை, ரூ.50,000 அபராதம், அபராதத்தை கட்டத் தவறினால் மேலும் 5 மாதங்கள் சிறைத் தண்டனை அளிக்கப்படுகிறது. இவை தவிர, 66-ஆவது பிரிவின் கீழ் சாகும் வரை ஆயுள் சிறைத் தண்டனை விதிக்கப்படுகிறது. இந்தத் தண்டனைகளை அவா் ஒரே நேரத்தில் அனுபவிக்க வேண்டும்.

ஏன் மரண தண்டனை விதிக்கப்படவில்லை?: பெண் மருத்துவா் படுகொலை அரிதிலும் அரிதான குற்றம் இல்லை என்பதால் சஞ்சய் ராய்க்கு மரண தண்டனை விதிக்கப்படவில்லை.

பெண் மருத்துவா் குடும்பத்துக்கு ரூ.17 லட்சம்: கொல்லப்பட்ட பெண் மருத்துவா் மருத்துவமனையில் பணியில் இருந்தபோது உயிரிழந்தாா். எனவே, அவரின் குடும்பத்துக்கு இழப்பீடு வழங்க வேண்டியது மாநில அரசின் கடமை. பெண் மருத்துவா் கொல்லப்பட்டதற்கு ரூ.10 லட்சம், அவா் பாலியல் வன்கொடுமை செய்யப்பட்டதற்கு ரூ.7 லட்சம் என மொத்தம் ரூ.17 லட்சத்தை இழப்பீடாக அவரின் குடும்பத்துக்கு மாநில அரசு வழங்க வேண்டும்.

மேல்முறையீடு செய்ய சஞ்சய்க்கு உரிமை: தீா்ப்புக்கு எதிராக கொல்கத்தா உயா்நீதிமன்றத்தில் மேல்முறையீடு செய்ய சஞ்சய் ராய்க்கு உரிமை உள்ளது. தேவைப்பட்டால் அவருக்கு சட்ட உதவி அளிக்கப்படும் என்று நீதிபதி அனிா்பன் தாஸ் தெரிவித்தாா்.

பெற்றோா், முதல்வா் மம்தா, மருத்துவா்கள் அதிருப்தி

தண்டனை விவரம் தொடா்பாக கொல்லப்பட்ட பெண் மருத்துவரின் தாய் கூறுகையில், ‘எனது மகள் கொல்லப்பட்டது எப்படி அரிதிலும் அரிதான வழக்கு இல்லை? தண்டனை விவரம் மிகுந்த அதிருப்தியளிக்கிறது’ என்றாா்.

இழப்பீடு தேவையில்லை: பெண் மருத்துவரின் தந்தை கூறுகையில், ‘எனது மகள் இறப்புக்கு இழப்பீடு தேவையில்லை. குற்றத்தில் தொடா்புள்ள பிற குற்றவாளிகள் கைது செய்யப்படும்வரை, எங்கள் போராட்டம் தொடரும்’ என்றாா்.

மேற்கு வங்க முதல்வா் மம்தா கூறுகையில், ‘கொல்கத்தா காவல் துறை வழக்கை விசாரித்திருந்தால், சஞ்சய் ராய்க்கு மரண தண்டனை கிடைப்பது உறுதி செய்யப்பட்டிருக்கும். தண்டனை விவரம் திருப்தியளிக்கவில்லை’ என்றாா்.

பெண் மருத்துவா் கொலைக்கு எதிராக போராட்டத்தில் ஈடுபட்ட மருத்துவா்களும் தண்டனை விவரத்துக்கு அதிருப்தி தெரிவித்தனா். சஞ்சய் ராய்க்கு போதிய தண்டனை வழங்கப்படவில்லை என்று அவா்கள் தெரிவித்தனா்.

மேற்கு வங்க பாஜக இணைப் பொறுப்பாளரும், அக்கட்சியின் தகவல் தொழில்நுட்பப் பிரிவு தலைவருமான அமித் மாளவியா ‘எக்ஸ்’ தளத்தில் வெளியிட்ட பதிவில், ‘சஞ்சய் ராய்க்கு அளிக்கப்பட்ட தண்டனை, நீதிபரிபாலனத்தை கேலிக்கூத்தாக்கியுள்ளது. இந்தத் தண்டனையை எதிா்த்து மேல்முறையீடு செய்யப்பட வேண்டும்’ என்றாா்.

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads

உடனுக்குடன் செய்திகளை அறிய தினமணி App பதிவிறக்கம் செய்யவும்.

Related Stories

No stories found.
X
Dinamani
www.dinamani.com