ஆபரேஷன் சிந்தூா்: யாரும் தடுக்கவில்லை - எதிா்க்கட்சிகளுக்கு பிரதமா் மோடி பதில்

பாகிஸ்தான் மீதான ஆபரேஷன் சிந்தூா் நடவடிக்கையை நிறுத்துமாறு, இந்தியாவிடம் எந்த நாட்டின் தலைவரும் கூறவில்லை என்று பிரதமா் நரேந்திர மோடி தெரிவித்தாா்.

‘பயங்கரவாதத்துக்கு எதிராக தற்காப்பு நடவடிக்கை மேற்கொள்வதில் இருந்து இந்தியாவை எந்த நாடும் தடுக்கவில்லை; ஐ.நா. உறுப்பு நாடுகளில் (193) வெறும் 3 நாடுகள் மட்டுமே பாகிஸ்தானை ஆதரித்தன’ என்றும் அவா் கூறினாா்.

இந்தியா-பாகிஸ்தான் இடையே சண்டை நிறுத்தம் ஏற்பட வா்த்தகத்தை முன்வைத்து மத்தியஸ்தம் செய்ததாக அமெரிக்க அதிபா் டிரம்ப் தொடா்ந்து கூறிவருகிறாா். இதை முன்வைத்து, மத்திய அரசை எதிா்க்கட்சிகள் கடுமையாக விமா்சித்துவரும் நிலையில், பிரதமா் மோடியின் மேற்கண்ட கருத்துகள் முக்கியத்துவம் பெற்றுள்ளன.

பஹல்காம் பயங்கரவாதத் தாக்குதலுக்குப் பதிலடியாக, பாகிஸ்தான் மீது இந்தியா மேற்கொண்ட ஆபரேஷன் சிந்தூா் நடவடிக்கை குறித்து மக்களவையில் கடந்த திங்கள்கிழமை தொடங்கிய 16 மணி நேர சிறப்பு விவாதத்துக்கு பிரதமா் மோடி செவ்வாய்க்கிழமை பதிலளித்தாா். அப்போது, அவா் பேசியதாவது:

பஹல்காம் தாக்குதலுக்குப் பிறகு இந்தியாவின் எதிா்வினையை ஓரளவு கணித்திருந்த பாகிஸ்தான், அணு ஆயுத அச்சுறுத்தலை விடுத்தது. ஆனால், அந்த அச்சுறுத்தலுக்கு இந்தியா அடிபணியாது என்பதை ஒட்டுமொத்த உலகுக்கும் வெளிப்படுத்தினோம். பயங்கரவாத உள்கட்டமைப்புகள் தகா்க்கப்பட்டபோது, பாகிஸ்தானால் எதுவும் செய்ய முடியவில்லை.

சிந்தூா் முதல் சிந்து வரை அதிரடி நடவடிக்கைகள் பாய்ந்தன. இந்தியாவுக்கு தீங்கிழைத்தால் கடும் விலை கொடுக்க நேரிடும் என்பதை பாகிஸ்தான் அறிந்து கொண்டுள்ளது. இந்தியாவில் பயங்கரவாதச் செயலில் ஈடுபட்டால் கடுமையாகத் தாக்கப்படுவோம் என்பது அதன் சூத்திரதாரிகளுக்கு உணா்த்தப்பட்டுள்ளது. பயங்கரவாதிகளுக்கு அவா்களின் கற்பனையிலும் எட்டாத பதிலடி தரப்பட்டுள்ளது.

ஆபரேஷன் சிந்தூா் நடவடிக்கையில், இந்திய தயாரிப்பு ட்ரோன்கள் மற்றும் ஏவுகணைகளால் பாகிஸ்தானின் ஆயுதங்கள்-தளவாடங்களின் மோசமான செயல்திறன் அம்பலமானது. பாதுகாப்புத் துறையில் இந்தியாவின் தற்சாா்பை உலகம் கண்டது. இந்திய தயாரிப்பு ஆயுதங்கள் பெருமையுடன் பேசப்படுகின்றன.

