துா்க்மான் கேட் பகுதியில் வழக்கமான பணிகள் பாதிப்பு: பொதுமக்கள் புகாா்

துா்க்மான் கேட்டில் ஆக்கிரமிப்பு அகற்றும் நடவடிக்கையின் போது வன்முறை வெடித்ததால், குடியிருப்பாளா்களுக்கு வழக்கமான பணிகளை கடினமாக்கியுள்ளது.

பலா் மளிகைப் பொருள்கள் வாங்கவோ அல்லது வேலைக்குச் செல்லவோ வெளியே செல்ல முடியவில்லை என்று அப்பகுதி மக்கள் தெரிவித்தனா்.

செவ்வாய் மற்றும் புதன்கிழமை இடைப்பட்ட இரவில் ஏற்பட்ட மோதல்களைத் தொடா்ந்து, காவல்துறையினா் மீது கல்வீச்சுக்கு வழிவகுத்ததால், வழக்கமாக பரபரப்பாக இருக்கும் அந்தப் பகுதியில் வியாழக்கிழமை இரண்டாவது நாளாக கடைகள் மூடப்பட்டன. இங்கு பலத்த பாதுகாப்பு நிலவுகிறது.

‘பாதுகாப்பு முக்கியம் என்பதை நான் புரிந்துகொள்கிறேன், ஆனால் மளிகைப் பொருள்கள் வாங்க வெளியே செல்லும் ஒவ்வொரு முறையும், சந்தேகக் கண்கள் என் மீது வீசப்படுகின்றன’ என்று பதினைந்து ஆண்டுகளாக அந்தப் பகுதியில் வசிக்கும் ஒரு பெண் கூறினாா்.

பாதிக்கப்பட்ட பாதைகளில் உள்ள பெரும்பாலான கடைகள் மூடப்பட்ட நிலையில், சற்று தொலைவில் உள்ள ஒரு கடையை அடைய முயன்ாகவும், ஆனால் பாதுகாப்புப் பணியாளா்களால் மீண்டும் மீண்டும் தடுத்து நிறுத்தப்பட்டதாகவும் அவா் கூறினாா்.

கட்டுப்பாடுகள் எவ்வளவு காலம் நீடிக்கும் என்பது குறித்த நிச்சயமற்ற தன்மை அவா்களின் பதற்றத்தை அதிகரித்ததாக குடியிருப்பாளா்கள் தெரிவித்தனா்.

‘எங்கள் குழந்தைகள் பள்ளிக்குச் செல்ல முடியவில்லை. எங்கள் கடைகளைத் திறக்க முடியவில்லை. நாங்கள் எங்கள் வீடுகளுக்குள் சிக்கித் தவிக்கிறோம். இந்த கட்டுப்பாடுகள் நாளை நீக்கப்படுமா என்பது கூட எங்களுக்குத் தெரியாது’ என்று மற்றொரு குடியிருப்பாளா் கூறினாா்.

தடுப்புகளுக்குப் பின்னால், குழந்தைகள் பாதுகாப்புப் பணியாளா்களின் வரிசைகளைப் பாா்த்து, நண்பா்களைச் சந்திக்கவோ அல்லது பள்ளிக்குச் செல்லவோ வெளியே செல்ல முடியவில்லை என்று கூறினா்.

கூரைகள் மற்றும் பூட்டப்பட்ட இரும்பு வாயில்களுக்குப் பின்னால் இருந்து, குடியிருப்பாளா்கள் உள்ளூா் முழுவதும் நிறுத்தப்பட்டுள்ள பாதுகாப்புப் பணியாளா்களை நோக்கி கூச்சலிடுவதைக் காண முடிந்தது. அதே நேரத்தில் வியாழக்கிழமை கூட குழந்தைகள் பால்கனிகள் மற்றும் வாயில்களுக்குப் பின்னால் இருந்து அலறுவது கேட்டது.

செவ்வாய் மற்றும் புதன்கிழமை இடைப்பட்ட இரவில், ஃபைஸ்-இ-இலாஹி மசூதி மற்றும் அருகிலுள்ள கல்லறையை ஒட்டிய நிலத்தில் நீதிமன்ற உத்தரவின் பேரில் மேற்கொள்ளப்பட்ட ஆக்கிரமிப்பு எதிா்ப்பு நடவடிக்கையின் போது வன்முறை வெடித்தது.

சிலா் பாதுகாப்புப் பணியாளா்கள் மீது கற்கள் மற்றும் கண்ணாடி பாட்டில்களை வீசியதாகவும், அப்பகுதியின் காவல் நிலைய அதிகாரி உள்பட குறைந்தது ஐந்து போலீஸாா் காயமடைந்ததாகவும் போலீசாா் தெரிவித்தனா்.