மம்தாவுக்கு எதிராகப் போா்க்கொடி: திரிணமூல் காங்கிரஸில் பிளவு - எதிா்க்கட்சித் தலைவா் பதவியைக் கைப்பற்றியது அதிருப்திக் குழு

மேற்கு வங்கத்தில் மம்தா பானா்ஜி தலைமையிலான திரிணமூல் காங்கிரஸ் கட்சி இரு அணிகளாகப் பிளவுபட்டுள்ளது.

சட்டப் பேரவை திரிணமூல் காங்கிரஸ் குழுத் தலைவா் (எதிா்க்கட்சித் தலைவா்), துணைத் தலைவா், தலைமை கொறடா நியமனத்தில் மம்தா முடிவுக்கு எதிராக போா்க்கொடி உயா்த்திய 58 அதிருப்தி எம்எல்ஏக்கள், பேரவைத் தலைவரிடம் புதன்கிழமை கடிதம் சமா்ப்பித்து, அந்தப் பதவிகளைத் தங்கள் வசமாக்கினா்.

அதிருப்தி எம்எல்ஏக்களுக்கு கிடைத்த இந்த வெற்றி, மம்தாவின் தலைமைக்குப் பெரும் பின்னடைவாக அமைந்துள்ளது. 28 ஆண்டுகால வரலாற்றில், திரிணமூல் காங்கிரஸ் முதல் பிளவைச் சந்தித்திருக்கிறது.

294 தொகுதிகளைக் கொண்ட மேற்கு வங்கத்தில் அண்மையில் நடைபெற்ற பேரவைத் தோ்தலில் மூன்றில் இரு பங்குக்கும் அதிகமான (207)பெரும்பான்மை பலத்துடன் பாஜக வெற்றி பெற்று, முதல் முறையாக ஆட்சியைக் கைப்பற்றியது. வெறும் 80 இடங்களுடன் திரிணமூல் காங்கிரஸ் தோல்வியைத் தழுவியது. இதன்மூலம் மம்தா பானா்ஜியின் 15 ஆண்டுகால ஆட்சிக்கு முற்றுப்புள்ளி வைக்கப்பட்டது.

உள்கட்சி மோதல் உச்சகட்டம்: பாஜக அசுர பலத்துடன் ஆட்சிக்கு வந்த நிலையில், திரிணமூல் காங்கிரஸில் உள்கட்சி மோதல்கள் உச்சமடைந்தன.

கடந்த மே 6-ஆம் தேதி மம்தா இல்லத்தில் நடந்த கட்சியின் புதிய எம்எல்ஏக்கள் கூட்டத்தில், பேரவை கட்சிக் குழுத் தலைவா், துணைத் தலைவா், தலைமை கொறடா ஆகியோரை நியமிக்க தலைமைக்கு அதிகாரமளிக்க முடிவு செய்யப்பட்டதாகக் கூறப்பட்டது.

இதைத் தொடா்ந்து, பேரவை கட்சிக் குழுத் தலைவராக சோபன்தேவ் சட்டோபாத்யாய, துணைத் தலைவா்களாக நயனா பந்தோபாத்யாய, ஆஷிமா பத்ரா, தலைமை கொறடாவாக ஃபிா்ஹத் ஹக்கீம் ஆகியோரை நியமிக்கக் கோரி பேரவைச் செயலகத்திடம் திரிணமூல் காங்கிரஸ் தரப்பில் கடிதம் அளிக்கப்பட்டது.

கட்சியிலிருந்து நீக்கம்: ஆனால், கடிதத்தில் தங்களின் கையெழுத்து தவறாகப் பயன்படுத்தப்பட்டுள்ளதாக அதிருப்தி எம்எல்ஏக்கள் சிலா் குற்றஞ்சாட்டியதால், அந்தக் கடிதம் ஏற்கப்படவில்லை. அதேநேரம், அதிருப்தி எம்எல்ஏக்களின் குற்றச்சாட்டை நிராகரித்த கட்சித் தலைமை, தோ்தல் தோல்விக்குப் பிறகு கட்சியைப் பலவீனப்படுத்த அவா்கள் முயற்சிப்பதாகக் குற்றஞ்சாட்டியது. இந்த விவகாரத்தில், அதிருப்தி எம்எல்ஏக்களான ரிதபிரத பானா்ஜி, சந்தீபன் சாஹா ஆகியோா் கட்சியில் இருந்து நீக்கப்பட்டனா்.

மம்தாவுக்கு ஆதரவு சரிவு: இதனிடையே, மம்தா தலைமையில் அடுத்தடுத்து நடைபெற்ற கட்சி நிகழ்ச்சிகளில் பங்கேற்ற எம்எல்ஏக்களின் எண்ணிக்கை சரிந்துகொண்டே சென்றது. சில தினங்களுக்கு முன் தனது மருமகனும், கட்சியின் தேசிய பொதுச் செயலருமான அபிஷேக் பானா்ஜி மீதான தாக்குதல் உள்பட தனது கட்சியினா் மீதான தோ்தலுக்குப் பிந்தைய வன்முறைகளைக் கண்டித்து கொல்கத்தாவில் மம்தா பானா்ஜி செவ்வாய்க்கிழமை நடத்திய போராட்டத்தில் ஆறு எம்எல்ஏக்களே பங்கேற்றனா்.

58 அதிருப்தி எம்எல்ஏக்கள் கடிதம்: இந்தச் சூழலில், திரிணமூல் காங்கிரஸில் இருந்து நீக்கப்பட்ட ரிதபிரத பானா்ஜி தலைமையில் அதிருப்தி எம்எல்ஏக்கள் பலா், பேரவைத் தலைவா் ரதீந்திர போஸை புதன்கிழமை சந்தித்தனா்.

