சிறுமிகள் பாலியல் வன்கொடுமை வழக்கு: முன்னாள் பத்திரிகை நிறுவனருக்கு ஆயுள் சிறைத் தண்டனை

ஐந்து சிறுமிகளை பாலியல் வன்கொடுமை செய்த வழக்கில், மத்திய பிரதேச மாநிலம் போபாலைச் சோ்ந்த முன்னாள் பத்திரிகை நிறுவன உரிமையாளா் பியாரே மியானுக்கு (78), 10 ஆயுள் தண்டனைகளையும், ரூ. 77.64 லட்சம் அபராதமும் விதித்து அங்குள்ள போக்ஸோ நீதிமன்றம் தீா்ப்பளித்துள்ளது.

கடந்த 2014-ஆம் ஆண்டுமுதல் சிறுமிகளை அவா் பாலியல் வன்கொடுமை செய்து வந்துள்ளாா். தனது வீட்டில் மாதம் ரூ. 10,000 ஊதியத்தில் வேலை தருவதாக ஆசைவாா்த்தை கூறி சிறுமிகளை வரவழைத்து, அவா்களை பாலியல் வன்கொடுமை செய்து வந்துள்ளாா். இதற்கு, ராபியா என்ற பெண் உதவியாக இருந்துள்ளாா்.

பாதிக்கப்பட்ட சிறுமி ஒருவருக்கு மருத்துவா் மூலம் கடந்த 2020-ஆம் ஆண்டு ஜூலை 11-ஆம் தேதி மனநல ஆலோசனையை அந்தச் சிறுமியின் பெற்றோா் கொடுத்தபோது, இந்த பாலியல் வன்கொடுமை சம்பவம் வெளிச்சத்துக்கு வந்தது. பிறந்த நாள் விழா என்று கூறி போபாலின் சஹ்புரா பகுதியிலுள்ள அடுக்குமாடி குடியிருப்புக்கு அந்தச் சிறுமியை வரவழைத்து, கட்டாயப்படுத்தி மது அருந்தவைத்து பியாரே மியான் பாலியல் வன்கொடுமை செய்துள்ளாா். இந்த சம்பவம் வெளிச்சத்துக்கு வந்ததைத் தொடா்ந்து, மேலும் சில சிறுமிகளும் பியாரே மியான் மீது புகாா் அளித்தனா்.

இந்தப் புகாா்களின் அடிப்படையில் பியாரே மியானையும், அவருக்கு உதவியாக இருந்த ராபியா பியையும் போலீஸாா் கைது செய்து வழக்குப் பதிவு செய்தனா்.

இந்த வழக்கை செவ்வாய்க்கிழமை விசாரித்த போபால் போக்ஸோ சிறப்பு நீதிமன்ற நீதிபதி, குழந்தைகளுக்கு எதிரான பாலியல் குற்றங்கள் தடுப்பு (போக்ஸோ) சட்டத்தின் பல்வேறு பிரிவுகள் மற்றும் இந்திய தண்டனைச் சட்டப் பிரிவுகளின் கீழ், வாழ்நாள் முழுவதும் சிறைத் தண்டனையை அனுபவிக்க வேண்டும் என்று 8 ஆயுள் தண்டனையும், மேலும் 2 ஆயுள் தண்டனை என 10 ஆயுள் தண்டனைகளை பியாரே மியானுக்கு விதித்து தீா்ப்பளித்தாா். இந்த தண்டனைகளை ஒரே நேரத்தில் அனுபவிக்க வேண்டும் என்று உத்தரவிட்டதோடு, அவருக்கு ரூ. 77.64 லட்சம் அபராதமும் விதித்தாா்.

மேலும், இந்தக் குற்றத்துக்கு உடந்தையாக இருந்த ராபியாவுக்கு 20 ஆண்டுகள் சிறைத் தண்டனை விதித்து தீா்ப்பளித்தாா்.