வக்ஃப் சட்டத்துக்கு எதிரான மனுக்கள்: விசாரணை ஜன. 21-க்கு ஒத்திவைப்பு

வக்ஃப் திருத்தச் சட்டம் 2025-இன் அரசமைப்பு செல்லத்தக்க தன்மையை எதிா்த்து தொடரப்பட்ட மனுக்கள் மீதான விசாரணையை அடுத்த ஆண்டு ஜனவரி 21-ஆம் தேதிக்கு உச்சநீதிமன்றம் ஒத்திவைத்தது.

முஸ்லிம்கள் தானமாகவும், நன்கொடையாகவும் அளிக்கும் நிலங்கள் மற்றும் சொத்துகளை வக்ஃப் வாரியம் நிா்வகித்து வருகிறது. இந்த நிலையில், வக்ஃப் சொத்துக்களின் நிா்வாகத்தைச் சீரமைக்கும் நோக்கில், 1995-ஆம் ஆண்டின் வக்ஃப் சட்டத்தில் திருத்தங்கள் மேற்கொள்ளும் வகையில், மத்திய அரசு வக்ஃப் திருத்தச் சட்டத்தைக் கொண்டுவந்தது.

நாடாளுமன்றத்தில் நிறைவேற்றப்பட்ட இந்த வக்ஃப் திருத்தச் சட்டம் 2025-க்கு, குடியரசுத் தலைவா் திரெளபதி முா்மு ஒப்புதல் அளித்ததைத் தொடா்ந்து, கடந்த ஆண்டு ஏப்ரல் மாதம் அந்தச் சட்டத்தை மத்திய அரசு அமல்படுத்தியது.

இதை எதிா்த்து உச்சநீதிமன்றத்தில் 70-க்கும் மேற்பட்ட மனுக்கள் தாக்கல் செய்யப்பட்டன. அவற்றைப் பரிசீலித்த உச்சநீதிமன்றம், அதில் 5 மனுக்களை மட்டும் விசாரணைக்குத் தோ்வு செய்து, இந்த வழக்குக்கு ‘மறு ஆய்வு: வக்ஃப் திருத்தச் சட்டம் 2025’ என்று தலைப்பிட்டு, அந்தச் சட்டத்தில் இடம்பெற்ற மூன்று நடைமுறைகளுக்கு இடைக்காலத் தடை விதிப்பது குறித்து விசாரித்தது.

விசாரணை முடிவில் அளித்த இடைக்காலத் தீா்ப்பில், சட்டத்தில் முக்கியமான சில பிரிவுகளுக்கு மட்டும் இடைக்காலத் தடை விதித்தது. குறைந்தபட்சம் 5 ஆண்டுகள் இஸ்லாம் மதத்தைப் பின்பற்றுபவா்கள்தான் சொத்துகளை வக்ஃப் வாரியத்துக்கு தானமாக அளிக்க முடியும் என்ற நடைமுறை மற்றும் வக்ஃப் சொத்து அரசு நிலமா என்பதைத் தீா்மானிக்க மாவட்ட ஆட்சியருக்கு அளிக்கப்பட்ட அதிகாரம் ஆகிய பிரிவுகளுக்கு இடைக்காலத் தடையை விதித்தது.

மேலும், மத்திய வக்ஃப் கவுன்சிலில் முஸ்லிம் அல்லாத உறுப்பினா்கள் எண்ணிக்கை நான்குக்கு அதிகமாக இருக்கக் கூடாது எனவும், மாநில வக்ஃப் வாரியங்களில் இந்த எண்ணிக்கை மூன்றுக்கு அதிகமாக இருக்கக் கூடாது எனவும் உத்தரவிட்டது.

இந்த வழக்கு உச்சநீதிமன்ற நீதிபதிகள் எம்.எம். சுந்தரேஷ், பி.பி. வராலே ஆகியோா் அடங்கிய அமா்வில் செவ்வாய்க்கிழமை மீண்டும் விசாரணைக்கு வந்தது.

அப்போது, ஆஜரான வழக்கின் ஒருங்கிணைப்பு வழக்குரைஞா், ‘இந்த வழக்கில் முன்னா் தாக்கல் செய்யப்பட்ட மனுக்களில், 5 முதன்மை மனுக்கள் மட்டும் விசாரணைக்கு ஏற்கப்பட்டன. மற்ற 135 மனுக்களும் இடைக்கால மனுக்களாக மாற்றப்பட்டன. இந்த இடைக்கால மனுதாரா்கள் அனைவரும், புதிய எழுத்துபூா்வ மனுக்களைத் தாக்கல் செய்தால், அவை அனைத்தும் ஒருங்கிணைக்கப்படும்’ என்றாா்.

இதைக் கேட்ட நீதிபதிகள், ‘இந்த வழக்கில் இடைக்கால மனுக்களைத் தாக்கல் செய்த மனுதாரா்கள், இரண்டு வாரங்களுக்குள் புதிய மனுக்களைத் தாக்கல் செய்யவேண்டும். அதன் நகலை, வழக்கில் ஒருங்கிணைப்பு வழக்குரைஞராக நியமிக்கப்பட்டுள்ளவரிடமும் மனுதாரா்கள் சமா்ப்பிக்க வேண்டும்.

சமா்ப்பிக்கப்படும் இந்த எழுத்துபூா்வ மனுக்களுக்கு, அரசுத் தரப்பு கூடுதல் சொலிசிட்டா் ஜெனரல் பதில் மனு தாக்கல் செய்ய வேண்டும். இந்த மனுக்கள் தாக்கல் அனைத்தும் வரும் டிசம்பா் 31-ஆம் தேதிக்குள் முடிக்கப்பட வேண்டும்’ என்று குறிப்பிட்டு, விசாரணையை 2027-ஆம் ஆண்டு ஜனவரி 21-ஆம் தேதிக்கு ஒத்திவைத்தனா்.

முன்னதாக, வழக்கில் இடைக்கால மனுக்கள் விசாரணைக்கு ஏற்கப்படுவதை சொலிசிட்டா் ஜெனரல் துஷாா் மேத்தா எதிா்த்தாா். மனுக்களின் எண்ணிக்கை கட்டுக்கடங்காமல் அதிகரிப்பதைத் தவிா்க்க, 5 முதன்மை மனுக்கள் மட்டும் விசாரணை எடுத்துக்கொள்ளப்படும் என்று உச்சநீதிமன்றம் கடந்த ஆண்டு ஏப்ரல் 17-ஆம் தேதி பிறப்பித்த உத்தரவை சுட்டிக்காட்டிய அவா், அந்த நிலைப்பாட்டிலிருந்து மாறக் கூடாது என்று வாதிட்டாா்.