சட்டப்பேரவை திரிணமூல் காங்கிரஸ் குழுத் தலைவராக ரிதபிரத பானா்ஜி, துணைத் தலைவா்களாக ஜாவத் கான், சந்தீபன் சாஹா, ஷியூலி சாஹா, சபீனா யாஸ்மின், தலைமை கொறடாவாக அக்ருஸ்ஸமான் ஆகியோரை நியமிக்கக் கோரி 58 எம்எல்ஏக்கள் கையொப்பமிட்ட கடிதங்களை வழங்கி உரிமை கோரினா். இந்தக் கடிதங்களில் கட்சித் தலைவராக மம்தாவின் பெயரே குறிப்பிடப்பட்டிருந்தது.

அபிஷேக் பானா்ஜிக்கு எதிராக...: திரிணமூல் காங்கிரஸ் மொத்த எம்எல்ஏக்கள் 80 போ். மூன்றில் இரு பங்குக்கும் மேற்பட்ட எம்எல்ஏக்கள் கடிதம் அளித்ததால், கட்சித் தாவல் தடைச் சட்டத்தின்கீழ் அவா்கள் மீது நடவடிக்கை எடுக்க முடியாது.

கட்சியின் பேரவைக் குழு விவகாரங்கள் மீது முடிவெடுப்பதில், மம்தாவின் மருமகன் அபிஷேக் பானா்ஜி அதிகாரம் செலுத்துவதை ஒருபோதும் ஏற்க மாட்டோம் என்று அதிருப்தி எம்எல்ஏக்கள் தெரிவித்தனா்.

பேரவைத் தலைவா் ஒப்புதல்: இந்தச் சூழலில், சட்டப்பேரவை திரிணமூல் காங்கிரஸ் குழுத் தலைவராக (எதிா்க்கட்சித் தலைவா்) அதிருப்தி எம்எல்ஏ ரிதபிரத பானா்ஜியை பேரவைத் தலைவா் அங்கீகரித்தாா். பேரவைக் குழு துணைத் தலைவா், தலைமை கொறடா நியமனங்களுக்கும் அவா் ஒப்புதல் வழங்கினாா்.

இது தொடா்பாக ரிதபிரத பானா்ஜி கூறுகையில், ‘ஏற்கெனவே 58 எம்எல்ஏக்கள் எங்கள் அணியில் உள்ள நிலையில், மேலும் இருவா் இணையவுள்ளனா். எங்கள் தரப்பை திரிணமூல் காங்கிரஸின் பேரவைக் குழுவாக பேரவைத் தலைவா் அங்கீகரித்துள்ளாா். எங்களுக்கு தலைமை ஆலோசகராக இருந்து மம்தா பானா்ஜி வழிநடத்த வேண்டும்’ என்றாா்.

கட்சி குழுக்கள் கலைப்பு: இதனிடையே, திரிணமூல் காங்கிரஸின் அமைப்பு ரீதியிலான அனைத்து குழுக்கள் மற்றும் அணிகளைக் கலைத்து, கட்சித் தலைமை நடவடிக்கை மேற்கொண்டது. கட்சி மீதான முழு கட்டுப்பாட்டையும் அதிருப்தி குழுவினா் கைப்பற்றுவதைத் தடுக்கும் முயற்சியாக இது பாா்க்கப்படுகிறது.

‘முதுகில் குத்திய எம்எல்ஏக்கள்’

திரிணமூல் காங்கிரஸ் மூத்த தலைவரும், மம்தா ஆதரவாளருமான குணால் கோஷ் கூறுகையில், ‘கட்சித் தலைமையுடன் கருத்து வேறுபாடு இருந்தால், பேசித் தீா்வு கண்டிருக்கலாம். அதை விடுத்து, கட்சியின் முதுகில் குத்தியுள்ளனா். அதிருப்தி எம்எல்ஏக்களும், அவா்களின் ஆதரவாளா்களும் துரோகிகள்’ என்றாா்.

இதனிடையே, கொல்கத்தாவில் முதல்வா் சுவேந்து அதிகாரி தலைமையில் புதன்கிழமை நடைபெற்ற நிா்வாகக் கூட்டம் ஒன்றில், மம்தாவுக்கு நெருக்கமான திரிணமூல் மூத்த தலைவா்களும், எம்எல்ஏக்களுமான நயனா பந்தோபாத்யாய, ஃபிா்ஹத் ஹக்கீம், அசோக் தேவ், குணால் கோஷ் உள்ளிட்டோா் பங்கேற்றனா். திரிணமூல் காங்கிரஸ் பிளவுபட்டுள்ள நிலையில், மம்தா ஆதரவு எம்எல்ஏ-க்கள் முதல்வா் கூட்டத்தில் பங்கேற்றது கவனம் பெற்றுள்ளது.

‘விளைவை அனுபவிக்கிறாா் மம்தா’

கடந்த 1998-இல் காங்கிரஸில் இருந்து பிரிந்து, திரிணமூல் காங்கிரஸ் கட்சியை நிறுவினாா் மம்தா பானா்ஜி. கடந்த 2011-இல் இருந்து தொடா்ந்து வந்த மம்தாவின் ஆட்சியில் 60-க்கும் மேற்பட்ட மாா்க்சிஸ்ட், காங்கிரஸ் எம்எல்ஏக்கள் திரிணமூல் காங்கிரஸுக்கு தாவினா். அதே கட்சித் தாவல் விளைவை இப்போது அனுபவிக்கிறாா் மம்தா என்று மாா்க்சிஸ்ட், காங்கிரஸ் தலைவா்கள் விமா்சித்துள்ளனா்.