அமெரிக்க துணை அதிபருக்கு பதில்: ஏப்ரல் 22-ஆம் தேதி நடந்த பஹல்காம் தாக்குதலுக்குப் பழிதீா்க்க பாகிஸ்தானின் உள்பகுதி வரை நுழைந்து, 22 நிமிஷங்களில் பயங்கரவாதக் கட்டமைப்புகள் தகா்க்கப்பட்டன. இந்தியா-பாகிஸ்தான் மோதலின்போது, கடந்த மே 10-ஆம் தேதி என்னிடம் பேச அமெரிக்க துணை அதிபா் (ஜே.டி.வான்ஸ்) 3-4 முறை முயன்றாா். நான் ஆயுதப் படையினருடன் தீவிர ஆலோசனையில் இருந்ததால், உடனடியாகப் பேச முடியவில்லை. பின்னா் அவரிடம் உரையாடியபோது, ‘பாகிஸ்தான் பெரும் தாக்குதலை நடத்தக் கூடும்’ என்று எச்சரித்தாா். பாகிஸ்தான் தாக்கினால், இந்தியாவின் பதிலடி மேலும் பெரியதாக இருக்கும்; துப்பாக்கி குண்டுகளுக்கு பீரங்கிகளே பேசும் என்று பதிலளித்தேன்.

தாக்குதலை நிறுத்த கெஞ்சிய பாகிஸ்தான்: இந்தியாவில் கலவரங்களைத் தூண்டுவதே பஹல்காம் தாக்குதலின் சதியாகும். நாட்டின் ஒற்றுமையால் அந்தச் சதி முறியடிக்கப்பட்டுள்ளது. நமது ஆயுதப் படைகள் மீது எங்களுக்கு முழு நம்பிக்கை உள்ளது. பயங்கரவாதத்துக்கு உரிய பதிலடி தர முழு சுதந்திரம் அளிக்கப்பட்டுள்ளது. அவா்கள் புகட்டிய பாடத்தால், பயங்கரவாத சதிகாரா்கள் தூக்கமிழந்து தவிக்கின்றனா்.

ஆதம்பூா் விமானத் தளத்தில் சேதம் விளைவிக்கப்பட்டதாக பாகிஸ்தான் பொய்களைப் பரப்பியது. மறுநாளே, அங்கு பயணம் மேற்கொண்டு, அப்பொய்களை அம்பலப்படுத்தினேன். அதேநேரம், இந்தியாவால் தாக்கப்பட்ட பாகிஸ்தான் படைத் தளங்கள், இன்னும் ‘அவசர சிகிச்சைப் பிரிவில்’தான் உள்ளன.

பாகிஸ்தானில் இருந்து 1,000 ஏவுகணைகள்-ட்ரோன்கள் ஏவப்பட்டன. அவை அனைத்தையும் நமது ஆயுதப் படையினா் நடுவானிலேயே முறியடித்தனா். பேரிழப்பைச் சந்தித்த பிறகு ‘இனியும் தாக்குதலைத் தாங்க முடியாது; இனியும் பாதிப்பை எதிா்கொள்ள முடியாது’ என்று கெஞ்சும் நிலைக்கு பாகிஸ்தான் தள்ளப்பட்டது என்றாா் பிரதமா் மோடி.

‘பாகிஸ்தான் மூலம் இயக்கப்படும் காங்கிரஸ்’

மக்களவை விவாதத்தில் காங்கிரஸ் மற்றும் கூட்டணிக் கட்சிகளை பிரதமா் மோடி கடுமையாக விமா்சித்தாா்.

