பெண்களுக்கு சமவாய்ப்பு, தலைமைப் பதவி மூலம் உண்மையான வளா்ச்சி சாத்தியமாகும்: குடியரசு துணைத் தலைவா் சி.பி. ராதாகிருஷ்ணன்

பெண்களுக்கு சமவாய்ப்புகளும், தலைமைப் பதவிகளும் கிடைப்பதன் மூலம்தான் நாட்டில் உண்மையான வளா்ச்சி சாத்தியமாகும் என்று குடியரசு துணைத் தலைவா் சி.பி. ராதாகிருஷ்ணன் தெரிவித்துள்ளாா்.

ஜெய்ப்பூரில் உள்ள ராஜஸ்தான் பல்கலைக்கழகத்தில் சனிக்கிழமை நடைபெற்ற 35-ஆவது பட்டமளிப்பு விழாவில் பங்கேற்று, இதுகுறித்து அவா் பேசியதாவது:

வளா்ந்த நாடுகளால், பெண்களுக்கு சமவாய்ப்பு, கௌரவம், தலைமைப் பதவிகளை மறுக்க முடியாது. ஏனெனில், பெண்களுக்கு சமவாய்ப்புகளும், தலைமைப் பதவிகளும் கிடைத்தால்தான் நாட்டில் உண்மையான வளா்ச்சி சாத்தியமாகும். பெண்களின் பங்களிப்புகள், நாட்டின் வளா்ச்சிக்கும், எதிா்கால சந்ததியினருக்கும் உத்வேகமாக இருக்கும்.

மாணவா்கள் நுணுக்கமாக சிந்தித்து, அறநெறியுடன் செயல்பட வேண்டும். வாழ்நாள் முழுவதும் ஏதேனும் கற்றுக் கொண்டிருக்க வேண்டும். தோல்விகளில் இருந்து அவா்கள் பாடம் கற்க வேண்டும். பட்டம் பெற்ற மாணவிகள், தோ்வில் படைத்த சாதனைகள் மற்றும் அண்மைக்காலமாக நடந்தத் தோ்வுகளில் தங்க பதக்கம் வென்றோரில் பெரும்பாலானோா் பெண்கள் என்பதை நினைக்கையில் பெருமிதமாக உள்ளது.

பிரதமா் மோடி தனது அரசின் சுயசாா்பு இந்தியா, வளா்ந்த இந்தியா ஆகியத் திட்டங்கள் மூலம், பட்டதாரிகள் அனைவரும் வேலைவாய்ப்புகளை உருவாக்குபவா்களாகவும், புத்தாக்க கண்டுபிடிப்புகளை மேற்கொள்பவராகவும், தேசத்தை கட்டமைப்பவராகவும் இருப்பதை ஊக்குவிக்கிறாா் என்றாா்.

ஜெய்ப்பூரில் பகவான் மகாவீா் புற்றுநோய் மருத்துவமனை மற்றும் ஆராய்ச்சி மையம் ஏற்பாடு செய்திருந்த புற்றுநோயால் பாதிக்கப்பட்டு உயிா் பிழைத்தோா் தின நிகழ்ச்சியில் சி.பி. ராதாகிருஷ்ணன் பங்கேற்று உரையாற்றினாா். அப்போது அவா் பேசியதாவது:

நாடு முழுவதும் புற்றுநோய்க்கு சிகிச்சை அளிக்கும் மருத்துவ நிறுவனங்கள், தங்களிடையே நெருங்கிய ஒத்துழைப்பை ஏற்படுத்தி கொள்ள வேண்டும். புற்றுநோய்க்கு சிகிச்சை அளிக்கையில் கிடைத்த அனுபவம், சிகிச்சைக்கு பயன்படுத்திய தொழில்நுட்பத்தை அந்நிறுவனங்கள் பரஸ்பரம் பகிா்ந்து கொள்ள வேண்டும். இது புற்றுநோய்க்கு அளிக்கும் சிகிச்சை முறையை மேலும் மேம்படுத்தும்.

புற்றுநோய் பாதித்தோருக்கு அளிக்கப்படும் நவீன சிகிச்சை முறைகள், நாடு முழுவதும் உள்ள அரசு, தனியாா் மருத்துவமனைகளைச் சென்றடைய வேண்டும். அப்போதுதான் புற்றுநோய் பாதித்தோா் பயனடைய முடியும். நாடு முழுவதும் ஆண்டுக்கு 15 லட்சம் போ் புற்றுநோயால் பாதிக்கப்படுவதாக ஐ.சி.எம்.ஆா். தரவுகள் தெரிவிக்கின்றன. புற்றுநோய் வராமல் தடுப்பது, முன்கூட்டியே கண்டுபிடிப்பது, உரிய சிகிச்சை அளிப்பது ஆகிய வழிமுறைகளை அரசு கையாள்கிறது. ‘ஆயுஷ்மான் பாரத்’ இலவச காப்பீட்டுத் திட்டத்தின்கீழ் ரூ.13,000 கோடிக்கு 68 லட்சம் புற்றுநோய் சிகிச்சைகள் அளிக்கப்படுகின்றன.

நாடு முழுவதும் ஒவ்வொரு மாவட்டத்திலும் புற்றுநோய்க்கு சிகிச்சை அளிக்கும் மையங்கள் அமைக்கப்பட்டு வருகின்றன. ஏற்கெனவே இதுபோல 450 புற்றுநோய் சிகிச்சை மையங்கள் அமைக்கப்பட்டு செயல்பட்டு வருகின்றன என்றாா் அவா்.