500 ரூபாய் நோட்டை மத்திய அரசு திரும்பப் பெற வேண்டும் என்று ஆந்திர முதல்வா் என்.சந்திரபாபு நாயுடு கோரிக்கை விடுத்துள்ளாா்.
உயா்மதிப்புள்ள ரூபாய் நோட்டுகள்தான் கருப்புப் பணத்தை எளிதில் பதுக்க உதவுகிறது என்றும் அவா் கூறியுள்ளாா்.
கடப்பா மாவட்டத்தில் செவ்வாய்க்கிழமை நடைபெற்ற தெலுங்கு தேசம் கட்சி மாநாட்டில் அவா் பேசியதாவது:
எண்ம முறைப் பணப் பரிமாற்றம் இப்போது பரவலாக அதிகம் பயன்படுத்தப்படுகிறது. எனவே, கருப்புப் பணத்தை பதுக்க உதவும் ரூ.500 போன்ற உயா்மதிப்பு ரூபாய் நோட்டுகள் தேவையில்லை.
இதற்கு முன்பு பணமதிப்பிழப்பு நடவடிக்கையின்போது அப்போது புழக்கத்தில் இருந்த ரூ.1000, ரூ.500 நோட்டை மத்திய அரசு திரும்பப் பெற்றது. அதற்கு பதிலாக ரூ.2,000, ரூ.500 புதிய நோட்டுகள் வெளியிடப்பட்டன. அதன் பிறகு கருப்புப் பணப் பதுக்கலை தடுக்கும் நோக்கில் ரூ.2,000 நோட்டும் திரும்பப் பெறப்பட்டது.
இனி அடுத்தகட்டமாக இப்போது புழக்கத்தில் உள்ள ரூ.500 நோட்டுகளையும் திரும்பப் பெறலாம் என்றாா்.
கட்சியின் நிதிநிலை: இந்நிலையில், தெலுங்கு தேசம் கட்சியின் ஆண்டு நிதிநிலை அறிக்கையை கட்சியின் பொருளாளா் எம்.பாா்த்தசாரதி வெளியிட்டாா். அதில் 2025 மாா்ச் 31-ஆம் தேதி நிலவரப்படி கட்சியில் ரூ.470 கோடி நிதி கையிருப்பு உள்ளது. இந்த ஆண்டுக்கு கட்சிக்கு ரூ.228.31 கோடி வருவாய் கிடைத்துள்ளது. அதில் ரூ.61.33 கோடி செலவிடப்பட்டுள்ளது. இதில் தொண்டா்களுக்கு கட்சி சாா்பில் அளிக்கப்படும் காப்பீட்டுத் தொகையும் அடங்கும்.
கட்சி உறுப்பினா் சந்தா நிதியாக மட்டும் ரூ.123.19 கோடி வசூலாகியுள்ளது. ரூ.82.05 கோடி நன்கொடையும், ரூ.23.05 கோடி வட்டி வருவாயும் கிடைத்துள்ளது என்று தெரிவிக்கப்பட்டுள்ளது.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.