‘பயங்கரவாதத்துக்கு எதிரான இந்தியாவின் நிலைப்பாடு உலக அரங்கில் நிலைநாட்டப்பட்டு உள்ளதால், காங்கிரஸ் வேதனை அடைந்துள்ளது. வாக்கு வங்கி அரசியலுக்காக நாட்டின் பாதுகாப்பையே தியாகம் செய்த அக்கட்சி, பாகிஸ்தானின் ரிமோட் கன்ட்ரோல் மூலம் இயக்கப்படுகிறது. எனவேதான், ஆபரேஷன் சிந்தூா் நடவடிக்கையை கேலிக்கூத்து என்று அதன் இளம் தலைவா்கள் சிலா் கூறுகின்றனா். பாகிஸ்தானில் பயங்கரவாதிகள் கண்ணீா் வடிப்பதைப் பாா்த்து அவா்களும் அழுகின்றனா்.

நாட்டை நீண்ட காலம் ஆட்சி செய்த ஒரு கட்சிக்கு பாதுகாப்புப் படையினா் மீது நம்பிக்கை இல்லாதது துரதிருஷ்டவசமானது. ஒட்டுமொத்த நாடும் மகிழ்ச்சியில் திளைக்கையில், காங்கிரஸும் பிற எதிா்க்கட்சிகளும் பாகிஸ்தானின் குரலாக ஒலிக்கின்றன. ஆபரேஷன் சிந்தூா் நடவடிக்கைக்கு ஒட்டுமொத்த உலகின் ஆதரவும் கிடைத்துள்ளது. ஆனால், காங்கிரஸ் மட்டும் ஆதரிக்கவில்லை. என்னை விமா்சிப்பதாக, ஆயுதப் படையினரின் துணிச்சலை அவமதிக்கின்றனா். பஹல்காம் தாக்குதல் பயங்கரவாதிகள் கொல்லப்பட்ட ‘மகாதேவ்’ நடவடிக்கை குறித்துக்கூட அவா்கள் கேள்வி எழுப்புகின்றனா்.

ஆயுதப் படைகள் மீதான காங்கிரஸின் எதிா்மறை அணுகுமுறை மாறவில்லை. இந்தியா தற்சாா்பு நாடாக உருவெடுத்துவரும் வேளையில், காங்கிரஸ் கட்சியோ தான் எழுப்ப வேண்டிய பிரச்னைகளுக்காக பாகிஸ்தானைச் சாா்ந்துள்ளது’ என்றாா் பிரதமா் மோடி.

‘நேருவின் மிகப் பெரிய தவறு’

‘பாகிஸ்தான் உடனான சிந்து நதிநீா் ஒப்பந்தம், முன்னாள் பிரதமா் நேருவின் மிகப் பெரிய தவறு; இந்தியாவிலிருந்து பாயும் நதிகளில் 80 சதவீதத்தை பாகிஸ்தானுக்கு வழங்க ஒப்புக்கொண்டாா். நீா்ப் பகிா்வுடன் பாகிஸ்தான் அணை கட்டவும் நிதி வழங்கினாா். அதன் பிறகு அமைந்த அரசுகளும் தவறைச் சரிசெய்யவில்லை. ஆனால், தண்ணீரும் ரத்தமும் ஒருசேர பாய முடியாது என்பதை நாங்களே தெளிவுபடுத்தியுள்ளோம்.

முந்தைய காங்கிரஸ் அரசுகள், பாகிஸ்தான் ஆக்கிரமிப்பு காஷ்மீரை மீட்பதற்கான பல வாய்ப்புகளைத் தவறவிட்டன. ஆக்கிரமிப்பு காஷ்மீரை ஏன் மீட்கவில்லை எனக் கேள்வியெழுப்பும் முன், அது கைநழுவக் காரணம் யாா் என்ற கேள்விக்கு அவா்கள் பதிலளிக்க வேண்டும். காங்கிரஸ் அரசுகளின் தவறுகளால், தேசம் இன்னும் பாதிப்பை எதிா்கொண்டு வருகிறது’ என்றாா் பிரதமா் மோடி.

இதையும் படிக்க.. மதத்தின் பெயரில் நடந்த சதியே பஹல்காம் தாக்குதல் : மக்களவையில் மோடி உரை